ނ. ވެލިދޫގައި އަންނަ އޭޕްރީލް މަހު ޑައިލިސިސް ޚިދުމަތް ފެށިގެންދާނެ: ޞިއްޙީ ވަޒީރު

ނ. ވެލިދޫގައި އަންނަ އޭޕްރީލް މަހު ޑައިލިސިސްގެ ޚިދުމަތް ފެށުމަށް ހަމަޖެހިފައިވާ  ކަމަށް ޞިއްޙީ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ވަޒީރު ވިދާޅުވީ، ޑައިލިސިސްގެ ޚިދުމަތް ހޯދަންޖެހޭ މީހުން ގިނަ ރަށްރަށަށް ބައްލަވައިގެން މި ޚިދުމަތް ފުޅާކުރުމުގެ މަސައްކަތް މިހާރު ކުރެވިގެން އެބަދާކަމަށެވެ. އެގޮތުން، ހއ. އިހަވަންދޫގައި ދާދި ފަހުން މި ޚިދުމަށް ފަށާފައިވާކަމަށް ވަޒީރު ވަނީ ވިދާޅުވެފައެވެ. ހަމަ އެހެންމެ، ނ. އަތޮޅުގައި ޑައިލިސިސްގެ ހެދުމަށް އެނދު އިތުރުކޮށްފައިވާކަމަށް ވަޒީރު ވަނީ މަޢުލޫމާތުދެއްވާފައެވެ. މީގެ އިތުރުން ވަޒީރު ވިދާޅުވީ، ގއ. ވިލިނގިލީގައި ވެސް މިހާރު ޑައިލިސިސް ހެދުމުގެ ޚިދުމަތް ދެވެމުންދާ ކަމަށާއި އިރާދަކުރެއްވިއްޔާ ކުރިއަށް އޮތް މަސްދުވަހުގެ ތެރޭގައި ނ. ވެލިދޫގައި ވެސް މި ޚިދުމަތް ފެށިގެންދާނެ ކަމަށެވެ.

ރާއްޖޭގެ ހުރިހާ އަތޮޅެއްގައި ޑައިލިސިސް ހެދުމުގެ ނިޒާމެއް ޤާއިމްކޮށްދެއްވުމަކީ ސަރުކާރުން މުހިންމު އިސްކަމެއް ދެއްވައިގެން ކުރައްވަމުން އަންނަ މަސައްކަތެކެވެ. އަދި މި ފަރުވާ ހޯދުމަށް ރައްޔިތުން ކުރަންޖެހޭ ޚަރަދު ކުޑަކުރުމަކީ ސަރުކާރުގެ އަމާޒެއް ކަމަށް ވަޒީރު ވަނީ ވިދާޅުވެފައެވެ. އަދި މި މަސައްކަތަކީ ކިޑްނީ ބައްޔަށް ފަރުވާ ހޯދަމުންދާ ފަރާތްތަކަށް ލުޔެއް ހޯދައިދިނުމުގެ ގޮތުން ކުރާ ކަމެއްކަން ވަޒީރު ވަނީ ފާހަގަކުރައްވާފައެވެ. ހަމަ މިއާއިއެކު، ބައެއް އަތޮޅު ހޮސްޕިޓަލްތަކާއި ޞިއްޙީ މަރުކަޒުތަކުގައި ވެސް މި ޚިދުމަތް ފެށުމަށް ރޭވިފައިވާ ކަމަށް ވަޒީރު ވަނީ ވިދާޅުވެފައެވެ.

ނ. ވެލިދޫގައި ކިޑްނީ ބައްޔަށް ފަރުވާ ކުރުމަށް ޑައިލިސިސް ހެދުމުގެ ޚިދުމަތް ފެށުމުން، އެ ސަރަޙައްދުގެ ރައްޔިތުންގެ ތަކުލީފުތަކަށް ބޮޑު ލުއިފަސޭހަކަމެއް ލިބިގެންދާނެއެވެ.