މިއަހަރުގެ ރަމަޟާން މަހު ކުރިއަށް ގެންދެވުނު އިޙްޔާ ފޯރަމްތައް ވަރަށް ކާމިޔާބު: ވަޒީރު ޑރ. ޝަހީމް

މިއަހަރުގެ ރަމަޟާން މަހުގެ  ރޭތައް އިޙްޔާ ކުރުމަށް އިސްލާމީ ކަންތައްތަކާ ބެހޭ ވުޒާރާއިން މާލެއާއި އަތޮޅުތެރޭގައި ބޭއްވި އިޙްޔާ ފޯރަމްތައް ވަރަށް ކާމިޔާބުކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ރަމަޟާން މަހުގެ ރޭތައް އިޙްޔާކުރުމަށް ރޭ މާލޭގައި އެ ވުޒާރާއިން ބޭއްވި އެންމެ ފަހު އިޙްޔާ ފޯރަމްގައި ވާހަކަފުޅު ދައްކަވަމުންނެވެ.

ވަޒީރު ވިދާޅުވީ، މިއަހަރު އަތޮޅުތެރޭގެ އިޙްޔާ ފޯރަމް ބޭއްވުނީ އެކަމަށް އެދި ޕްރޮޕޯސަލް ހުށައެޅި ރަށްތަކުގެ ތެރެއިން އެންމެ ރަނގަޅު ޕްރޮޕޯސަލް ހުށައަޅާފައިވާ ރަށްތަކުގައި ކަމަށެވެ. އަދި މިފަހަރު  އަތޮޅުތެރޭގައި ކުރިއަށްދިޔަ އިޙްޔާތަކުގެ އިންތިޒާމްތައް ވަރަށް ރަނގަޅުކަމަށް ވަޒީރު ވަނީ ފާހަގަކުރައްވާފައެވެ.  ހަމަ އެހެންމެ، ކޮންމެ ރަށެއްގައި ވެސް ގިނަ އަދަދެއްގެ ރައްޔިތުން އިޙްޔާ ފޯރަމްތަކުގައި ބައިވެރިވެފައިވާކަމަށް ވަޒީރު ވިދާޅުވިއެވެ. 

މިއަހަރުގެ ރަމަޟާން މަހު މާލޭގައި 8 އިޙްޔާ ފޯރަމް އިސްލާމީ ކަންތައްތަކާ ބެހޭ ވުޒާރާއިން ވަނީ ބާއްވާފައެވެ. މީގެ އިތުރުން، އަތޮޅުތެރޭގެ 7 ރަށެއްގައި އިޙްޔާ ފޯރަމް އަދި 6 ސްކޫލަކާއި އެކު ދަރިވަރުންގެ އިޙްޔާ ފޯރަމްތައް ވެސް ވަނީ ބާއްވާފައެވެ. މި ހުރިހާ ފޯރަމްތަކަކަށްވެސް އާއްމުންގެ ބޮޑު ތަރުހީބެއް ލިބިފައިވާކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.

ވަޒީރު ވިދާޅުވީ، މިއަހަރުގެ އިޙްޔާ  ފޯރަމްތަކުގައި ރައްޔިތުން މިކަމާއި ދޭތެރޭ އޮތް ޝައުޤުވެރިކަން ވަރަށް ބޮޑަށް އެނގިގެންދިޔަ ކަމަށެވެ. އެހެންކަމުން، 2026 ވަަނަ އަހަރު އަތޮޅުތެރޭގައި މިއަހަރަށްވުރެ ގިނަ ފޯރަމްތަކެއް ބޭއްވުމަކީ އަމާޒެއްކަމަށް ވަޒީރު ވަނީ ވިދާޅުވެފައެވެ.