ޚަބަރު
ގިނަ ރަށްތަކެއްގެ ކައުންސިލްތައް އިމާރާތް ކޮށްދޭނެ ފަރާތްތަކެއް ހޯދަނީ

ހއ. އުލިގަމުގެ ބިންގާ އެޅުން، ފޮޓޯ: ރައީސް އޮފީސް
ގިނަ ރަށްތަކެއްގެ ކައުންސިލްތައް އިމާރާތްތައް ކޮށްދޭނެ ފަރާތްތަކެއް ހޯދުމަށް އެ ރަށްރަށުގެ ކައުންސިލްތަކުގައި ދަންނާވާފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
އެގޮތުން ވަޒީރު ވިދާޅުވީ، 6 އަތޮޅެއްގެ ރަށްތަކުގެ ކައުންސިލްތައް އިމާރާތް ކޮށްދޭނެ ފަރާތްތައް ހޯދުމުގެ މަސައްކަތް ކުރިޔަށް ގެންދެވެމަށް ދަންނަވާފައިވާނޭކަމަށެވެ. މީގެ ތެރޭގައި ހިމެނެނީ ހއ، ހދ، ށ، ނ، ރ އަދި ދ އަތޮޅުގައި އިމާރާތްކުރާ ކައުންސިލް އިދާރާތަކެވެ.
ރާއްޖޭގައި ހާލަތު ދަށްކޮށް ހުރި 55 ރަށެއްގެ ކައުންސިލް އިމާރާތް ހެދުމަށް ސަރުކާރުން ނިންމާފައިވާއިރު، އެ ކައުންސިލްތަކުގެ މަސައްކަތް މިއަހަރުގެ ތެރޭގައި ފެށޭނެ ކަމަށާއި، އަމާޒަކީ ކުރިއަށްއޮތް ދެ އަހަރާ ހަމަސް ދުވަހުގެ ތެރޭގައި އެ މަސައްކަތް އެއްކޮށް ނިންމާލުން ކަމަށް ވަޒީރު އާދަމް ޝަރީފްވަނީ މީގެ ކުރިން ވިދާޅުވެފައެވެ. އަދި މިހާތަނަށް 13 ކައުންސިލް އިދާރާއެއްގެ ބިންގާ ވަނީ އަޅާފައެވެ.
މީގެ އިތުރުން، ކޮންޓްރެކްޓަރ ފައިނޭންސް އުސޫލުން 55 ރަށެއްގެ ކައުންސިލް އިމާރާތްކުރުމަށް މެލޭޝިއާގެ ކުންފުންޏެއް ކަމަށްވާ، ހެކްސްޓަރ ގްލޯބަލްއާ ވެސް މި އަހަރުގެ ޖެނުއަރީ މަހު ވަނީ ހަވާލުކޮށްފައެވެ.
ސަރުކާރުގެ އަމާޒަކީ ހާލަތު ދަށްކޮށް ހުރި ހުރިހާ ރަށެއްގެ ކައުންސިލް އިދާރާތަކަށް މިދައުރުގެ ތެރޭގައި އައު އިމާރާތްތައް ޤާއިމުކޮށްދެއްވުމެވެ. ރަށްރަށުގެ ކައުންސިލްތަކުގެ ޖާގައިގެ މައްސަލަ ހައްލުކޮށްދެއްވުމަށް ސަރުކާރުން ފައްޓަވާފައިވާ މަސައްކަތުގެ ދަށުން 105 ރަށެއްގެ ކައުންސިލް އިމާރާތްކުރުމަށް މިހާތަނަށްވަނީ އިޢުލާންކޮށްފައެވެ. މި 105 ރަށުގެ މަސައްކަތް ނިމޭއިރު، ޖުމްލަކޮށް %70 ކައުންސިލްގެ ޖާގައިގެ މައްސަލައަށް ހައްލު ލިބޭނެކަމަށް ސަރުކާރުން ވިދާޅުވެއެވެ.