މާލޭގެ ހުކުރު މިސްކިތުގެ ގޯތިތެރެ ޒީނަތްތެރި ކުރަން ސަރުކާރާއެކު މަޝްވަރާ ކުރައްވާނަން: މޭޔަރ ޢާޒިމް

މާލޭގެ ހުކުރު މިސްކިތުގެ ގޯތިތެރެ ޒީނަތްތެރިކުރުމަށް ސަރުކާރާއެކު މަޝްވަރާ ކުރައްވާނެކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.

 މާލެ ސިޓީގެ މޭޔަރ އާދަމް ޢާޒިމް މިފަދައިން ވިދާޅުވީ، މާލެ ސިޓީގައި ހުރި މިފަދަ އާސާރީ ތަންތަނުގެ ޙާލަތު ދެނެގަތުމަށް ކުރައްވަން ފައްޓަވާފައިވާ ޒިޔާރަތުގެ ތެރެއިން، މާލޭގެ ހުކުރު މިސްކިތަށް ކުރެއްވި ޒިޔާރަތުގެއަވެ.

މި ޒިޔާރަތުގައި މޭޔަރ ވިދާޅުވީ، މާލޭގެ ހުކުރު މިސްކިތުގެ ގޯތިތެރެ ޒީނަތްތެރިކުރުމަށް އަދުގެ ސަރުކާރާއެކު މަޝްވަރާ ކުރައްވާނެ ކަންތައްތަކެއް ފާހަގަކުރައްވާފައިވާ ކަމަށެވެ. ހަމަ އެހެންމެ، މާލެއަކީ މި ސަރަޙައްދުގައި އޮތް އެންމެ ގިނަ ދުވަސްވީ ވެރިކަމެއް ކުރާ އަދި އެންމެ ޤަދީމީ ރަށްކަން މޭޔަރ ވަނީ ފާހަގަކުރައްވާފައެވެ. އެހެންކަމުން، މާލޭގައި ހުރި ސަޤާފީ މާއްދީ ތަރިކަ ރައްކާތެރިކޮށް އަންނާން އޮތް ޖީލުތަކަށް ގެންގޮސް ދިނުމަކީ ކޮންމެހެން ވެސް ކުރަންޖެހިފައިވާ މުހިންމު މަސައްކަތެއްކަމަށް މޭޔަރ ޢާޒިމް ވަނީ ވިދާޅުވެފައެވެ.

މީގެ އިތުރުން މޭޔަރ ޢާޒިމް ވިދާޅުވީ، ހުކުރު މިސްކިތުގެ ގޯތިތެރެ ޒީނަތްތެރި ކުރުމުގެ ގޮތުން، މިސްކިތުގެ ގޯތިތެރޭގައި ގަސް އިންދުމާއި، މިސްކިތުގެ ގޯތިތެރެ ސާފުކޮށް ބޭއްވުމަށް ދިވެހި ބަހާއި ސަޤާފަތާއި ތަރިކައާ ބެހޭ ވުޒާރާއާއެކު މުހިންމު މަޝްވަރާތަކެއް ކުރައްވާނެ ކަމަށެވެ. އަދި މި މިސްކިތަކީ ދިވެހީންގެ އިސްލާމީ ވަޙުދަތު އަދި ޖީލުތަކަށް ދެމިގެން އައިސްފައިވާ ދީނީ ތާރީޚަށް ހެކިދޭ  މުހިންމު އަދި ޚާއްޞަ ބިނާއެއްކަން މޭޔަރ ވަނީ ފާހަގަކުރައްވާފައެވެ. ހަމަ އެހެންމެ، މިސްކިތުގައި ކޮށްފައިވާ ހިރިގަލު ވަޑާމާއި ލިޔެލާޖަހައި ލާފެންކޮށްފައިވާ ލަކުޑީގެ މަސައްކަތަކީ، ދިވެހި ފަންނުވެރިކަމުގެ ފުރިހަމަ ނަމޫނާއެއްކަމަށް މޭޔަރ ވަނީ ވިދާޅުވެފައެވެ.

މާލޭގެ ހުކުރު މިސްކިތަކީ، ރާއްޖޭގެ ރައްޔިތުންނަށް މާތްވެގެންވާ އިސްލާމް ދީނުގެ ޙިދާޔަތު ހޯއްދަވައި ދެއްވި، ދަރުމަވަންތަ ރަސްގެފާނު ބިނާކުރައްވި މިސްކިތެކެވެ. މި މިސްކިތުގެ މިހާރުގެ ޙާލަތު ބައްލަވައި ލެއްވުމަށް މޭޔަރ ޢާޒިމް ކުރެއްވި ޒިޔާރާތުގައި،  ހުޅުމާލެ ދައިރާގެ ކައުންސިލަރު ޢަލީ އައިމަނާއި، މާލެ ސިޓީ ކައުންސިލްގެ ބައެއް އިސްވެރިން ވަނީ ބައިވެރިވެވަޑައިގެންފައެވެ.