ތިލަމާލެ ބުރިޖުގެ ބޮޑުބައެއް ނިމިއްޖެ

ގްރޭޓަރ މާލޭ އޭރިއާގެ ތަރައްޤީއާއި ގުޅިފައިވާ ބިޔަ މަޝްރޫޢު، ތިލަމާލެ ބުރިޖުގެ ބޮޑުބައެއް ނިމިއްޖެއެވެ.

އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ހާމަކޮށްފައިވާ ގޮތުގައި މިހާރު ވަނީ އެ ބްރިޖުގެ 52.44% މަސައްކަތް ނިމިފައެވެ. އެ ވުޒާރާއިން ހާމަކޮށްފައިވާ ގޮތުގައި މިހާރު ކުރިޔަށްދަނީ ޕައިލް ކެޕް، ޕިއަރ ކޮލަމްސް އެޅުމުގެ މަސައްކަތާއި އަދި ސުޕަރ ސްޓްރަކްޗަރގެ ސެގްމެންޓްސް ލޯންޗް ކުރުމުގެ މަސައްކަތެވެ.

އިޤްތިޞާދީ އަދި އިޖުތިމާޢީ އެތައް ބަދަލަކާއި ގުޅިފައިވާ މިމަޝްރޫޢުގެ މަސައްކަތް ނިންމާ ސަރުކާރާ ހަވާލުކުރުމަށް ކަނޑައަޅައިފައިވަނީ އަންނަ އަހަރުގެ ސެޕްޓެމްބަރުގެ ނިޔަލަށެވެ. 

ތިލަމާލެ ބުރިޖު ނިމޭއިރު، އެ ބްރިޖުގެ ދިގު މިނުގައި 6.7 ކިލޯމީޓަރު ހުންނާނެއެވެ. އަދި މި ބްރިޖުގެ މަސައްކަތަށް މިހާތަނަށް ޖީ.އެސް.ޓީ ނުހިމެނޭހެން 251,563,940.20 (ދުއިސައްތަ ފަންސާސް އެއް މިލިޔަން ފައްސަތޭކަ ފަސްދޮޅަސް ތިންހާސް ނުވަސަތޭކަ ސާޅީސް ޑޮލަރު ވިހި ސެންޓް) ޑޮލަރު ޚަރަދުވެފައިވާކަމަށް ވެސް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ވަނީ ހާމަކޮށްފައެވެ.

މި މަސައްކަތް ރާވާފައިވާ ގޮތުން، މާލެއިން ގުޅިފަޅަށް ގުޅާލާ ނިމޭނީ އަންނަ އަހަރުގެ މާރިޗު މަހެވެ. އަދި އެއަށްފަހު ގުޅުފަޅުން ތިލަފުއްޓަށް ގުޅާލުމުގެ މަސައްކަތް ނިންމޭނީ އަންނަ އަހަރުގެ ސެޕްޓެންބަރު މަހެވެ. މިއާއެކު މުޅި މަޝްރޫޢު ނިމޭނެކަމަށް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026 އަށް ކަމަށް އިމާރާތްކުރުމާއި ބިނާރާބެހޭ ވުޒާރާއިން ވިދާޅުވެއެވެ.