30 ދުވަހު ވިދިވިދިގެން ރޯދައަށް ހުރުމުން ހަށިގަނޑު އިޖާބަދޭ ގޮތާއި ލިބޭ ފައިދާ

ރަމަޟާން މަހުގައި، ދުނިޔޭގެ ގާތްގަނޑަކަށް 2 ބިލިއަން މުސްލިމުން އެމީހުންގެ ޖިސްމާނީ އަދި ނަފްސާނީ ބާރުގެ ހައްދުތައް ޓެސްޓުކުރެއެވެ. ނަމަވެސް ގިނަ މީހުންނަށް މުޅި މަހު ފަޖުރުން އިރުއޮއްސުމާ ހަމައަށް ރޯދަހިފުމުގެ ދީނީ ފައިދާތައް އެނގޭއިރު، ހަށިގަނޑާއި ސިކުނޑިއަށް ކުރާ އަސަރުތައް އެހާ ރަނގަޅަށް ނޭނގޭ ކަމަށް ވެދާނެއެވެ.

ރޯދަހިފުމަކީ ވަކި މުއްދަތަކަށް ކެލަރީ ބޭނުންކުރުމުން މީހަކު ދުރުހެލިވާ "ފިޒިއޮލޮޖިކަލް" ހާލަތެއްގެ ގޮތުގައި މާނަކުރެވެއެވެ. މިކަމުގެ ސަބަބުން މެޓަބޮލިޒަމާއި ހަށިގަނޑުގެ މަސައްކަތްތަކަށް ބަދަލުތަކެއް އާދެއެވެ. ރޯދަހިފުމުގެ ބާވަތްތައް ތަފާތުވެއެވެ. މީގެ ތެރޭގައި ފަރުވާގެ ގޮތުން ރޯދަހިފުމާއި، މެދުކެނޑޭގޮތަށް ރޯދަހިފުމާއި، އަދި ދީނީގޮތުން ރޯދަހިފުން ހިމެނެއެވެ. މިއިން ކޮންމެ ބާވަތަކުންވެސް ވަކި ޖިސްމާނީ  އަސަރުތަކެއް ހަށިގަނޑަށް ކުރެއެވެ.

ކިންގް ފަހަދު ސްޕެޝަލިސްޓް ހޮސްޕިޓަލް ރިސަރޗް ސެންޓަރުގެ ކޮންސަލްޓަންޓް އަދި ކްލިނިކަލް ރިސަރޗް ސައިންޓިސްޓް މުޙައްމަދު މަޙްރޫސް ވަނީ މީހަކު 30 ދުވަހު ރޯދަހިފުމުން ހަށިގަނޑަށް ވާގޮތް ބަޔާންކޮށްދެއްވާފައެވެ.

ރޯދަހިފުމުން ހަޖަމުކުރާ ނިޒާމަށް އަރާމުކުރުމުގެ ވަގުތެއް ލިބޭ. މިގޮތުން ހަށިގަނޑަށް ސެލްތައް މަރާމާތުކުރުމާއި ޑީޓޮކްސިފިކޭޝަނަށް އަހައްމިއްޔަތުކަން ދެވޭ

މުޙައްމަދު މަޙްރޫސް

މިކަމުގެ ސަބަބުން އިންސިއުލިންއާއި ގްލޫކޯސްގެ މިންވަރު ދަށްވެ، މޭގައި ސަރުބީ ހިފުމުގެ ބަދަލުގައި ސަރުބީ އެންދުމަށް މަގުފަހިވެއެވެ. ގްލައިކޮޖެން، އެއީ ގްލޫކޯސް ރައްކާކުރެވިފައި ހުންނަ ގޮތް، އެހުސްވުމުން ހަށިގަނޑު ހަކަތައިގެ މައިގަނޑު މަސްދަރެއްގެ ގޮތުގައި ސަރުބީއަށް ބަރޯސާވެއެވެ. މިއީ ކީޓޯސިސް ކިޔާ ޕްރޮސެސްއެކެވެ.

