ޚަބަރު
ގަނެވިއްކުން މަނާކުރި ކޮފްސީ ސިރަޕް ވިއްކަން އަލުން ހުއްދަދީފި!
ކޮފްސީ ސިރަޕް.ފޮޓޯ: ގޫގުލް
މޯލްޑިވްސް ފުޑް އެންޑް ޑްރަގް އޮތޯރިޓީ(އެމްއެފްޑީއޭ) އިން ގަނެ ވިއްކުން މަނާ ކުރި ކޮފްސީ ސިރަޕް ވިއްކަން އަލުން ހުއްދަދީފިއެވެ.
މިކަމާ ގުޅިގެން އެމްއެފްޑީއޭ އިން ނެރުނު އިޢުލާނެއްގައި ބުނެފައިވަނީ މި ބޭހުގެ މާކެޓުން ލިބެން ހުރި ބެޗްތަކުގެ ސާމްޕަލް ނަގައި އިތުރަށް ޓެސްޓްކޮށް ބަލަން ޖެހޭ ބެލުންތައް ބެލުމަށްފަހު ބޭހުގައި މައްސަލައެއް ނެތްކަން ފާހަގަވެފައިވާ ކަމަށެވެ.
އެހެންކަމުން، އެމްއެފްޑީއޭއިން ވަނީ މިއަދުން ފެށިގެން، ކުރިއެކޭ އެއްގޮތަށް މި ބޭސް އިމްޕޯޓްކުރުމާއި، ވިއްކުމާއި، ބޭނުންކުރުމުގެ ހުއްދަ ދީފައެވެ.
ކޮފްސީ ސިރަޕް ވިއްކުން މަނާ ކުރީ ކޮފްސީ ސިރަޕުން ކުޑި ކޮޅުތަކެއް ހުންނަކަން ފާހަގަވެފައިވާތީއެވެ. އެމި މައްސަލަ އޮތޯރިޓީން ބެލުމަށްފަހު ވަކި ގޮތެއް އަންގަންދެން އެ ބޭސް ރާއްޖެ އެތެރެކުރުމާއި ވިއްކުމާއި ބޭނުންކުރުމަކީ މަނާ ކަމެއް ކަން ވަނީ ހާމަކޮށްފައެވެ. މި ބޭހަކީ އިންޑިޔާގެ އެމްއެމްސީ ހެލްތުކެއަރގެ ބޭހެކެވެ.
