އިސްރާއީލުން ދިން ހަމަލާއެއްގައި ޣައްޒާގެ ތަރުޖަމާނެއް ޝަހީދުކޮަށްލައިފި

ނިރުބަވެރި ޔަހޫދީ އިސްރާއީލުން ދިން ޙަމަލާއެއްގައި ޣައްޒާގެ ތަރުޖަމާނެއް ކަމަށްވާ އަބްދުލް ލަތީފް އަލް ޤަނޫއާ ޝަހީދުކޮށްލައިފިއެވެ.

އިސްރާއީލުން އަބްދުލް ލަތީފް އަލް ޤަނޫއާ ޝަހީދުކޮށްލާފައިވަނީ، ޣައްޒާގެ އުތުރުގައި އޮންނަ ޖަބާލިއާ އަލް ބަލާދުގައި ހުންނަ ޓެންޓަށް އިސްރާއީލުން ދިން ޙަމަލާއެއްގައެވެ.

އަބްދުލް ލަތީފް އަލް ޤަނޫއާ އަކީ ހަމާސް އަށް ނިސްބަތްވާ މީހެކެވެ. ޔަހޫދީ އިސްރާއީލުން ޣައްޒާ އާއި އެކު އެކުލަވާލާފައިވާ އެއްބަސްވުން އުވާލާ، ފަލަސްޠީނުގެ އެކި ސަރަޙައްދުތަކަށް ވަނީ ޙަމަލާތައް ދޭން ފަށައިފައެވެ. އަދި އަލުން ޤަތުލުޢާންމު ފެށުމާއިއެކު ހަމާސްގެ ބައެއް އިސް ބޭފުޅުން ވަނީ ޝަހީދުކޮށްލާފައެވެ. އަބްދުލްލަތިފް އަލް ޤަނޫއާ އަކީ އިސްރާއީލުން ޣައްޒާގައި އަލުން މި ޙަމަލާތައް ފެށި ފަހުން އިސްރާއީލުން ޣައްޒާގައި ޝަހީދުކޮށްލި އެންމެ ފަހުގެ ހަމާސްގެ އިސް މީހާއެވެ.

ފަލަސްޠީނުގެ ޚަބަރުތައް ފޯރުކޮށްދޭ ޤުދުސް ނިއުސް ނެޓްވޯކުން ވަނީ ޤަނޫއާގެ ޝަހިދުވެފައިވާ ހަށިގަނޑު ފެންނަ ފޮޓޯއެއް ޢާންމުކޮށް އޭނާ ޝަހީދުވެފައިވާކަން ކަށަވަރުކޮށްދީފައެވެ. 

މި ހަފްތާގެ ތެރޭގައި އިސްރާއީލުން ހަމާސްގެ ހޮސްޕިޓަލަކާއި ޓެންޓަކަށް ދިން ހަމަލާއެއްގައި ހަމާސްގެ ޕޮލިޓިކަލް ބިއުރޯގެ ދެ މެމްބަރުން ކަމަށްވާ އިސްމާއިލް ބަރްހޫމް އާއި ސަލާހު އަލް ބަރްދަވީލް ވަނީ ޝަހީދުކޮށްލައިފައެވެ. އަދި މީގެ އިތުރުން ވެސް ހަމާސްގެ ޕޮލިޓިކަލް ބިއުރޯގެ ގިނަ މެންބަރުންތަކެއް އިސްރާއީލުން ވަނީ ޝަހީދުކޮށްލާފައެވެ. އެގޮތުން މީގެކުރިން ޝަހީދުކޮށްލާފައިވާ މެންބަރުންގެ ތެރޭގައި، އިސްމާއިލް ހަނިއްޔާ، ޔަހްޔާ ސިންވާރު، ސާލިހް އަލް އަރޫރީ، ރަވީ މުޝްތާހާ، ސަމޭހް އަލް ސައްރާހް، މަރުވާން އީސާ، ޒަކަރިއްޔާ މުއައްމަރު، ޖަމީލާ އަޝް-ޝާންތީ އަދި ޖަވާދު އަބޫ ޝަމްމަލާ ހިމެނެއެވެ.