ނައިފަރު ޤުރުއާން ސެންޓަރު ތަރައްޤީކުރުމަށް ވަޤުފު ފަންޑުން އެހީ ދޭން ނިންމައިފި

ޅ. ނައިފަރު ޤުރުއާން ލަރނިންގ ސެންޓަރު ތަރައްޤީކުރުމަށް އިސްލާމީ ވަޤުފު ފަންޑުން އެހީ ފޯރުކޮށްދިނުމަށް ނިންމާފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ޤުރުއާން ހިތުދަސްކުރުމުގެ މަޝްރޫޢުތައް ފުޅާކުރުމަށް ސަރުކާރުން ވަނީ ނިންމާފައެވެ. މިގޮތުން ޅ. ނައިފަރުގައި ޤާއިމްކުރާ ހިފްޠު ސެންޓަރަކީ ކީރިތި ޤުރުއާން ހިތުދަސްކޮށްދިނުމަށް ޤާއިމްކުރެވޭ ފުރަތަމަ ހިފްޠު ސެންޓަރެވެ.

ވަޒީރު ޝަހީމް ވިދާޅުވިގޮތުގައި، ގިނަ ކުދިންތަކެއް ޤުރުއާން ހިތުދަސްކުރި ނައިފަރުގެ ޤުރުއާން ލާނިންގ ސެންޓަރު ތަރައްޤީކުރުމަށް ބޭނުންވާ ވަސީލަތްތައް ހޯދުމަށް އެ ވުޒާރާގައި އެދިފައިވެއެވެ. އެހެންކަމުން، އިސްލާމީ ކަންތައްތަކާބެހޭ ވުޒާރާގެ އިސްލާމީ ވަޤުފު ފަންޑުން އެހީ ފޯރުކޮށްދިނުމަށް ނިންމާފައިވާކަމަށް ވަޒީރު ވަނީ ހާމަކުރައްވާފައެވެ.

މީގެއިތުރުން، އިސްލާމީ މަރުކަޒު ޤާއިމްކޮށްފައި ނުވާ ރަށްރަށުގައިވެސް މިސްކިތްތަކުގައި ޤުރުއާން ހިތުދަސްކުރުމުގެ މަޝްރޫޢުތައް ކުރިއަށްގެންދާނެކަމަށް ވަޒީރު ވިދާޅުވިއެވެ. އަދި ސަރުކާރުގެ އިދާރާތައް ފިޔަވައި އަމިއްލަ ފަރާތްތަކުން ހިންގާ ޤުރުއާން ކްލާސްތަކުގައިވެސް ހިތުދަސްކުރުމުގެ މަޝްރޫޢުތަކަށް އެ ވުޒާރާއިން ހުރިހާ ގޮތަކުން އެހީތެރިކަން ފޯރުކޮށްދޭނެކަމަށް ވަޒީރު ފާހަގަކުރެއްވިއެވެ.

ވަޒީރު ޝަހީމް އިތުރަށް ވިދާޅުވީ، މިފަދަ މަޝްރޫޢުތަކަށް ވަސީލަތްތަކާއި މާލީ އަދި އެހެނިހެން ގޮތްގޮތުންވެސް އެހީތެރިކަން ފޯރުކޮށްދެއްވާނެކަމަށެވެ.