ކުޅިވަރު
ފުޓުބޯޅަ ސީޒަން ފެށުމުގެ މަސައްކަތް މަޑުޖައްސާލުމަށް ފީފާގެ ފަރާތުން އަންގައިފި

ސްޕޯޓްސް މިނިސްޓަރު ރާފިއު އާއި ހައްރާޒުއާ ވާހަކަ ދައްކަނީ، ފޮޓޯ: އަދަދު
މިއަންނަ އެޕްރީލް މަހު ރާއްޖޭގެ ފުޓުބޯޅަ ސީޒަން ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ތައްޔާރުވަމުން ދަނިކޮށް، އެކަން މަޑުޖައްސާލުމަށް ފީފާގެ މެންބަރު އެސޯސިއޭޝަންގެ ސީނިއާ މެނޭޖަރު، މިސްރުގެ އަހްމަދު ހައްރާޒު އަންގަވައިފިއެވެ.
އެގޮތުން ފީފާގެ އެންގުމާ އެއްގޮތަށް ފުޓްބޯޅަ އެސޯސިއޭޝަންގެ މުބާރާތްތައް މަޑުޖައްސާލުމަށް އެފްއޭއެމްއަށް އެންގީ އިއްޔެއެވެ. މިގޮތަށް ފީފާއިން އެންގީ އެފްއޭއެމްގެ އަސާސީ ގަވާއިދުގައި ހުރި މައްސަލަތައް ހައްލު ކުރުމަށާއި ނޯމަލައިޒޭޝަން ކޮމިޓީއާ ހަވާލު ކުރި މައްސަލަތަކަށް އިސްކަން ދިނުމުގެ ގޮތުން ކަމަށް އެ އެންގުމުގައި ވެއެވެ.
މަޢުލޫމާތު ލިބިފައިވާ ގޮތުގައި ފީފާއިން ބުނަމުންދަނީ މި އަހަރުގެ އޯގަސްޓުމަހަށް ފުޓުބޯޅަ ސީޒަން ފަސްކުރުމަށެވެ. އަދި ފީފާއާ ގުޅިގެން އެފްއޭއެމްގެ އައު ކަލަންޑަރު އެކުލަވާލުމުގެ މަސައްކަތްތައް ކުރިޔަސްގެންދިއުމަށް ވެސް އަންގާފައިވެއެވެ.
މި ގޮތަށް ފީފާ އިން އެންގިއިރު، ހަތަރު ފަހަރެއްގެ މަތިން ފަސްކުރި ރާއްޖޭގެ ފުޓްބޯޅަ ސީޒަން ފަށަން އެފްއޭއެމް އިން އެންމެ ފަހުން ދިން ތާރީހަކީ، އަންނަ މަހުގެ އަށް ވަނަ ދުވަހެވެ. އެ ދުވަހު، ޗެރިޓީ ޝީލްޑް މެޗު ކުޅެފައި، ޕްމިއަރ ލީގު ފަށަން ކަނޑައަޅާފައިއޮތީ އެޕްރީލް 10 ވަނަ ދުވަހެވެ.
އެހެންކަމުން، ޔުނައިޓެޑް ވިކްޓަރީ ފިޔަވައި، މި އަހަރުގެ ފުރަތަމަ ޑިވިޝަނުގައި ވާދަކުރާ އެހެން ހުރިހާ ޓީމެއް މިހާރު ވަނީ ފަރިތަކުރުންތައް ވެސް ފަށާފައެވެ.