ޤަވާއިދާ ޚިލާފަށް ސިނގިރޭޓު ބޭރުކުރި މައްސަލާގައި އިތުުރު މީހަކު ހައްޔަރުކޮށްފި

ޤަވާއިދާ ޚިލާފަށް ވެލާނާ އިންޓަރނޭޝަނަލް އެއަރޕޯޓުން ސިނގިރޭޓް ބޭރުކުރި މައްސަލާގައި އިތުރު މީހަކު ހައްޔަރުކޮށްފިއެވެ.

މި މައްސަލާގައި ހައްޔަރުކޮށްފައިވަނީ ނ.ވެލިދޫ ގަސްކަރަ މުޙައްމަދު އައިހަމް 23 އަހަރެވެ. އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން އިއްޔެއެވެ.  އައިހަމްގެ ބަންދާއި މެދު ގޮތެއް ނިންމަން ކޯޓަށް ހާޒިރުކުރުމުންް 10 ދުވަހަށް އޭނާ ބަންދު ކުރުމަށް ކޯޓުން ވަނީ އަމުރުކޮށްފައެވެ. 

މި މައްސަލާގައި އައިހަމްގެ އިތުރުން މ. ސިލްވާނެސްޓް އަހްމަދު އަފްޒަލް އާއި ޔޫސުފް ނަޒީރު ވެސް ހައްޔަރުކޮށްފައިވެއެވެ. މީގެ ތެރެއިން ޔޫސުފް ނަޒީރަކީ ދިވެހިންގެ ފުލުހުންގެ ޚިދުމަތުގައި ހުރި ފުލުސް އޮފިސަރެކެވެ. ނަމަވެސް މިހާރު އޭނާ ވަނީ މުސާރަ ނުލިބޭގޮތައް ވަޒީފާގެ ޒިންމާތަކުން ދުރުކޮށްފައެވެ. 

މި ދެ މީހުންގެ ބަންދާމެދު ގޮތް ނިންމަން ކޯޓަށް ހާޒިރުކުރުމުން ޝަރުތުތަކެއް ކުރުމަށް ފަހު ވަނީ ދޫކޮށްލާފައެވެ. ޝަރުތުތަކެއް ފުލުހުން ހާމަކޮށްފައެއް ނުވެއެވެ.

ފުލުހުން ބުނެފަައިވަނީ މިމައްސަލަ އިތުރަށް ތަހުޤީޤު ކުރަމުންދާކަމަށެވެ.