ޚަބަރު
ކުލަ ބޮކިތަކުން ޒީނަތްތެރިކުރުމަށް ބޭނުންވާ ސާމާނު ހުރިހާ ރަށަކަށް ފޮނުވާ ނިމިއްޖެ

މިދިޔަ އަހަރު ޢީދު ބޮކިތައް ދިއްލާފައި، ފޮޓޯ: އެޗްޑީސީ
ފިޠުރު ޢީދުގައި ރާއްޖޭގެ ރަށްތައް ކުލަ ބޮކިތަކުން ޒީނަތްތެރިކުރުމަށް ބޭނުންވާ ސާމާނު، މި ޢީދުގައި ދިއްލުމަށް ކަނޑައަޅާފައިވާ ހުރިހާ ރަށަކަށް ފޮނުވާ ނިމިއްޖެކަމުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
ކުލަގަދަކޮށް ޢީދު ފާހަގަކުރުމުގެ ގޮތުން ސަރުކާރުން ވަނީ މިދިޔަ އަހަރު ކުލަ ބޮކިތަކުން ދިއްލާލި ރަށްތަކުގެ އިތުރަށް 36 ރަށެއްގައި މި އަހަރު ބޮކިތައް ދިއްލާލުމަށް ނިންމާފައެވެ.
ޕީއެސްއެމް ނިއުސްއަށް ދެއްވި އިންޓަވިއުއެއްގައި ވަޒީރު އާދަމް ޝަރީފް ވިދާޅުވީ، މިހާރު ނުފޮނުވި ހުރީ ގިޑިގެތައް ކަމަށާއި، ނަމަވެސް ގިޑިގެތައް ފޮނުވަން ޖެހޭ 86 ރަށަށް މި އަދު އެ ތަކެތި ފޮނުވާ ނިމޭނެކަމަށެވެ.
މީގެ އިތުރުން، މާލެ ދިއްލާލުމުގެ މަސައްކަތްތައް ބާރަށް ކުރިޔަށްދާކަމަށާއި، މިހާރު ކުރިޔަށްދަނީ ޓެސްޓުކުރުމުގެ މަސައްކަތްކަމަށް ވަޒީރު ވިދާޅުވިއެވެ.
އަޅުގަނޑުމެން މިހާރު މާލެ އެކި ސަރަޙައްދުތައް ދިއްލާލުމަށްޓަކައި ޓެސްޓުކުރުމުގެ މަސައްކަތް މިދަނީ ކުރަމުން. ހޮނިހިރު ދުވަހުގެ ނިޔަލަށް ހުރިހާ ސަރަޙައްދެއްވެސް ނިންމާލެވޭނެކަމަށް މިބަލަނީ.
ވަޒީރު އާދަމް ޝަރީފް ވިދާޅުވިއެވެ.
މިމަސައްކަތް ކުރުމުގައި ސަރުކާރުގެ އެކި މުއައްސަސާތަކުގެ އެހީތެރިކަން ލިބެމުންދާކަން ވަޒީރު ވަނީ ފާހަގަކުރައްވާފައެވެ. އަދި އަތޮޅުތަކުގެ ރަށްރަށުގައިވެސް ޢީދަށް ތައްޔާރުވުމުގެ ގޮތުން ބޮކި ހަރުކޮށް ފޯރިއާއެކު ތައްޔާރުވަމުންދާކަމަށް މަޢުލޫމާތު ލިބިފައިވާކަމަށް ވަޒީރު ވިދާޅުވިއެވެ.