އިޒްރާއިލް ސިފައިން މަންމައަކާއި އޭނާގެ 6މަހުގެ ދަރިފުޅު ހިމެނޭހެން 12 މީހަކު ޝަހީދުކޮށްލައިފި

އިޒްރާއިލް ސިފައިން ފަލަސްޠީނުގެ މަންމައަކާއި އޭނާގެ 6މަހުގެ ތުއްތު ދަރިފުޅު ހިމެނޭހެން 12 މީހަކު ޝަހީދުކޮށްލައިފިއެވެ.

މިއަދުގެ ހެނދުނު ހެނދުނާ ދިން ހަމަލާގައި ޝަހީދުވި މީހުންގެ ތެރޭގައި އިތުރު ހަތަރު ކުދިންވެސް ހިމެނޭކަމަށް އަލްޖަޒީރާގައި ބުނެފައިވެއެވެ. މިއީ ޖަބަލިއްޔާއަށް ދިން ހަމަލާއެއްގައި ޝަހީދުވި ބައެއް ކަމަށް އަލްޖަޒީރާގައި ރިޕޯޓު ކޮށްފައިވެއެވެ. 

 ރޭ އިޒްރާއިލް ސިފައިން ވަނީ ޣައްޒާގެ މެދުތެރެއާއި އުތުރުގެ އާބާދީ ގިނަ ސަރަހައްދުތަކަށް ބޮން އަޅާފައެވެ. އެގޮތުން އުތުރުގައި އިޒްރާއީލުގެ އަސްކަރީ މަތިންދާބޯޓުތައް ވަނީ ގިނަ ޢަދަދެއްގެ އާންމުން ބޯހިޔާވަހިކަން ހޯދަމުންދިޔަ ގެއަކަށް އަމާޒުކޮށް ބޮންއާޅައިފައެވެ. މި ހަމަލާގެ ސަބަބުން އަށެއްކަ މީހުން ޝަހީދުވެފައިވާކަމަށް އަލްޖަޒީރާގައި ބުނެފައިވެއެވެ. 

ރޭ އިޒްރާއިލްގެ ޢަސްކަރިއްޔާއިން ދިން ހަމަލާތަކުގައި ޝަހީދުވިމީހުންގެ ހަށިތަކަށް ވެފައިހުރި ގޮތް ޣައްޒާގައި ހުންނަ އިންޑޮނޭޝިއާގެ ހޮސްޕިޓަލުގެ އެތެރޭގެ ފުޓޭޖްތަކުން ފެނިިގެންދެއެވެ. އެގޮތުން ހަމަލާތަކުގައި ޝަހީދުވި ތުއްތު ކުއްޖެއްގެ ހަށިގަނޑު ދެބައިވެފައިވަ މަންޒަރާއި ޝަހީދުވި އެހެންމީހުންގެ ހަށިތަށް ރަޖާތަކަށް ލާ އޮޅާފައިވާ މަންޒަރުތައް ދައްކުވައިދެއެވެ.

މީގެއިތުރުން ޣައްޒާގެ މެދުތެރޭގައި އޮންނަ ބުރެއިޖީ ރެފިޔުޖީ ކޭމްޕަށް އަމާޒުކޮށް ހަމަލާދީފައިވެއެވެ. މިހަމަލާގައި މި ހަމަލާގައި ފަލަސްތީނުގެ އެއް ކުއްޖަކު ޝަހީދުވެ، އިތުރު ބައެއް ކުދިން ޒަޚަމްވެ ފަރުވާދެވެމުންދެއެވެ.

އިޒްރާއީލާއި ހަމާސްއާ ދެމެދު ކުރިއަށްދާ ހަމަލާބަދަލުކުރުންތައް ހުއްޓާލުމުގެ މަޝްވަރާތަކުގައި އެއްވެސް ކުރިއެރުމެއް ލިބިފައި ނުވާތީ މުޅި ޣައްޒާގައި ވަނީ ބިރުވެރިކަން ވަށައިލައިފައެވެ. 

މީގެއިތުރުންވެސް ޣައްޒާގެ އެކިތަންތަނަށް އިޒްރާއިލްގެ ޢަސްކަރިއްޔާއިން ދަނީ ހަމަލާތައް ދެމުންނެވެ.