ކުޅިވަރު
އިންޑިއާ މެޗުގެ ގޯސްތައް ރަގަޅު ކުރެވޭނެ ކަމުގެ އުއްމީދު އެބައޮތް: ސުޒޭނު

އިންޑިއާއާ ދެކޮޅަށް ކުޅުނު އެކުވެރިކަމުގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ސުޒޭނު ވާހަކަދައްކަނީ ---
ސައުދީ އަރަބިއްޔާގައި 2027 ވަނަ އަހަރު ބާއްވާ އޭޝިއަން ކަޕަށް ކޮލިފައިވުމަށް ރާއްޖޭން ކުޅޭ ފުރަތަމަ މެޗުގައި މިއަދު ފިލިޕީންސްއާ ކުޅެން ހަމަޖެހިފައިވާއިރު، އިންޑިއާއާ ދެކޮޅަށް ކުޅުނު އެކުވެރިކަމުގެ މެޗުގައި ހެދުނު ގޯސްތައް ތަކުރާރު ނުކުރާނެކަމުގެ އުއްމީދު އެބައޮތްކަމަށް، ދިވެހި ޤައުމީ ފުޓުބޯޅަ ޓީމުގެ ކޯޗު، ޢަލީ ސުޒޭން ބުނެފިއެވެ.
ސްޒޭން މިހެން ބުނީ، ފިލިޕީންސް މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.
މިދިޔަ ހަފްތާގައި އިންޑިއާއާ ދެކޮޅަށް ކުޅުނު މެޗުން ރާއްޖެ ބަލިވީ 3-0 އިންނެވެ. އެ މެޗުގައި އިންޑިއާއިން ވަނީ ކޯނަރުތަކުން ދެ ގޯލު ކާމިޔާބުކޮށްފައެވެ. އެހެންކަމުން، ހިލޭ ޖެހުންތަކާއި ކޯނަރުތަކުގައި އިދިކޮޅު ޓީމުގެ ކުޅުންތެރިން ރަގަޅަށް ބެލެހެއްޓުމަކީ ހަމަ ޔަޤީނުން ވެސް ރާއްޖޭގެ ޓީމުން ރަގަޅުކުރަން ޖެހޭ ކަމެކެވެ.
ސުޒޭން ބުނީ، އިންޑިއާއާ ދެކޮޅަށް ކުޅުނު މެޗަށް ވުރެ، ފިލިޕީންސް މެޗުގައި ކުޅުމުގެ ފެންވަރު ރަގަޅު ކުރެވޭނެ އުއްމީދު ވެސް އޮތް ކަމަށެވެ.
ފިލިޕީންސްއާ ދިވެހިރާއްޖެ އެންމެ ފަހުން ބައްދަލުކޮށްފައިވަނީ 2021 ވަނަ އަހަރު ވޯލްޑް ކަޕް ކޮލިފައިންގައެވެ. ޔޫއޭއީގައި ކުޅުނު އެ މެޗު ވަނީ 1-1 އިން އެއްވަރުވެފައެވެ. އޭރު ސުޒޭން ހުރީ ޓީމުގެ އެސިސްޓެންޓު ކޯޗަކަށެވެ.
އެ މެޗަށް ބަލާނަމަ، ފިލިޕީންސް ފެނުނީ އަހަރެމެންނަށް ވުރެން މާ ވަރުގަދަކޮށް. އުންމީދަކީ އަހަރެމެން އޭރު އޮތް ހާލަތު އަރައިގަނެ، މިދިޔަ ތިނެއް ނޫނީ ހަތަރު އަހަރު ތެރޭ މި ހޯދި ކުރިއެރުންތައް. އަހަރެމެންގެ ކުޅުމުން މި މެޗުގައި ދެއްކުން.
ނޫސްވެރިންގެ ބައްދަލުވުމުގައި ޓީމުގެ ކޯޗު ޢަލީ ސުޒޭން ބުންޏެވެ.
ނޫސްވެރިންގެ ބައްދަލުވުމުގައި ވާހަކަ ދައްކަމުން ގައުމީ ޓީމުގެ މިޑްފީލްޑަރު، އައިސަމް އިބްރާހިމް ބުނީ، އޭޝިއަން ކަޕް ކޮލިފައިން އަކީ ވަރަށް ބޮޑެތި އުންމީދުތަކެއް ގުޅިފައިވާ ޝައުގުވެރި މެޗުތަކެއް ކަމަށެވެ. އަދި އޭޝިއަން ކަޕަށް ކޮލިފައިވުމަށްޓަކައި ކުރަން ހުރި މަސައްކަތާ ބެހޭގޮތުން ސުވާލުކުރުމުން އޭނާ ބުނީ، އޭނާ ދެކޭ ގޮތުގައި މި ވަގުތު އެންމެ މުހިންމު މެޗަކީ ކުރިއަށް އޮތް ފިލިޕީންސް މެޗު ކަމަށެވެ.
ފިލިޕީންސްއާ ރާއްޖެ ބައްދަލުކުރާ މެޗު ފެށުމަށް ހަމަޖެހިފައިވަނީ ރާއްޖެ ގަޑިން ހަވީރު 4 ޖަހާއިރެވެ. އެއީ ފިލިޕީންސް ގަޑިން އިރުއޮއްސި 19:00އެވެ.