ކުޅިވަރު

ޑޮކްޓަރު މަރުވުމުން ފަސްކުރި މެޗު ކާމިޔާބުކޮށް ބާސެލޯނާއިން ތިން ޕޮއިންޓުގެ ލީޑެއް ނަގައިފި

ޑޮކްޓަރު މަރުވުމުން ފަސްކުރި މެޗު ކާމިޔާބުކޮށް ބާސެލޯނާއިން ތިން ޕޮއިންޓުގެ ލީޑެއް ނަގައިފި

ބާސެލޯނާގެ ތިން ވަނަ ގޯލު ކާމިޔާބުކުރުމަށްފަހު ލެވަންޑޯސްކީ އުފާފާޅުކުރަނީ، ފޮޓޯ: ގެޓީ އިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

28 މާރިޗު 2025، 11:12

28 މާރިޗު 2025، 11:12

ސްޕެނިޝް ލަ ލީގާގައި ބާސެލޯނާ އިން އޮސަސޫނާ 3-0 އިން ބަލިކުރުމަށްފަހު، ލީގުގައި 3 ޕޮއިންޓުގެ ލީޑެއް ނަގައިފިއެވެ. މި މެޗަކީ 8 މާރިޗުގައި ކުޅެން ހަމަޖެހިފައި އޮތް މެޗެއް ނަމަވެސް، ޓީމުގެ ޑޮކްޓަރ، ކާލްސް މިނޭރޯ ގާސިއާ މަރުވުމާ ގުޅިގެން މެޗު ފެށެން 20 މިނެޓަށްވެފައި ވަނިކޮށް މެޗު އެހެން ތާރީޙަކަށް ފަސްކޮށްފައިވާކަމަށް ބާސެލޯނާއިން އިޢުލާންކުރިއެވެ.

ނަމަވެސް އިއްޔެއަށް މެޗު ތާވަލުކުރުމުން ބާސެލޯނާގެ ކޯޗު، ހެންސީ ފްލިކް ވަނީ ނުރުހުން ފާޅުކޮށްފައެވެ. އެއީ އިންޓަނޭޝަނަލް ބްރޭކަށްފަހު ކުޅުންތެރިން އެނބުރި އައި ދުވަހާ މި މެޗާ ދެމެދު އެންމެ ދުވަހެއް ލިބުމުންނެވެ. އަދި މިކަމާ ގުޅިގެން، ލީގުގައި މިހާތަނަށް 27 ގޯލު ޖަހާފައިވާ ބްރެޒިލްގެ ރަފީނިއާ ޖެހުނީ އަރާމު ކުރާށެވެ.

މި މައްސަލައިގައި ވާހަކަ ދައްކަމުން ބާސެލޯނަގެ ޑިފެންޑަރ ޖޫލްސް ކުންޑޭ ބުނީ، މިކަމުން ހާމަވީ ކްލަބުތަކާއި ކުޅުންތެރިންނަށް އިޙްތިރާމް ނުކުރާ ކަމެވެ. އަދި ކުޅުންތެރިންނަކީ މެޝިންތަކެއް ގޮތުގައި ދެކުމަކީ ޙިތާމަކުރާކަމަށެވެ.

އޮސަސޫނާއާ ދެކޮޅަށް ކުޅުނު މެޗުގައި ބާސެލޯނާއަށް ލީޑު ނަގައިދިނީ އެލެކްސް ބާލްޑޭގެ ހުރަހަކުން ފެރަން ޓޮރޭސްއެވެ. އެއީ މެޗުގެ 11 ވަނަ މިނެޓުގައެވެ. އަދި އޭގެ 11 މިނެޓު ފަހުން އޮސަސޫނާގެ ގޯލްކީޕަރު، ސާޖިއޯ ހެރޭރާ، ޑެނީ އޮލްމޯއަށް ކުރި ފައުލަކަށް ލިބުނު ޕެނަލްޓީ ކާމިޔާބުކޮށް ލީޑު ފުޅާކޮށްދިނީ ވެސް އޮލްމޯއެވެ. އޮލްމޯ ފުރަތަމަ ފޮނުވާލި ބޯޅަ ކީޕަރު މަތަކުރި ނަމަވެސް، އެ ޓީމުގެ އިތުރު ކުޅުންތެރިއަކު ޕެނަލްޓީ އޭރިއާ ތެރެއަށް ވަދެފައި ހުރުމުން ދެވަނަ ފަހަރަށް ޕެނަލްޓީ ޖަހަން ލިބުނު ފުރުސަތުގައި އޮލްމޯ ވަނީ ޕެނަލްޓީ ކާމިޔާބުކޮށްފައެވެ.

ބާސެލޯނާގެ ތިން ވަނަ ގޯލު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ރޮބަޓް ލެވަންޑޯސްކީއެވެ. 

މި ނަތީޖާއާއެކު ބާސެލޯނާ މިހާރު އޮތީ ދެވަނައިގައި އޮތް ރެއާލްއަށް ވުރެ 3 ޕޮއިންޓު ކުރީގައެވެ.

މި ލިޔުން ކިޔާލުމުން

Ads by MSS