Ads by Exprox

ޚަބަރު

ޣަައްޒާގެ ބިމުން ހަބަރުތައް ގެނެސްދޭ ހުސާމް ޝަބާތް ޝަހީދުކޮށްލައިފި

ޣަައްޒާގެ ބިމުން ހަބަރުތައް ގެނެސްދޭ ހުސާމް ޝަބާތް ޝަހީދުކޮށްލައިފި

ޝަހީދު ހުސާމް ޝަބާތް

ޙަސްނާ އަޙްމަދް

ޙަސްނާ އަޙްމަދް

25 މާރިޗު 2025، 02:43

25 މާރިޗު 2025، 02:43

ޣައްޒާގެ ބިމުން އެތަނުގެ ހަބަރުތައް ގެނެސްދިނުމަށް މަސައްކަތްކުރަމުންދިޔަ އަލްޖަޒީރާގެ ނޫސްވެރިޔާ ހުސާމް ޝަބާތް ޝަހީދުކޮށްލައިފިއެވެ.

ހުސާމް ޝަހީދު ކޮށްލައިފައިވަނީ އޭނާ ދުއްވަމުންދިޔަ ވެހިކަލަށް އަމާޒުކޮށް ހަމަލާދީގެނެވެ. 

މެދުތެރޭ ޣައްޒާގެ ދެއިރް އަލް ބާލާހުން ރިޕޯޓް ކުރަމުން އަލްޖަޒީރާގެ ތާރިޤް އަބޫ އަޒޫމް ބުނެފައިވަނީ 23 އަހަރުގެ ޝަބާތު ޝަހީދުވީއިރު ވެސް މީގެ ކުރިން އިޒްރާއީލުން ދިން އިތުރު ހަމަލާއެއްގައި ޒަޚަމްވެފައިވާ ކަމަށެވެ. އެ ޒަޚަމްތަކާއި އެކުވެސް އޭނާ ބޭނުންވީ ޣައްޒާގެ ޙާލަތު ރިޕޯޓު ކުރުމުގައި ދެމިހުރުމަށް ކަމަށް އަބޫ އަޒޫމް ބުނެފައިވެއެވެ.

އަބޫ އަޒޫމް އިތުރަށް ބުނެފައިވަނީ އިޒްރާއިލްގެ އަސްކަރިއްޔާއިން ޝަބާތުގެ ކާރަށް އަމާޒުކޮށް ހަމަލާދީފައިވަނީ ކުރީބައިގައި އިތުރު އިންޒާރެއް ދިނުމެއް ނެތި ކަމަށެވެ. 

ޝަބާތު ޝަހީދުވުމާއި އެކު އޭނާގެ އެކުވެރިން، އޭނާގެ ފަހު ބަސްތައް ހިއްސާކޮށްފައިވެއެވެ. 

އެގޮތުން ޝަބާތު އެންމެފަހު މެސެޖުގެ ގޮތުގައި ލިޔެފައިވާ ލިޔުންކޮޅެއް އޭނާގެ އެކުވެރިން އެކްސްގައި ހިއްސާކޮށްފައިވެއެވެ. އޭނާ ލިޔެފައިވެއެވެ. "ތިބާ މި ލިޔުން ކިޔަމުންދާނަމަ އޭގެ މާނައަކީ އަހަރެން ޝަހީދުވެއްޖެއެވެ. ބެލެވޭ ގޮތުގައި އިޒްރާއިލްގެ އަސްކަރިއްޔާއިން އެހަމަލާދީނީ ސީދާ އަހަންނަށް އަމާޒުކޮށެވެ."

މީގެ 18 މަސްކުރިން ހަމަލާތައް ފެށި މިހާހިސާބަށް އޭނާ ވަނީ އޭނާގެ ޙަޔާތުގެ ހުރިހާ ވަގުތެއް ޣައްޒާގެ ހަބަރުތައް ފޯރުކޮށްދިނުމަށް ޚާއްސަކޮށްފައި ކަމަށް ޝަބާތު ބުނެފައިވެއެވެ.

