އިޒްރާއިލްގެ ޢަސްކަރިއްޔާގެ ދަތިކުރުން ތަކާއި އެކުވެސް ރޭވެސް އަލްއަޤްޞާ މިސްކިތުގައި އެތައް ބަޔަކު ރޭއަޅުކަންތައް ކުރި

އިޒްރާއިލްގެ ޢަސްކަރިއްޔާގެ އެތަކެއް ދަތިކުރުން ތަކާއި އެކުވެސް ރަމަޟާންމަހުގެ 27 ވިލޭރޭގެ ރޭ އަޅުކަންތަކުގައި ފަލަސްޠީނުގެ އެތައް ހާސް ރައްޔިތުންނެއް ބައިވެރިވެއްޖެއެވެ.

އިޒްރާއިލްގެ ޢަސްކަރިއްޔާއިން އަލް އަޤްޞާ މިސްކިތައް އަރާ އަޅުކަން ކުރަން މަސައްކަތް ކުރާ ފަލަސްޠީނުގެ ރައްޔިތުންނަށް މީގެކުރިން ބޮޑެތި އަނިޔާތައް ދީފައިވެއެވެ. 

ރެޔަކީ ރަމަޟާން މަހުގެ 27 ވިލޭރޭ ކަމުގައިވިޔަސް އިޒްރާއިލުން ރޭވެސް ޣައްޒާގެ އެތަންމިތަނަށް ހަމަލާތައް ދީފައިވެއެވެ. އެގޮތުން އެހަމަލާތަކުގައި ރޭވެސް އަލްޖަޒީރާގެ ނޫސްވެރިޔަކަށް ހަމަލާދީ ޝަހީދުކޮށްލައިފައިވެއެވެ. 

މީގެއިތުރުންވެސް ޣައްޒާގެ އެކި ސަރަހައްދުތަކަށް ދިން އެކި ހަމަލާތަކުގައި 13 މީހަކު ޝަހީދުވެގެން ގޮސްފައިވެއެވެ. އޭގެ ތެރޭގައި ހިލެ ކާބޯތަކެތި ބަހާ ބަދިގެއަކަށް ދިން ހަމަލާއެއްވެ ހިމެނެއެވެ. 

އިޒްރާއިލުން ޣައްޒާއަށް ދިން ހަމަލާތަކުގައި ޝަހީދުވިމީހުންގެ ތެރޭގައި ފަލަސްޠީނުގެ ތަޢުލީމީ ދާއިރާގެ އިސް ދެބޭފުޅަކުވެސް ހިމެނެއެވެ. އޭގެ ތެރޭގައި މާޗް 23 ވަނަ ދުވަހު ދިން ހަމަލާއެއްގައި އެޑިއުކޭޝަން ޑިރެކްޓަރޭޓްގެ ސުޕަވައިޒަރީ ޑިޕާޓްމަންޓުގެ ވެރިޔާ ޖިހާދު އަލް އާޣާ އާއި އޭނާގެ އަންހެނުންނާއި ދަރިފުޅާއި ތިން އަންހެން ދަރިންނާ އެކު ވަނީ ޝަހީދުވެފައެވެ. އެހަމަލާއަކީ އެނާ ދިރިއުޅޭ ގެއަށް އަމާޒުކޮށް ދިން ހަމަލާއެކެވެ.

 މީގެއިތުރުން މާޗް 24 ވަނަ ދުވަހު އިޒްރާއީލުން ޚާން ޔޫނިސްއަށް ދިން ވައިގެ ހަމަލާއެއްގައި ޚާން ޔޫނިސްގެ އެޑިއުކޭޝަން ޑިރެކްޓަރު މަނާރު އަބޫ ޚާތަރްވެސް ވަނީ ޝަހީދުވެފައެވެ. އޭނާ ދިރިއުޅޭ ގެއަށް އަމާޒުކޮށް ދިން ހަމަލާގައި އޭނާގެ އާއިލާގެ ގިނަ ބަޔަކު ޝަހީދުވެގެން ގޮސްފައިވެއެވެ.