ރަށްވެހި އާސާރުތައް އުފައްދައި ހިންގުމުގެ ޤާބިލްކަން ލިބިފައިވާ މީހުން ރާއްޖޭގެ ހުރިހައި ރަށެއްގައި ތިބުން މުހިންމު: ވަޒީރު އާދަމް ނަސީރު

އަމިއްލައަށް ދާރުލްއާސާރުތައް ނުވަތަ ރަށްވެހި އާސާރުތައް އުފައްދައި ހިންގުމުގެ ޤާބިލްކަން ލިބިފައިވާ މީހުން ރާއްޖޭގެ ހުރިހައި ރަށެއްގައި ތިބުން މުހިންމު  ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ. 

ވަޒީރު އާދަމް ނަސީރު މިހެން ވިދާޅުވީ ހއ.ކެލާ ރަށްވެހި އާސާރު ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ވަޒީރު އާދަމް ނަސީރު ވިދާޅުވީ އަމިއްލައަށް ދާރުލްއާސާރުތައް ނުވަތަ ރަށްވެހި އާސާރުތައް އުފައްދައި ހިންގުމުގެ ޤާބިލްކަން ލިބިފައިވާ މީހުން ރާއްޖޭގެ ހުރިހައި ރަށެއްގައި ތިބުން މުހިންމު ކަމަށާއި ކުރިޔަށް އޮތްތާނގައި އެ ރޮނގުން ޚާއްޞަ ތަމްރީނު ޕްރޮގްރާމުތަކެއް ހިންގަވާނެ ކަމަށެވެ.

މީގެއިތުރުން ވަޒީރު ވިދާޅުވީ ރަށްވެހި އާސާރުތައް އުފައްދައި ހިންގުމުގެ ޤާބިލުކަން މުޅި ރާއްޖެއަށް ފޯރުކޮށްދިނުމުގެ ޢިލްމީ ތަމުރީނުތަކެއް މި އަހަރު ހިންގަން ފެށޭނެކަމަށެވެ.

 ވުޒާރާގެ ސްޓްރެޓީޖިކް އެކްޝަން ޕްލޭންގައި ހިމެނިފައިވާ ރަށްވެހި އާސާރުތައް ބިނާކުރުމުގެ އަމާޒު ޙަޤީޤަތަކަށް ހެދުމަށް ޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވައިފައިވާ ދިވެހި ނެޝަނަލް އައިޑެންޓިޓީގެ މަފްހޫމުތަކާ އެއް ގޮތަށް، ދާރުލްއާސާރުތައް އެކަށައެޅުމާއި ބެލެހެއްޓުމުގެ ފަންނީ އަދި ޢިލްމީ ޤާބިލުކަން މުޅި ރާއްޖެއަށް އާންމުކުރަން ޖެހޭކަން ވަޒީރު ފާހަގަކުރައްވައި އިތުރު ތަފުސީލު ދެއްވިއެވެ.

އެކިއެކި ސަފީރުންނާއި، އެކިއެކި ޤައުމުތަކުގެ ކަމާބެހޭ އިސްފަރާތްތަކާ އެކު ކުރެވުނު މަޝްވަރާތަކުން މި ތަމުރީނުތައް ފޯރުކޮށްދިނުމުގެ އަމަލީ މަސައްކަތްތައް ފެށުމަށް ފުރުސަތު ފަހިވެފައިވާކަން ވަޒީރުވަނީ ފާހަގަ ކުރަށްވާފައެވެ. 

މިގޮތުން މިދިޔަ އަހަރު މިކަމާ ގުޅޭ ދާއިރާއިން ވުޒާރާގެ ބޭފުޅުން ބައެއް ތަމްރީނުތައް ފުރިހަމަކޮށްފައިވާ ކަމަށާއި މިއަހަރުވެސް ތަމުރީނުތަކަށް ފުރުޞަތު ލިބިފައި ވާ ކަން ވަޒީރު ވަނީ ފާހަގަކުރަށްވާފައެވެ.

 މި ގޮތުން އަންނަ އޭޕްރީލް މަހު 17ގައި މިކަމާ ގުޅުން ހުރި ތަމުރީނުތައް ހޯއްދެވުމަށް މި ވުޒާރާގެ ދެ މުވައްޒަފުން ޗައިނާއަށް ފުރުމަށް ވަނީ ހަމަޖެހިފައިވާކަމަށްވެސް ވަޒީރު އާދަމް ނަސީރު ވިދާޅުވިއެވެ.

 މި ތަމުރީނުތައް ފުރިހަމަކުރުމަށް ފަހު ކުރިއަށް އޮތް 3 މަސް ދުވަސް ތެރޭގައި ޢިލްމީ ތަމުރީނު ކޯސްތައް މުޅި ރާއްޖެއަށް ހިންގަން ފެށޭނެގަކަމުގައި ވަޒީރު ވިދާޅުވިއެވެ.

މި ރަސްމިއްޔާތުގައި އިތުރަށް ވާހަކަ ދައްކަވަމުން ވަޒީރު ވިދާޅުވީ މި މަސައްކަތުގެ އިތުރުން ވުޒާރާގެ ސްޓްރެޓެޖިކް އެކްޝަން ޕްލޭންގައިވާ ގޮތަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެ ތަރިކަ އިޢާދަކުރުމުގެ ޤައުމީ މަޝްރޫޢުގެ ދަށުން ކޮންމެ ރަށެށްގައި ވެސް ފަރުދީފެންވަރުގައްޔާއި، ޖަމާއަތުގެ ފެންވަރުގައްޔާއި އަދި ރަށުފެންވަރުގައި އެކި ބާވަތުގެ އާސާރުތައް ތަޢާރަފުކުރުމުގެ ޤާބިލުކަން އުފެއްދުމަކީ ކުރަައްވާނެ މަސައްކަތެއްކަމުގައެވެ.