މިސްރުން އަނެއްކާވެސް 3600 އަހަރު ކުރީގެ ފިރުއައުނެއްގެ މަހާނަ ހޯދައިފި

މިސްރުގެ ކެއިރޯ ގެ 300 މޭލު ދެކުނުގައި ވާ ސަރަހައްދަކުން މިހާތަނަށް އެނގިފައިނުވާ  ފިރުއައުނެއްގެ މަހާނައެއް ފެނިއްޖެއެވެ. މި މަހާނަ ފެނުނީ އިޖިޕްޓާއި އެމެރިކާގެ ތަޙުޤީޤުވެރިން ކުރަމުންދާ ދިރާސާއެއްގެ ތެރެއިންނެވެ. މިއީ މިއަހަރު ތެރޭގައި ހޯދިފައިވާ މިފަދަ ދެވަނަ ހޯދުމެވެ. އަދި މި މަހާނަ އުފެދިފައިވަނީ މީގެ 3600 އަހަރު ކުރިން ކަމަށް ލަފާކުރެވެއެވެ.

މި މަހާނަ ފެނިފައިވަނީ އިޖިޕްޓުގެ އެންމެ ޒަމާންވީ އާޘާރީ ސަރަހައްދުތަކުގެ ތެރެއިން އެއް ސަރަހައްދު ކަމަށްވާ އަބިޑޮސްގެ 23 ފޫޓު އަޑިން ނެވެ. މި މަހާނައިގައި 16 ފޫޓު އުސްމިނުގެ ތަޅުންގަނޑުތަކާއި، އެކި ކޮޓަރިތަކުގައި ޒީނަތްތެރި ކުރެހުންތައް ހުރިކަން ފާހަގަކުރެވެއެވެ. މިއީ 2014 ވަނަ އަހަރު ހޯދުނު ސެނެބް-ކޭ ނަމަކަށް ކިޔުނު ރަސްގެފާނެއްގެ މަހާނައަށްވުރެ މާ ބޮޑު މަހާނައެކެވެ.

ފިލަޑެލްފިޔާގެ ޕެން މިއުޒިއަމްގެ ކިއުރޭޓަރ އަދި މި ދިރާސާގެ އެމެރިކާގެ ފަރާތުން އިސްކޮށް ހަރަކާތްތެރިވާ ޖޯސެފް ވެގްނަރ ވިދާޅުވީ މިއީ މި ޚާންދާނުގެ ތާރީޚު ދިރާސާކުރުމުގައި އައު ބާބެއް ކަމަށެވެ. މި މަހާނައިގައި އިޖިޕްޓުގެ ޤަދީމީ އަސާތީރީ ވާހަކަތަކުގެ މަންޒަރުތައް ކުރަހާފައި ހުރި ކަމަށާއި، އޭގެ ތެރޭގައި  އައިސިސް އާއި ނެފްތިސްގެ ކުރެހުންތައް ހިމެނޭ ކަމަށް އޭނާ ވިދާޅުވިއެވެ.

ނަމަވެސް، މި މަހާނައަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށާއި، އިންސާނުންގެ އެއްވެސް ހަށިގަނޑެއްގެ ބައެއް ފެނިފައި ނުވާ ކަމަށް ވެގްނަރ ވިދާޅުވިއެވެ. އަދި މީގެ ކުރިން މަހާނަ ވައްކަންކުރާ މީހުން މި މަހާނައަށް ވަދެ، އޭގެ ތެރޭގައި  ހުރި ގިނަ ތަކެތި ވަގަށް ނަގާފައިވާ ކަމަށް ލަފާކުރެވޭ ކަމަށްވެސް އޭނާ ވިދާޅުވިއެވެ.

މި މަހާނައިގެ ވެރިފަރާތް ކަށަވަރުކުރުމަށް އަބިޑޮސްގެ އެހެން އިމާރާތްތަކުގައި ހުރި ލިޔުންތައް ބަލަމުންދާ ކަމަށާއި، ސެނައިބް އަދި ޕެއެންޓްޖެނީ ނަމަކަށް ކިޔާ ދެ ރަސްކަލެއްގެ ނަން މި މަހާނައިގެ ވެރިފަރާތް ކަމުގައި ވުމުގެ ފުރުސަތު އޮތް ކަމަށް ވެގްނަރ ވިދާޅުވިއެވެ. އަދި މި މަހާނަ ރައްކާތެރިކުރުމުގެ މަސައްކަތް ކުރިއަށްދާނެ ކަމަށާއި، އެ ޒަމާނުގެ އިތުރު މަހާނަތައް ހޯދުމަށް މަސައްކަތްކުރާނެ ކަމަށްވެސް އޭނާ ވިދާޅުވިއެވެ.