މެޑިކަލް ނަޒަރަކުން ބަލާއިރު، ބައެއް ހާލަތްތަކުގައި ރޯދަހިފުން ބޭނުންކުރެވެނީ ފަލަވުމާއި، އިންސިއުލިން ރެޒިސްޓަންސްއާއި، މެޓަބޮލިކް ބަލިތައް ފަރުވާކުރުމަށެވެ.

2019 ވަނަ އަހަރު ނިއު އިންގްލަންޑް ޖާނަލް އޮފް މެޑިސިންގައި ޝާއިޢުކުރެވުނު ދިރާސާއަކުން ނިންމާފައިވަނީ މެދުކެނޑޭގޮތަށް ރޯދަހިފުމުން މެޓަބޮލިޒަމް އިތުރުވެ، އިންސިއުލިން ރެޒިސްޓަންސް ދަށްވާ ކަމަށެވެ. މިއީ ޓައިޕް 2 ޑައިބެޓީސް ހުއްޓުވުމަށް ފައިދާހުރި ގޮތެއް ކަމަށް ވެއެވެ.

ރޯދަވީއްލުމަށްފަހު ބެލެންސްޑް ކާނާ ކެއުމުން، ރޯދަހިފުމުގެ ސަބަބުން މެޓަބޮލިކް ހަރުދަނާކަން އިތުރުވޭ

މަޙްރޫސް

ރޯދަވީއްލުމުގައި ދޯބުރާލި ހަކުރު، ހިއްކާފައިވާ މޭވާއާއި ފާސްޓް ފުޑް ފަދަ ގެއްލުންހުރި ކާނާ ކެއުމުން ފައިދާތައް މަދުވެ، ސިއްޙީ މައްސަލަތަކަށް މަގުފަހިވެދާނެ ކަމަށް އޭނާ ބުނެފައިވެއެވެ.

ރޯދަހިފުމުން އޮޓޮފެޖީވެސް އިތުރުވެއެވެ. މިއީ ސެލްތައް އަލުން އުފެދުމާއި ދުޅަހެޔޮ އިމިއުން ސިސްޓަމެއް ތަރައްޤީވުމަށް މަގުފަހިކޮށްދޭ ސެލިއުލަރ ޕްރޮސެސްއެކެވެ. މިކަން ސާބިތުވެފައިވަނީ 2016 ވަނަ އަހަރުގެ ފިޒިއޮލޮޖީ ނުވަތަ މެޑިސިންގެ ނޯބަލް އިނާމު ލިބިވަޑައިގަތް ޖަޕާނުގެ ބަޔޮލޮޖިސްޓް ޔޮޝިނޯރި އޮސުމީގެ ދިރާސާއިންނެވެ.

އިސްލާމީ ދީނުގައި ރޯދަހިފުމަކީ، އިރުއަރާ ވަގުތުން އިރުއޮއްސޭ ވަގުތާ ހަމައަށް ހުރިހާ ކާއެއްޗެއްސާއި ބުއިމަކުން ދުރުހެލިވުމެވެ. މިއީ ރޫޙާނީ އަދި ނަފްސާނީ ފުންމިނެއް އެކުލެވޭ ކަމެއްކަމަށް މަޙްރޫސް ވިދާޅުވިއެވެ.

މި އަމަލު "އަމިއްލަ ނަފްސު ކޮންޓްރޯލްކުރުމާއި އިރާދަ ވަރުގަދަކުރުމަށް މަގުފަހިކޮށްދެއެވެ... މިއީ ސިއްޙީ ފައިދާތަކުގެ އިތުރުން، ސިކުނޑީގެ ސާފުކަން އިތުރުވުމަށް މަގުފަހިކޮށްދޭ ކަމެކެވެ."

