ޚަބަރު
މިއަހަރުގެ ރަމަޟާން މަހު މައުމޫން ފައުންޑޭޝަނުން ބާއްވާ ސިލްސިލާ އިޙްޔާ ފޯރަމްގެ ފަހު ފޯރަމް މިރޭ!

ރައީސް އަލްއުސްތާޛު މައުމޫން ޢަބްދުލްޤައްޔޫމް/ފޮޓޯ: މައުމޫން ފައުންޑޭޝަން
މިއަހަރުގެ ރަމަޟާން މަހުގެ ރޭތައް އިޙްޔާކުރުމަށް މައުމޫން ފައުންޑޭޝަނުން ބާއްވާ ސިލްސިލާ އިޙްޔާ ފޯރަމްގެ ފަހު ފޯރަމް މިރޭ ބޭއްވުމަށް ހަމަޖެހިފައިވާ ކަމަށް މައުމޫން ފައުންޑޭޝަނުން ބުނެފިއެވެ.
މަޢުމޫން ފައުންޑޭޝަނުން މަޢުލޫމާތުދޭގޮތުގައި މި ފޯރަމުގެ އެންމެ ފަހު ޖަލްސާ އޮންނާނީ މިރޭ އިސްލާމީ މަރުކަޒުގެ ޖަލްސާކުރާ މާލަމުގައެވެ. އަދި މި ފޯރަމް ފެށުމަށް ހަމަޖެހިފައިވަނި މިރޭ 21:45 ގައެވެ.
މައުމޫން ފައުންޑޭޝަނުން މަޢުލޫމާތުދޭގޮތުގައި، މިރޭގެ އިޙްޔާ ފޯރަމްގައި ދެ ބޭފުޅަކު 2 މައުޟޫއަކަށް ތަޤުރީރު ކުރައްވާ ގޮތަށް ވަނީ ހަމަޖެހިފައެވެ. އެގޮތުން މިރޭގެ ފޯރަމްގައި ޑރ. ސަޢުދުﷲ ޢަލީ ތަޤުރީރުކުރެއްވުމަށް ވަނީ ހަމަޖެހިފައެވެ. އެބޭފުޅާ ތަޤުރީރުކުރައްވާނީ، "އިސްލާމް ދީން އުނގަންނަވައި ދެއްވުމުގައި ކީރިތި ރަސޫލާ ގެންގުޅުއްވި ގޮތްތައް" މި މައުޟޫގެ މައްޗަށް ކަމަށް މައުމޫން ފައުންޑޭޝަނުން މަޢުލޫމާތުދެއެވެ.
މީގެ އިތުރުން މިރޭގެ ފޯރަމްގައި ރައީސް އަލްއުސްތާޛު މައުމޫން ޢަބްދުލްޤައްޔޫމް ތަޤުރީރުކުރައްވާ ގޮތަށް ވެސް ވަނީ ހަމަޖެހިފައެވެ. އެގޮތުން މިރޭގެ ފޯރަމްގައި އެމަނިކުފާނު ތަޤުރީރުކުރައްވާނީ "އިޖާބަ ކުރައްވަނިވި ދުޢާ" މި މައުޟޫގެ މައްޗަށް ކަމަށް މައުމޫން ފައުންޑޭޝަނުން ވަނީ މަޢުލޫމާތު ދެއްވާފައެވެ.
މިރޭގެ ފޯރަމްގައި ވެސް ވީހާ ވެސް ގިނަ ބޭފުޅުން ބައިވެރިވެވަޑައިގަތުމަށް މައުމޫން ފައުންޑޭޝަނުން ވަނީ ދަޢުވަތު އަރުވާފައެވެ.