ޚަބަރު
މި އަހަރު ވެސް ޢީދު ނަމާދުގެ ޖަމާޢަތް ފަށާ ގަޑިއަކީ ހެނދުނު 7 ޖަހާއިރު: ވަޒީރު ޑރ. ޝަހީމް
ޢީދު ނަމާދުގެ ޖަމާޢަތުގެ ތެރެއިން: ދަ ޓައިމްސް އޮފް އައްޑޫ
މި އަހަރު ވެސް ޢީދު ނަމާދުގެ ޖަމާޢަތް ފަށާ ގަޑިއަކީ ހެނދުނު 7 ޖަހާއިރު ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، އެކްސްގައި ކުރެއްވެވި ޕޯސްޓެއްގައެވެ. މި ޕޯސްޓުގައި ވަޒީރު ވިދާޅުވީ، މިދިޔަ އަހަރެކޭ އެއްފަދައިން މި އަހަރު ވެސް ޢީދު ނަމާދުގެ ޖަމާޢަތް ފަށާ ގަޑިއަކީ ހެނދުނު 7:00 ގައި ކަމަށެވެ.
މި އަހަރުގެ ފިޠުރު ޢީދު ނަމާދު މާލެ ސަރަޙައްދުގައި ބޮޑު ޖަމާޢަތުގައި 4 ތަނެއްގައި ކުރުމަށް ވަނީ ހަމަޖެހިފައެވެ. އެގޮތުން މާލޭގައި ބޮޑު ޖަމާޢަތުގައި ޢީދު ނަމާދު ކުރުމަށް ހަމަޖެހިފައިވަނީ މާފަންނު ސްޓޭޑިއަމްގައެވެ. އަދި ވިލިނގިލީގައި ބޮޑު ޖަމާޢަތުގައި ޢީދު ނަމާދުކުރުން ހަމަޖެހިފައިވަނީ ވިލިނގިލީ ފުޓްސަލް ދަނޑުގައެވެ. މީގެ އިތުރުން ހުޅުމާލެ ފޭސް - 1 ގައި ބޮޑު ޖަމާޢަތުގައި ޢީދު ނަމާދު ކުރާ ގޮތަަށް ސިންތަޓިކް ޓްރެކް ހަމަޖައްސާފައިވާއިރު، ހުޅުމާލެ ފޭސް - 2 ގައި ޢީދު ނަމާދު ކުރާ ގޮތަަށްް ހަމަޖައްސާފައި ވަނީ ކުރިކެޓް ސްޓޭޑިއަމްގައެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ބޮޑު ޖަމާޢަތުގައި ފިޠުރު ޢީދު ނަމާދުކުރާ ތަންތަން ފިޔަވާ މާލެ ސަރަޙައްދުގައި އިތުރު 23 މިސްކިތެއްގައި ފިޠުރު ޢީދު ނަމާދުކުރުން ކުރިއަށްދާނެ ކަމަށެވެ. މީގެ އިތުރުން އެ ވުޒާރާއިން ވިދާޅުވީ، ވިއްސާރަވުމުގެ ސަބަބުން ބޮޑު ޖަމާޢަތުގައި ކުރުމަށް ހަމަޖެހިފައިވާ ޢީދު ނަމާދު ކެންސަލްވެއްޖެނަމަ ޢީދު ނަމާދު ކުރާނީ މާލޭގައި ހުކުރު ނަމާދުކުރާ ހުރިހާ މިސްކިތެއްގައި ކަމަށެވެ.
ފިޠުރު ޢީދު އަދި އަޟްހާ ޢިދު ނަމާދު ޖަމާޢަތުގައި ފަށާ ގަޑި ހެނދުނު 7:00 އަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ނިންމަވާފައިވަނީ މިދިޔަ އަހަރުގައެވެ.
