އޭޝިއަން ކަޕް ކޮލިފައިންގެ ފުރަތަމަ މެޗުން ރާއްޖެ ބަލިވެއްޖެ

ސައުދީ އަރަބިއްޔާގައި 2027 ވަނަ އަހަރު ބާއްވާ އޭޝިއަން ކަޕަށް ކޮލިފައިންގައި ރާއްޖެ ކުޅުނު ފުރަތަމަ މެޗުން ބަލިވެއްޖެއެވެ.

ފިލިޕީންސްއާ ދެކޮޅަށް އެ ޤައުމުގެ ނިއު ކްލާކް ސިޓީ އެތުލެޓިކްސް ސްޓޭޑިއަމްގައި ކުޅުނު މި މެޗުން ރާއްޖެ ބަލިވީ 4-1 އިންނެވެ.

މެޗުގައި ފުރަތަމަ ލީޑު ނެގީވެސް ފިލިޕީންސްއެވެ. އެ ޓީމުގެ ޑިފެންޑަރު ޖެފަސަން ޓަބީނާސް ވަނީ މެޗުގެ 6 ވަނަ މިނެޓުގައި، ރާއްޖޭގެ ޕެނަލްޓީ އޭރިއާ ތެރެއަށް ނެގި ކޯނަރެއްގެ ބޭނުން ހިފައި ބޮލުން ބޯޅަ ގޯލުގެ ތެރެއަށް ފޮނުވާލާފައެވެ. އަދި އެއަށްފަހު ފިލިޕީންސްއިން ދެ ވަނަ ލަނޑު ޖެހީ މެޗުގެ 19 ވަނަ މިނެޓުގައި، އެ ޓީމުގެ ފޯވާޑް، ބިޔޯން މާޓިން ކްރިސްޓެންސަންއެވެ.

ރާއްޖެ ޓީމުން ފުރަތަަމަ ގޯލު ޖެހީ ދެވަނަ ހާފުގައެވެ. މިއީ ފޭދޫ އިއްބެ އާއި ހުސެއިން ސިފާއު ޔޫސުފް (ކުރޯ)ގެ ކޮމްބިނޭޝަނަކަށް ފަހު، މެޗުގެ 62ވަނަ މިނެޓުގައި އަލީ ފާސިރު (ސެންޓޭ) ޖެހި ގޯލެކެވެ. ކުރޯ ނަގައިދިން ބޯޅަ އޭރިއާތެރެއިން ހޯދުމަށް ފަހު ސެންޓޭ ވަނީ ގޯލުގެ ކަނަށް ފޮނުވާލާފައެވެ. މީގެ ހަތަރު އަހަރު ކުރިން ރާއްޖޭން ފިލިޕީންސްއާ ދެކޮޅަށް ކުޅުނު މެޗުގައި ފިލިޕީންސް ކޮޅަށް ލަނޑު ޖެހީ ސެންޓޭއެެެވެ.

ފިލިޕީންސްގެ ފަހު ދެ ގޯލު ޖެހީ މެޗު ނިމެން ކައިރިވެފައި ވަނިކޮށެވެ. އެގޮތުން މެޗު ނިމެން 13 މިނެޓަށްވެފައި ވަނިކޮށް ތިން ވަނަ ގޯލު ޖެހީ ރެންޑީ ޝްނައިޑާއެެވެ. އަދި މެޗުގެ އިތުރު ވަގުތުގައި އެ ޓީމުގެ ފަހު ގޯލު ކާމިޔާބުކުރީ ސަންޑްރޯ ރެޔެސްއެވެ.

މި ގްރޫޕްގައި ތަޖިކިސްތާނާއި ޓީމޯރ ލާސްޓޭ ބައްދަލުކުރި 1-0 އިން ކާމިޔާބުކުރީ ތަޖިކިސްތާނެވެ.

އެހެންކަމުން މިވަގުތު ގްރޫޕްގެ އެއްވަނައިގައި އޮތީ ފިލިޕީންސްއެވެ.