އުތުރު ޣައްޒާގައި ހިންގަމުންދިިޔަ އަނިޔާވެރި ޢަމަލުތައް އޭގެ ކޮންމެ މިނިޓަކުން މިނިޓަކުން އަހަަރެން ޑޮކިޔުމެންޓް ކުރީމެވެ. އަހަރެންގެ މަޤްސަދަކަށް ހެދީ އެބައިމީހުން ދުނިޔެއަށް ފޮރުވުމަމަށް މަސައްކަތްކުރާ ތެދު ދުނިޔެއަށް ދެއްކުމެވެ.

ޝަބާތުގެ އެންމެ ފަހުގެ ލިޔުމުގައި ވެއެވެ.

އަހަރެން މަގުމަތީގެ ޕޭވްމަންޓު ތަކުގައި ނިދީމެވެ. ސްކޫލްތަކުގަޔާއި ޓެންޓުތަކުގައި ނިދީމެވެ. ނިދޭނެ ކޮންމެ ތާކު ނިދީމެވެ. ދިރިހުރުމަށް އަހަރެން ކޮންމެ ދުވަހަކު ހަނގުރާމަ ކުރީމެވެ. އެތައް މަހެއް ވަންދެން ބަނޑުހައިހޫނު ކަން ތަހައްމަލް ކުރީމެވެ. އެކަމަކު އަހަރެންގެ މީހުން ދޫކޮށް އަހަރެން ނުދަމެވެ.

ޝަބާތު ލިޔެފައިވެއެވެ.

ޝަބާތު އިތުރަށް ބުނެފައިވަނީ ނޫސްވެރިޔެއްގެ މަސައްކަތް ފުރިހަމައަށް އެބަކުރާކަން ﷲ ގަންދީ ބުނާކަމަށެވެ. ހުރިހާކަމެއް ދޫކޮށް އޭނާގެ ފުރާނަ ނުރައްކަލަށް ހުށައެޅިފައިވީ ހިނދުވެސް ޣައްޒާގެ ޙާލަތާއި މެދު ތެދު ހަބަރުތައް ފޯރުކޮށްދިނުމަށް އޭނާ މަސައްކަތް ކޮށްފައިވާނެ ކަމަށް އޭނާ ބުނެފައިވެއެވެ.

މިހާރު އަހަރެން މިވަނީ ޝަހީދުވެފައެވެ. އަހަރެން މިކުރި ހުރިހާ މަސައްކަތެއް މިކުރީ ފަލަސްޠީންގެ ރައްޔިތުންނާއި މެދު އަހަރެންގެ އުންމީދު އޮތުމުންނެވެ. މިބިމަކީ އަހަރެމެންގެ ބިމެވެ. މިބިމާއި މިބިމުގެ މީހުންގެ ދިފާޢުގައި މަސައްކަތް ކުރުމުގައި އަހަރެން ޝަހީދުވެގެން ދިޔުމަކީ އަހަންނަށް ލިބުނު އެންމެ މަތީ ޝަރަފެވެ.

ޝަބާތު ބުނެފައިވެއެވެ.

އޭނާގެ މެސެޖުގައި އެންމެ ފަހުން ލިޔެފައިވަނީ މުޅި ދުނިޔެއަށް ކޮށްފައިވާ އިލްތިމާސްއެކެވެ.

ޣައްޒާގެ ވާހަކަ ދެއްކުން ހުއްޓާނުލާށެވެ. ދުނިޔޭގެ މޫނު އަނބުރާލިޔަ ނުދޭށެވެ. އަހަރެމެންނަށްޓަކައި އަޑުއުފުލާށެވެ. އަހަރެމެންގެ ވާހަކަތައް ކިޔާދޭށެވެ. ފަލަސްޠީން މިނިވަންވުމާއި ހަމައަށެވެ. ޝަބާތުގެ އިލްތިމާސްކޮށްފައިވެއެވެ.

މި ލިޔުން ކިޔާލުމުން

Ads by MSS