ނަމަވެސް 30 ދުވަހު ވިދިވިދިގެން ރޯދަހިފުމުން ހަށިގަނޑު އިޖާބަދޭ ގޮތް، ކުރު މުއްދަތަކަށް ރޯދަހިފުމާ ތަފާތުވަނީ ކިހިނެއްތޯއެވެ؟

އެންމެ ދުވަހަކު ރޯދަހިފުމުން، މަޙްރޫސް ވިދާޅުވިގޮތުގައި، ހަށިގަނޑު ހަކަތައަށް ރައްކާކުރެވިފައިވާ ގްލައިކޮޖެން ބޭނުންކުރަން ފަށައެވެ. އިންސިއުލިންގެ މިންވަރު ދަށްވެ، ސަރުބީ އެންދުމަށް މަގުފަހިވެއެވެ. އަދި ގްރޯތް ހޯމޯންތައް އުފެދުން އިތުރުވެ، މީގެ ސަބަބުން ޓިޝޫތައް މަރާމާތުވެ މެޓަބޮލިޒަމް ރަނގަޅުވެއެވެ. ލޭގައި ހުންނަ ހަކުރުގެ މިންވަރަށް އަންނަ ބަދަލުތަކުގެ ސަބަބުން ވަރުބަލިކަމާއި ހޫނުކަން އިހުސާސްވެދާނެއެވެ.

2021 ވަނަ އަހަރު ޖާނަލް އޮފް ނިއުރޮސައިންސްގައި ޝާއިޢުކުރެވުނު ދިރާސާއަކުން ދައްކާގޮތުގައި ކުރު މުއްދަތަކަށް ރޯދަހިފުމުން ބްރެއިން-ޑިރައއިވްޑް ނިއުރޮޓްރޮފިކް ފެކްޓަރ ކިޔާ ޕްރޮޓީނެއް އުފެދެއެވެ. މިއީ ސިކުނޑީގެ ބާރު އިތުރުކޮށް، އަލްޒައިމާސް ފަދަ ބަލިތަކުގެ ނުރައްކާ ކުޑަކުރުވާ އެއްޗެކެވެ.

މެދުކެނޑޭގޮތަށް ރޯދަހިފުމުން ނުބައި ކޮލެސްޓްރޯލްގެ މިންވަރު ދަށްވެ، ލޭގެ ޕްރެޝަރ ރަނގަޅުވެ، ހިތުގެ ބަލިތަކުގެ ނުރައްކާ ކުޑަވާކަމަށް މަޙްރޫސް އިތުރުކުރެއްވިއެވެ.

ނަމަވެސް މީހަކު 30 ދުވަހު ރޯދަހިފާއިރު، "ހަށިގަނޑު ދިގު މުއްދަތަކަށް ހޭނުމުގެ މަރުޙަލާއަކަށް ވަދެ، މެޓަބޮލިކް ހަރުދަނާކަން އިތުރުވެއެވެ،" މަޙްރޫސް ވިދާޅުވިއެވެ.

އިންސިއުލިން ސެންސިޓިވިޓީ ރަނގަޅުވެ، ޑައިބެޓީސްގެ ނުރައްކާ ކުޑަވެއެވެ. ދިގު މުއްދަތުގެ އިންފްލަމޭޝަންގެ މިންވަރު ދަށްވެ، ހިތާއި ދިފާއި ނިޒާމުގެ ދުޅަހެޔޮކަން އިތުރުވެއެވެ. އަދި އޮޓޮފެޖީ އިތުރުވެ، ގެއްލުން ލިބިފައިވާ ސެލްތައް ނައްތާލުމާއި ޓިޝޫތަކުގެ ދުޅަހެޔޮކަން އިތުރުކުރުމަށް އެހީތެރިވެދެއެވެ.

2014 ވަނަ އަހަރު ސެލް ސްޓެމް ސެލް ޖާނަލްގައި ޝާއިޢުކުރެވުނު ދިރާސާއެއްގައިވާ ގޮތުން، ރޯދަހިފުމަކީ އިމިއުން ސިސްޓަމް ވަރުގަދަކުރުމުގައި މުހިންމު ދައުކުރުވާ ކަމެކެވެ.

ރޯދަވީއްލުމުގައި ބެލެންސްޑް ކާނާ ކައިފިނަމަ، އަވަހަށް ބަރުދަން ލުއިވުންވެސް އެކަށީގެންވެއެވެ.

