ކުޅިވަރު

ވޯލްޑް ކަޕް ކޮލިފައިން: އިންގްލެންޑުން ލެޓްވިއާ ބަލިކޮށްފި

ވޯލްޑް ކަޕް ކޮލިފައިން: އިންގްލެންޑުން ލެޓްވިއާ ބަލިކޮށްފި

ގޯލު ކާމިޔާބުކުރުމަށްފަހު ރީސް ޖޭމްސް އާއި ޑެކްލަން ރައިސް އުފާފާޅުކުރަނީ، ފޮޓޯ: ގެޓީއިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

25 މާރިޗު 2025، 12:24

25 މާރިޗު 2025، 12:24

މިއަންނަ އަހަރު އޮންނަ ވޯލްޑް ކަޕަށް ކޮލިފައިވުމުގެ ގޮތުން ކުޅުނު މެޗުގައި އިންގްލެންޑުން 3-0 އިން ލެޓްވިއާ ބަލިކޮށްފިއެވެ. 

މި މެޗުގައި އިންގްލެންޑަށް ލީޑު ނަގައިދިނީ 2022 ވަނަ އަހަރުގެ ސެޕްޓެމްބަރ މަހުގެ ފަހުން އިންގްލެންޑުގެ ޓީމުން އަލުން ޖާގަ ލިބުނު ރީސް ޖޭމްސްއެވެ. މިއީ ފުރަތަމަ ހާފު ނިމެން ހަތް މިނެޓަށް ވެފައިވަނިކޮށް ލިބުނު ހިލޭ ޖެހުމަކުން އޭނާ ކާމިޔާބުކުރި ގޯލެކެވެ.

ދެވަނަ ހާފުގައި އިންގްލެންޑަށް ލީޑު ފުޅާކޮށްދިނީ ހެރީ ކޭންއެވެ. މިއީ ކޭން ޤައުމީ ޖާޒީގައި ކާމިޔާބުކުރި 71 ވަނަ ގޯލެވެ. އޭނާވަނީ އެ ޓީމު އެންމެ ފަހުން ކުޅުނު މެޗުގައި އަލްބޭނިއާ ކޮޅަށް ވެސް ގޯލެއް ކާމިޔާބުކޮށްފައެވެ.

އަދި މެޗު ނިމުމުގެ ކުރިން އިންގްލެންޑުގެ ތިންވަނަ ގޯލު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް އެބެރެޗީ އެޒޭއެވެ. މިއީ އޭނާ ޤައުމީ ޓީމަށް ކާމިޔާބުކޮށްދިން ފުރަތަމަ ގޯލެވެ.

ވޯލްޑް ކަޕްގެ ކޮލިފައިންގެ ގްރޫޕް ކޭ ގައި ކުޅުނު މި މެޗު ކާމިޔާބުކުރުމާއެކު އިންގްލަންޑް ވަނީ މި ގްރޫޕްގައި މިހާތަނަށް ކުޅުނު ދެ މެޗުން މޮޅުވެ ޖުމްލަ ހަ ޕޮއިންޓާއެކު އެއްވަނަ މަގާމު ހޯދާފައެވެ. 

މީގެ އިތުރުން، މިއީ އިންލެންޑް ޓީމާ އަލަށް ހަވާލުވި ތޯމަސް ޓުޗެއްލެގެ ދެވަނަ މެޗު، އަދި ދެވަަނަ މޮޅުވެސް މެއެވެ. އޭނާ ބުނަމުން އަންނަނީ އިންގްލެންޑުގެ އައު ޖެނެރޭޝަނާއެކު ތަށި ހޯދޭނެ ކަމަށެވެ. އެގޮތުން، މި ފަހުން އެ ޓީމު ކުޅުން ދެމެޗަށް ބަލައިފިނަމަ، ޒުވާން މޮޅު ކުޅުންތެރިން ޓީމުގައި ތިބިކަން އެނގޭނެކަމަށް އޭނާ ވަނީ ބުނެފައެވެ.

މި ލިޔުން ކިޔާލުމުން

Ads by MSS