މިޔަންމާ އަށް ބޮޑު ބިންހެލުމެއް ، ލޮޅުމުގެ އަސަރާއި އެކު ބެންކޮކުގައި ހުރި އިމާރާތެއް ވެއްޓިއްޖެ

މިއަދު މެންދުރު ތައިލެންޑާއި އިންވެގެން އޮންނަ މިޔަންމާގައި 7.7 މެގްނިޓިއުޑްގެ ބޮޑު ބިންހެލުމެއް އައުމާ ގުޅިގެން ބެންކޮކުގައި އިމާރާތް ކުރަމުންދިޔަ އުސް އިމާރާތެއް ވެއްޓިއްޖެ ކަމަށް ފުލުހުން ބުނެފިއެވެ. މި ހާދިސާގައި ލިބުނު ގެއްލުމުގެ މިންވަރު އަދި ސާފުވެފައެއް ނުވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ދައްކާ ގޮތުން، ގިނަ ބުރިތަކެއް ހުރި އިމާރާތުގެ މަތީގައި ހުރި ކްރޭން އާ އެކު އިމާރާތް ވެއްޓި، ދުންތަކެއްގެ ތެރެއަށް ގެއްލިގެން ދިޔަ މަންޒަރު ފެނެއެވެ. މި މަންޒަރު ދުށް މީހުން ބިރުން ހަޅޭއްލަވައި ދުވެފައި ދިޔަ މަންޒަރުވެސް ފެނެއެވެ.

ބެންކޮކުގެ މަޝްހޫރު ޗަތުޗަކް މާރުކޭޓާ ކައިރީގައި ހިނގި މި ހާދިސާއަށް އިޖާބަދެމުން ދާ ކަމަށް ފުލުހުން އެސޯސިއޭޓެޑް ޕްރެސްއަށް ބުނެފައިވެއެވެ. އެހެންނަމަވެސް އިމާރާތް ވެއްޓުނު ވަގުތު އެތަނުގައި ތިބި މަސައްކަތްތެރިންގެ އަދަދު އަދި ސާފުވެފައެއް ނުވެއެވެ.

މެންދުރު އައި މި ބިންހެލުމުގެ ފަހުން 6.4 މެގްނިޓިއުޑްގެ އިތުރު ބިންހެލުމެއް އައި ކަމަށް ބުނެފައިވެއެވެ. އަދި އިތުރު ބިންހެލުންތަކެއް އައުމުގެ ބިރު އޮތުމާއެކު، އިމާރާތްތަކުން ނުކުތް މީހުންނަށް ބޭރުގައި ތިބުމަށް އިރުޝާދު ދީފައިވެއެވެ.

ބިންހެލުމުގެ ސަބަބުން ބެންކޮކުގެ އެކި ސަރަހައްދުތަކުގައި ހުރި އިމާރާތްތަކަށް ގެއްލުން ލިބި، ގިނަ އަދަދެއްގެ މީހުން އިމާރާތްތަކުން ނުކުމެފައިވެއެވެ. މީގެ އިތުރުން މިޔަންމާގެ އެކި ސަރަހައްދުތަކުގައިވެސް ގެއްލުން ލިބިފައިވާ ކަމަށް ރިޕޯޓުތަކުން ދައްކައެވެ.

ޔޫއެސް ޖިއޮލޮޖިކަލް ސާރވޭ އާއި ޖަރުމަނުގެ ޖީއެފްޒެޑް ސެންޓަރ ފޮރ ޖިއޯސައިންސަސްއިން ބުނާ ގޮތުގައި މި ބިންހެލުމުގެ އެޕިސެންޓަރ އޮތީ މިޔަންމާގައެވެ. އަދި މިއީ 10 ކިލޯމީޓަރުގެ ފުންމިނުގައި އައި ބިންހެލުމެއް ކަމަށް ބުނެފައިވެއެވެ.

ތައިލެންޑުގެ ބޮޑުވަޒީރު ޕެއޮޓޮން ޝިނަވަތްރާ ވަނީ ބިންހެލުމުގެ ސަބަބުން ލިބުނު ގެއްލުންތައް ވަޒަންކުރުމަށް ކުއްލި ބައްދަލުވުމެއް ބާއްވާފައެވެ. އަދި ތައިލެންޑުގެ ޑިޒާސްޓަރ ޕްރިވެންޝަން ޑިޕާޓްމަންޓުން ބުނެފައިވަނީ މި ބިންހެލުން ގައުމުގެ ހުރިހާ ސަރަހައްދެއްގައި ވެސް އިހުސާސްކުރެވުނު ކަމަށެވެ.