ރޯދަހިފުމުގެ ނަފްސާނީ އަދި ރޫޙާނީ ކަންތައްތަކަށް ބަލާއިރު، އޭގެ ގިނަގުނަ ފައިދާތަކެއް ވެއެވެ. ނަފްސާނީގޮތުން، މިއީ އާދަތަކާއި ޢަމަލުތައް ކޮންޓްރޯލްކުރުމުގެ ޤާބިލުކަން އިތުރުކޮށްދޭ ކަމެކެވެ. "ސްޓްރެސް ހޯމޯން" ކަމަށްވާ ކޯޓިސޯލް އުފެދުން މަދުވުމުގެ ސަބަބުން ނަފްސާނީ ބިރުވެރިކަމާއި ކަންބޮޑުވުން ކުޑަވެއެވެ. އަދި ކާމިޔާބުކަމާއި އަމިއްލަ ނަފްސު ކޮންޓްރޯލްކުރެވުނު ކަމުގެ އިހުސާސް ލިބެއެވެ.

ރޫޙާނީގޮތުން، ރޯދަހިފުމަކީ އަމިއްލަ ނަފްސާމެދު ވިސްނުމާއި ސިކުނޑީގެ ސާފުކަން އިތުރުކުރުމަށް އެހީތެރިވެދޭ ކަމެކެވެ. މިއީ ޝުކުރުވެރިކަމާއި އަގުވަޒަންކުރުމުގެ އިހުސާސް އުފައްދައި، ކެތްތެރިކަން އިތުރުކޮށް، އަމިއްލަ އާދަތައް އަލުން ވަޒަންކޮށް ރަނގަޅުކުރުމުގެ ފުރުސަތު ދޭ ކަމެކެވެ.

ނަމަވެސް ބައެއް ހާލަތްތަކުގައި ރޯދަހިފުން ގެއްލުންވެސް ވެދާނެއެވެ. ހަށިގަނޑަށް ބޭނުންވާ ދިޔާތަކެއްޗާއި ކާނާގެ މާއްދާތައް ނުލިބުމުން، ހަށިގަނޑު ހިކުމާއި ވިޓަމިންތައް މަދުވުމަށް މަގުފަހިވެދާނެ ކަމަށް މަޙްރޫސް ވިދާޅުވިއެވެ. ރޯދަވީއްލުމުގައި ގިނައިން ކެއުމާއި ނުބައި ކާނާ ކެއުމުގެ ސަބަބުން ބަރުދަން އިތުރުވެ، މެޓަބޮލިކް ބަލިތަކަށް މަގުފަހިވެދާނެ ކަމަށް އޭނާ އިތުރުކުރެއްވިއެވެ.

"ރޯދަހިފުމަކީ ޖިސްމާނީ، ނަފްސާނީ އަދި ރޫޙާނީ ދުޅަހެޔޮކަމަށް އެދެވޭ އަސަރުކުރާ ފިޒިއޮލޮޖިކަލް ޕްރޮސެސްއެއް،" އޭނާ ވިދާޅުވިއެވެ.

"ނަމަވެސް، މީގެ ފައިދާތައް ލިބުން ބިނާވެފައިވަނީ ރޯދަވީއްލުމަށްފަހު ދުޅަހެޔޮ ކާނާ ކެއުމުގެ މައްޗަށެވެ. ނުބައި ކެއުމުގެ އާދަތަކުގެ ސަބަބުން މި ފައިދާތައް ނެތިދިއުމާއެކު، ނޭދެވޭ އަސަރުތަކެއް ކުރުންވެސް އެކަށީގެންވެއެވެ."

މީގެ އިތުރުން، ޑައިބެޓީސް ނުވަތަ ލޭގެ ޕްރެޝަރ މަތިވުން ފަދަ ދާއިމީ ބަލިތައް ހުންނަ މީހުން ރޯދަހިފުމުގެ ކުރިން ޑޮކްޓަރެއްގެ ލަފާ ހޯދުމަށް މަޙްރޫސް އިރުޝާދުޝާދު ދެއްވިއެވެ.