ޝަމްޢާންގެ އިސްތިއުނާފުގެ މައްސަލަ ހައިކޯޓުން ބަލައިނުގަންނަން ނިންމައިފި

ކޮންޓްރޯލާރ ޖެނެރަލްގެ މަޤާމުގައި ހުންނަވަނިކޮށް އެ މަޤާމުން މި މަހުގެ 21 ވަނަ ދުވަހު ވަކިކޮށްފައިވާ މުޙައްމަދު ޝަމްޢާން ކޮރަޕްޝަންގެ ތުޙުމަތުގައި މިދިޔަ ހުކުރު ދުވަހު ފުލުހުން ބަންދުކޮށްފައިވާތީ އެ މައްސަލަ އިސްތިޢުނާފުކުރުމަށް އޭނާގެ ފަރާތުން ހައިކޯޓަށް ހުށަހެޅުމުން، އެ މައްސަލަ ބަލައިނުގަތުމަށް އެ ކޯޓުން ނިންމައިފިއެވެ.

ޝަމްއާންގެ ބަންދާ މެދު ގޮތެއް ނިންމުމަށް މިމަހުގެ 22 ވަނަ ދުވަހު ދަށު ކޯޓަށް ހާޒިރުކުރުމުން އޭނާގެ ބަންދަށް ވަނީ 15 ދުވަސް ޖަހާފައެވެ. މި މައްސަލަ އިސްތިއުނާފުކުރުމަށް އޭނާގެ ފަރާތުން ހުށަހަޅާފައިވަނީ މިދިޔަ ބުދަދުވަހެވެ. އަދި އެ މައްސަލަ ހައިކޯޓަށް ބަލައި ނުގަންނަން ނިންމައި މައްސަލަ ބޭރުކޮށްލީ އިއްޔެގެ ވަގުތެއްގައެވެ.  

ޝަމްޢާން ހައްޔަރުކޮށްފައިވަނީ މޯލްޑިވްސް އިމިގްރޭޝަންގެ ބައެއް މުވައްޒަފުން މަޤާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރިންގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައަކާއި ގުޅިގެން ކޯޓު އަމުރެއްގެ ދަށުންނެވެ. 

މި މައްސަލައާ ގުޅިގެން ފުލުހުން ކުރިން ނެރުނު ނޫސް ބަޔާނުގައި ވަނީ، ޤަވާއިދާއި ޚިލާފަށް އުޅެމުންދާ ބިދޭސީން ހޯދާ ޑިޓެއިންކުރުމުގެ ޒިންމާ އާންމުކޮށް އަދާކުރަމުންދާ ޓާސްކް ފޯރސް އަދި ރިސްކު މެނޭޖްމަންޓް ސެކްޝަނުގެ މުވައްޒަފުން ނޫން އިމިގްރޭޝަންގެ އެހެން ސެކްޝަންތަކުގައި މަސައްކަތްކުރާ މުވައްޒަފުންތަކެއް އެ މުވައްޒަފުންގެ މަގާމުގެ ނުފޫޒު ނަހަމަގޮތުގައި ބޭނުންކޮށްގެން، ބިދޭސީ މަސައްކަތްތެރިން ދިރިއުޅޭ ގެއެއް ބަލައި ފާސްކޮށް، އަދި އެ ގެއިން ބިދޭސީއަކު ގިނަ އަދަދެއްގެ ނަގުދު ފައިސާއާއެކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށެވެ. އަދި އޭގެ ފަހުން ޝަމްޢާންގެ އެންގުމަށް އޭނާ ދޫކޮށްލުމަށްފަހު، އޭނާގެ އަތުގައި ހުރި ފަސް ލައްކައަށް ވުރެ ގިނަ ފައިސާ އަތުލައިގެން ގެންގޮސް ޝަމްޢާން ދިރިއުޅެމުންދާ ގެޔަށް ވެއްދިކަމަށެވެ. 

މި މައްސަލާގައި ޝަމްޢާންގެ އިތުރުން، އިމިގްރޭޝަންގެ 3 އޮފިސަރަކު ވަނީ ހައްޔަރުކޮށްފައެވެ.