ދިރާސީ އައު އަހަރަށް ބޭނުންވާ ހުރިހާ ފޮތްތަކެއް ވަގުތަށް ފޯރުކޮށްދެވޭނެކަމުގެ ޔަޤީންކަން ސަރުކާރުން ދެއްވައިފި

އަންނަ މަހުގެ 6 ވަނަ ދުވަހު ދިރާސީ އައު އަހަރުގެ ކިޔެވުން ފެށުމުގެ ކުރިން ދަރިވަރުންނަށް ބޭނުންވާ ހުރިހާ ފޮތްތަކެއް ސްކޫލްތަކަށް ފޯރުކޮށްދީ ނިންމަވާނޭކަމަށް ސަރުކާރުން ވިދާޅުވެއްޖެއެވެ.

ކުރިއަށް އޮތް ދިރާސީ އަހަރަށް ބޭނުންވާ ފޮތްތައް ސްކޫލްތަކަށް ފޯރުކޮށްދިނުމުގެ މަސައްކަތް ސަރުކާރުން ވަނީ މިދިޔަ ޑިސެންބަރު މަހުގެ ތެރޭގައި ފައްޓަވާފައެވެ. މިއީ މީގެކުރިން ބެލެނިވެރިންގެ ފަރާތުން އަންނަ އެންމެ ބޮޑު ޝަކުވާއަށް ޙައްލެއް ހޯދުމަށް ސަރުކާރުން އަޅުއްވާފައިވާ ފިޔަވަޅެކެވެ.

ތަޢުލީމީ ވަޒީރު ޑރ. އިސްމާޢިލް ޝަފީޢު ވިދާޅުވި ގޮތުގައި، ދިރާސީ އައު އަހަރަށް ބޭނުންވާ ހުރިހާ ފޮތްތަކެއްވެސް ޕްރިންޓްކޮށް ނިމި، މިހާރު ހުރީ ތަޢުލީމީ ވުޒާރާގެ ބެލުމުގެ ދަށުގައެވެ. އޭގެ ތެރެއިން %81 އިންސައްތަ ފޮތް ސްކޫލްތަކަށް ފޮނުވާ ނިމިފައިވާކަމަށާއި ބާކީ ހުރި ފޮތްތައްވެސް އަންނަ ހަފުތާގެ ތެރޭގައި ފޯރުކޮށްދީ ނިންމާލެވޭނެކަމަށް ވަޒީރު ވިދާޅުވިއެވެ.

މީގެ އިތުރުން، ސްކޫލްތަކަށް ބޭނުންވާ މަރާމާތުތައްކުރުމަށް މި އަހަރު 15 މިލިޔަން ރުފިޔާ ޚަރަދުކޮށްފައިވާކަމަށް ވަޒީރު ހާމަކުރެއްވިއެވެ. އަދި މުދައްރިސުންގެ ދަތިކަމެއް ނެތި، ކިޔެވޭނެ މަގު ކޮންމެ ދަރިވަރަކަށްވެސް ފަހިވާނެކަމުގެ ޔަޤީންކަން ތަޢުލީމީ ވަޒީރު ދެއްވިއެވެ.

ދިރާސީ އައު އަހަރުގެ ކިޔެވުން އަންނަ މަހުގެ 6 ގައި ފަށާއިރު، ދިރާސީ އަހަރު ނިމޭނީ މި އަހަރުގެ ޑިސެމްބަރު މަހުގެ 28 ވަނަ ދުވަހުއެވެ. އަދި ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރުން ވަނީ 2026 ވަނަ އަހަރުން ފެށިގެން ދިރާސީ އަހަރުގެ ކިޔެވުން އަހަރުގެ ކުރީކޮޅަށް، ޖެނުއަރީމަހަށް ބަދަލުކުރަން ނިންމަވާފައެވެ.