ޚަބަރު
ޕެންޝަން އޮފީހުން ޢާއިލާތަކަށް ޚާއްސަ ހިނގާލުމެއް ބާއްވަނީ

ޕެންޝަން އޮފީހުން ބޭއްވި 3 ޖެނެރޭޝަން ވޯކް. ފޮޓޯ: ޕެންޝަން އޮފީސް
ޕެންޝަން އޮފީހުން ޢާއިލާތަކަށް ޚާއްސަކޮށްގެން ބާއްވާ 3 ޖެނެރޭޝަން ވޯކް މި އަހަރުވެސް ބާއްވަން ނިންމައިފިއެވެ.
ޕެންޝަން އޮފީހުން ބާއްވާ މި ހިނގާލުން ބޭއްވުމަށް ހަމަޖެހިފައިވަނީ ހުޅުމާލެ ސެންޓްރަލް ޕާކުގައެވެ. މި ހަރަކާތުގައި ހުޅުމާލޭ ސެންޓްރަލް ޕާކް ވަށައިގެން 1 ކިލޯމީޓަރަށް ހިނގާލުމަށް ވަނީ ހަމަޖެހިފައެވެ.
މިގޮތަށް ހިނގާލުން ބޭއްވުމަށް ނިންމާފައިވަނ ީހަރަކާތުގައި ބައިވެރިވާ ދޮށީ އުމުރުގެ މީހުންނަށްވެސް ފަސޭހައިން މި ހިނގާލުމުގައި ބައިވެރިވެވޭނެ ގޮތް ހެދުމަށްކަމަށް ޕެންޝަން އޮފީހުން ބުނެފައިވެއެވެ. ޕެންޝަން އޮފީހުން ބުނެފައިވަނީ، ކުޑަކުދިންނާއި މައިންބައިފައިން އަދި މާމަކާފައިން ހިމެނޭހެން އާއިލާތަކުގެ ތިން ޖީލުގެ މީހުންނަށް ބައިވެރިވެވޭ ގޮތަށް އިންތިޒާމުކުރާ މިހަރަކާތުގައި ހާއްސަ ހިނގާލުމެއްގެ އިތުރުން އިތުރު ހަރަކާތްތައްވެސް ކުރިއަށްގެންދިއުމަށް ރާވާފައިވާކަމަށެވެ.
އެގޮތުން ސްޓޯލް ހަރަކާތްތަކުގެ އިތުރުން މުނިފޫހިފިލުވުމުގެ ތަފާތު ހަރަކާތްތައް ކުރިއަށްގެންދެވޭނެކަމަށް ޕެންޝަން އޮފީހުން ބުނެފައިވެއެވެ. މި ހަރަކާތުގެ މައިގަނޑު މަޤްޞަދަކީ ދޮށީ އުމުރުގެ ފަރާތްތަކަށް އާއިލާއާއެކު އުފާވެރި މާޙައުލެއްގައި ވަގުތު ހޭދަކުރުމުގެ ފުރުޞަތު ހޯދައިދިނުމެވެ. އަދި މީގެ އިތުރުން، ޕެންޝަން އޮފީހުގެ މަސައްކަތްތަކާ ގުޅޭ އެކި ދާއިރާތަކުން މަޢުލޫމާތު ފޯރުކޮށްދީ، އާންމުންގެ ހޭލުންތެރިކަން އިތުރުކުރުމެވެ.
މިއީ އާޢިލާތަކުގެ ތިން ޖީލުގެ މީހުންނަށް ޚާއްޞަކޮށްގެން ޕެންޝަން އޮފީހުން ބާއްވާ މިފަދަ ތިންވަނަ ހަރަކާތެވެ. މި ހިނގާލުމުގައި ބައިވެރިވުމަށް ޕެންޝަން އޮފީހުގެ ވެބްސައިޓް މެދުވެރިކޮށް މިހާރު ރަޖިސްޓްރީ ކުރެވޭނެކަމަށް އެ އިދާރާއިން ބުނެފައިވެއެވެ. މި ހިނގާލުން ބޭއްވުމަށް ހަމަޖެހިފައިވަނީ މިއަންނަ އެޕްރީލް މަހުގެ 12 ވަނަ ދުވަހުއެވެ.