ޚަބަރު
އިމިގްރޭޝަންގެ ކުރީގެ ކޮންޓްރޯލަރު ބަންދުކުރި މައްސަލަ އިސްތިއުނާފަށް ހައިކޯޓަށް ހުށައަޅައިފި

އިމިގްރޭޝަންގެ ކުރީގެ ކޮންޓްރޯލަރު ޝަމްއާން ވަހީދް/ފޮޓޯ: މޯލްޑިވްސް އިމިގްރޭޝަން
މޯލްޑިވްސް އިމިގްރޭޝަންގެ ކޮންޓްރޯލަރ ޖެނެރަލްގެ މަޤާމުގައި ހުންނަަވަނިކޮށް އެ މަޤާމުން ވަކިކުރި މުޙައްމަދު ޝަމްޢާން ވަޙީދު ބަންދުކުރި މައްސަލައިގެ އިސްތިއުނާފަށް ހައިކޯޓަށް ހުށައަޅައިފިއެވެ.
ދިވެހިރާއްޖޭގެ ހައިކޯޓުގެ ރަޖިސްޓްރީ އިން ދައްކާގޮތުގައި، ޝަމްޢާން ބަންދުކުރި މައްސަލަ އިސްތިއުނާފު ކުރުމަށް އެކޯޓަށް ހުށައަޅާފައިވަނީ އިއްޔެގެ ވަޤުތެއްގައެވެ.
އިމިގްރޭޝަންގެ ކޮންޓްްރޯލަރ ޖެނެރަލްގެ މަޤާމުން ޝަމްޢާން ވަކިކޮށްފައިވަނީ މިމަހުގެ 21 ވަނަ ދުވަހުގެ ރޭގައެވެ. އަދި މިމަހުގެ 22 ވަނަ ދުވަހުގެ ރޭ ކޯޓު އަމުރެއްގެ ދަށުން 15 ދުވަހުގެ މުއްދަތަކަށް އިތުރު ތަޙުޤީޤަށް ޝަމްޢާން ވަނީ ބަންދުކޮށްފައެވެ. ފުލުހުން ޝަމްޢާން ހައްޔަރުކުރީ، މޯލްޑިވްސް އިމިގްރޭޝަންގެ ބައެއް މުވައްޒަފުން މަޤާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރިންގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައަކާއި ގުޅިގެން ކޯޓު އަމުރެއްގެ ދަށުންނެވެ.
މި މައްސަލައާ ގުޅިގެން ފުލުހުން ކުރިން ނެރުނު ނޫސް ބަޔާނުގައި ވަނީ، ޤަވާއިދާއި ޚިލާފަށް އުޅެމުންދާ ބިދޭސީން ހޯދާ ޑިޓެއިންކުރުމުގެ ޒިންމާ އާންމުކޮށް އަދާކުރަމުންދާ ޓާސްކް ފޯރސް އަދި ރިސްކު މެނޭޖްމަންޓް ސެކްޝަނުގެ މުވައްޒަފުން ނޫން އިމިގްރޭޝަންގެ އެހެން ސެކްޝަންތަކުގައި މަސައްކަތްކުރާ މުވައްޒަފުންތަކެއް އެ މުވައްޒަފުންގެ މަގާމުގެ ނުފޫޒު ނަހަމަގޮތުގައި ބޭނުންކޮށްގެން، ބިދޭސީ މަސައްކަތްތެރިން ދިރިއުޅޭ ގެއެއް ބަލައި ފާސްކޮށް، އަދި އެ ގެއިން ބިދޭސީއަކު ގިނަ އަދަދެއްގެ ނަގުދު ފައިސާއާއެކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށެވެ.
މި މައްސަލާގައި ޝަމްޢާންގެ އިތުރުން، އިމިގްރޭޝަންގެ 3 އޮފިސަރަކު ވަނީ ހައްޔަރުކޮށްފައެވެ. ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި މީގެ ތެރެއިން 2 މީހަކު 10 ދުވަހަށް ބަންދު ކުރުމަށް، އަދި އެކަކު 3 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ.