ބޮޑު ތަފާތަކުން ބްރެޒިލް ބަލިކުރުމަށްފަހު އާޖެންޓީނާ ވޯލްޑްކަޕަށް ކޮލިފައިވެއްޖެ

ބޮޑު ތަފާތަކުން ބްރެޒިލް ބަލިކުރުމަށްފަހު، އެންމެ ފަހުގެ ޗެމްޕިއަން އާޖެންޓީނާ ވޯލްޑްކަޕަށް ކޮލިފައިވެއްޖެއެވެ. 

ދެކުނު އެމެރިކާގެ ކޮލިފިކޭޝަން ބުރުގައި، ބޮއިނިސް އައިރިސްގެ މޮނިއުމެންޓަލް ސްޓޭޑިއަމްގައި ބްރްޒިލްއާ ދެކޮޅަށް ކުޅުނު މެޗު އާޖެންޓީނާއިން ކާމިޔާބުކުރީ 4-1 އިންނެވެ. މި މެޗަށް ނިކުތްއިރު ވޯލްޑް ކަޕަށް ކޮލިފައިވުމަށް އާޖެންޓީނާއަށް ބޭނުންވެފައި އޮތީ އެންމެ ޕޮއިންޓެކެވެ. 

ނަމަވެސް މި މެޗަށް ނިކުތްއިރު އާޖެންޓީނާއަށް އޮތް ނުތަނަވަސްކަމަކީ، އަނިޔާގެ ސަބަބުން އެ ޓީމުގެ ކެޕްޓަން ލިއޮނެލް މެސީއަށް ނުކުޅެވުމެވެ. ނަމަވެސް އެކަމަކުން އެ ޓީމުން ނެރެފައިވާ ނަތީޖާއަށް ތަފާތެއް ނައެވެ.

މި ނަތީޖާއާއެކު، ކޮލިފައިންގައި މިހާތަނަށް ކުޅުނު 14 މެޗުން އާޖެންޓީނާއަށް ވަނީ 31 ޕޮއިންޓު ލިބިފައެވެ. މި ގްރޫޕްގެ ދެވަނައިގައި 23 ޕޮއިންޓާއެކު އެކުއެޑާ އޮތްއިރު، ބްރެޒިލް، އުރުގުއޭ އަދި ޕެރަގުއޭއަށް ލިބިފައިވަނީ 21 ޕޮއިންޓެވެ.

ރޭގެ މެޗުގައި އާޖެންޓީނާއަށް މެޗުގެ 4 ވަނަ މިނެޓުގައި ލީޑު ނަގައިދިނީ ހޫލިއަން އަލްވަރޭޒްއެވެ. އަދި އޭގެ 8 މިނެޓު ފަހުން އެންޒޯ ފެނާންޑޭޒް ވަނީ އެ ޓީމަށް ލީޑު ފުޅާކޮށްދީފައެވެ. 

މެޗުގެ 26 ވަނަ މިނެޓުގައި ބްރެޒިލްގެ މެތިއުޒް ކޫނާ އެ ޓީމަށް ގޯލެއް ޖަހައިދިން ނަމަވެސް، ފުރަތަމަ ހާފު ނިމުމުގެ ކުރިން އާޖެންޓީނާއިން ވަނީ އަނެއްކާ ވެސް އެ ޓީމުގެ ލީޑު ދެ ގޯލަށް ފުޅާކޮށްފައެވެ. މި ގޯލު ކާމިޔާބުކުރީ އެންޒޯ ފެނާންޑޭޒްގެ އެސިސްޓަކުން އެލެކްސިސް މެކަލިސްޓާއެވެ.

އާޖެންޓީނާގެ ފަހު ގޯލު ކާމިޔާބުކުރީ މެޗުގެ 71 ވަނަ މިނެޓުގައި ޖިލާނޯ ސިމިއޯނީއެވެ.

ދެކުނު އެމެރިކާގެ ކޮލިފައިންގައި މިއަދު ކުޅުނު އެހެން މެޗުތަކަށް ބަލާއިރު ޗިލީ އާއި އިކުއެޑޯ ބައްދަލުކުރި މެޗު ނިމިފައިވަނީ ލަނޑެއް ނުޖެހި ދެ ޓީމު އެއްވަރުވެގެންނެވެ. އަދި ޕެރޫ އަތުން 1-0 ގެ ނަތީޖާއަކުން ވެނެޒުއޭލާ މޮޅުވެފައިވާއިރު ކޮލަމްބިއާ އާއި ޕެރަގުއޭ ބައްދަލުކުރި މެޗު ނިމިފައިވަނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ.