އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދިޔަ އިޙްޔާ ފޯރަމްގެ ބޮޑު އިނާމަކަށް ޢުމްރާ ދަތުރެއް!

މި އަހަރުގެ ރަމަޟާން މަހުގެ ރޭތައް އިޙްޔާ ކުރުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދިޔަ އިޙްޔާ ފޯރަމްގެ ބޮޑު އިނާމަކަށް ޢުމްރާ ދަތުރެއް ދީފިއެވެ.

މި އިނާމު ދީފައިވަނީ، މާލޭގައި ކުރިއަށް ގެންދެވުނު 8 އިޙްޔާ ފޯރަމްއާއި، އަތޮޅުތެރޭގެ 7 ރަށެއްގައި ކުރިއަށް ގެންދެވުނު އިޙްޔާ ފޯރަމްތަކަށް ވަޑައިގެންނެވި ފަރާތްތަކުގެ މެދުގައި ގުރުއަތުން ހޮވުނު 2 ފަރާތަކަށެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މި ޢުމްރާ ދަތުރު ދީފައިވަނީ މާލެ އަދި އަތޮޅުތެރެ ވަކިން ކަމަށެވެ. އެގޮތުން، މާލެ އިޙްޔާ ފޯރަމްތަކުގެ ޢުމްރާ ދަތުރަކީ މޯލްޑިވްސް ޙައްޖު ކޯޕަރޭޝަނުގެ ފަރާތުން ދެެއްވި ޢުމްރާ ދަތުރެއް ކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ވިިދާޅުވެފައެވެ. އަދި އަތޮޅުތެރޭގެ ޢުމްރާ ދަތުރަކީ އަމިއްލަ ދެ ކުންފުންޏެއްގެ ދީލަތި އެހީގައި ދީފައިވާ ދަތުރެއް ކަމަށް އެ ވުޒާރާއިން މަޢުލޫމާތުދެއެވެ.

މީގެ އިތުރުން އެ ވުޒާރާއިން ވިދާޅުވީ، އިޙްޔާ ފޯރަމްތަކަށް ވަޑައިގެންނެވި ބޭފުޅުންގެ މެދުގައި ގުރުއަތު ނެގުމަށްފަހު، ބޮޑެތި އަގުހުރު އިނާމުތަކެއް ދޫކޮށްފައިވާ ކަމަށެވެ. އޭގެ ތެރޭގައި، 65 އިންޗީގެ ޓީވިއަކާއި، އުރީދޫ އެއަރ ފައިބަރ ރައުޓަރަކާއި، 2 ފަހާފޮށި ހިމެނޭ ކަމަށް އެ ވުޒާރާއިން މަޢުލޫމާތުދެއެވެ. ހަމަ އެހެންމެ، ކޮންމެ އިޙްޔާ ފޯރަމެއްގައި ވެސް ބީއެމްއެލް އިސްލާމިކްގެ އެހީތެރިކަމާއެކު 1500 ރުފިޔާ، 1000 ރުފިޔާ، 700 ރުފިޔާ އަދި 500 ރުފިޔާގެ ގިފްޓްކާޑު ވަނީ އެކި ބައިވެރިންނަށް ދީފައެވެ.

މިއަހަރުގެ ރަމަޟާން މަހުގެ ރޭތައް އިޙްޔާ ކުރުމަށް ބޭއްވި އިޙްޔާ ފޯރަމްތަކަށް ޢާންމުންގެ ބޮޑު ތަރުޙީބެއް ލިބިފައިވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ވިދާޅުވެފައެވެ.