ޅ. ކުރެންދޫގައި ފުލުހުންގެ ވޯކް އެންޑް ޓޯކް ހަރަކާތެއް ކުރިއަށް ގެންގޮސްފި

ޅ. ކުރެންދޫގައި ދިވެހި ފުލުހުންގެ ޚިދުމަތުން ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ.

ދިވެހި ފުލުހުންގެ ޚިދުމަތުން ވިދާޅުވީ، މި ހަރަކާތަކީ ރައްޔިތުންނާއި ގާތުން ބައްދަލުކޮށް މަޢުލޫމާތު ދިނުމުގެ މަޤްސަދުގައި ކުރިއަށްގެންދާ ހަރަކާތެއް ކަމަށެވެ. 

މި ހަރަކާތުގައި ޅ. ކުރެންދޫގެ ޕޮލިސް ސްޓޭޝަނުގެ ފުލުހުން ވަނީ އެ ރަށުގެ އެކި ސަރަޙައްދުތަކަށް ޒިޔާރަތްކުރައްވާ، ރައްޔިތުންނާއި ބައްދަލުކޮށް ތަފާތު މުހިންމު މަޢުލޫމާތުތަކެއް ދީފައެވެ. އެގޮތުން، ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުގެ މައުލޫމާތުތައް ރައްޔިތުންނާއި ހިއްސާކުރައްވާފައިވާ ކަމަށް ދިވެހި ފުލުހުންގެ ޚިދުމަތުން ވަނީ ވިދާޅުވެފައެވެ. ހަމަ އެހެންމެ، ސްކޭމްގެ މައްސަލަތަކުން ރައްޔިތުން ރައްކާތެރިވެތިބުމަށް ކުރެވިދާނެ ކަންތައްތައް ވެސް ހިއްސާކުރައްވާފައިވާ ކަމަށް ދިވެހި ފުލުހުންގެ ޚިދުމަތުން މަޢުލޫމާތުދެއެވެ.

މީގެ އިތުރުން، މި ހަރަކާތުގެ ދަށުން ރަށުގެ ފިހާރަތަކަށް ފުލުހުން ވަނީ ޒިޔާރަތްކޮށްފައެވެ. އަދި ފިހާރަތަކުގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވިދާނެ ކަންކަމުގެ މަޢުލޫމާތުތައް ވަނީ ހިއްސާކޮށްފައެވެ. ހަމަ އެހެންމެ، ފިހާރަތަކުގައި ހިނގާ  ވައްކަމާއި ފޭރުމުގެ މައްސަލަތަކުން ރައްކާތެރިވުމަށް ކުރެވިދާނެ ކަންކަން ފުލުހުން ވަނީ ކިޔާދެއްވާފައެވެ. އަދި މިފަދަ އެއްވެސް މައްސަލައެއް ހިނގައިފިނަމަ ވީ އެންމެ އަވަހަކަށް އެކަން ފުލުހުންނަށް ރިޕޯޓުކުރުމަށް ފުލުހުން ވަނީ އިލްތިމާސްކުރައްވާފައެވެ.

ދިވެހި ފުލުހުންގެ ޚިދުމަތުން ވަނީ ރާއްޖޭގެ އެކި ކަންކޮޅުތަކުގައި މީގެ ކުރިން ވެސް ވޯކް އެންޑް ޓޯކް ގެ ހަރަކާތްތަކެއް ހިންގައިފައެވެ. އަދި ކުރިއަށް އޮތް ދުވަސްތަކުގައި މި ހަރަކާތް އެކި ރަށްރަށުގައި ކުރިއަށްދާނެއެވެ.