ޢީދު އަލިން އީދަށް ރާއްޖެ ދިއްލާލުން މިރޭ

ފިޠުރު ޢީދުގެ މުނާސަބަތާއި ގުޅުވައިގެން ރާއްޖޭގެ ކަންކޮޅުތައް ލައިޓް ތަކުން ދިއްލާލުން މިރޭ އޮންނާނެއެެވެ. 

އެގޮތުން އެކަން ފެށުމަށް މިރޭ މާލޭގައި ރަަސްމިއްޔާތެއް ބޭއްވުމަށް ވަނީ ހަމަޖެހިފައެވެ. މިރަސްމިއްޔާތު ބޭއްވުމަށް ހަމަޖެހިފައިވަނީ ހުޅުމާލެ ސެންޓްރަލް ޕާކުގައި މިރޭ 21:30 ގައެވެ. 

“ޢީދު އަލި” މިނަމުގައި ކުރިއަށްގެންދާ ޢީދަށް މާލެއާއި ރާއްޖޭގެ ރަށްރަށް ކުލަގަދަ ބޮކިތަކުން ދިއްލާލުމަކީ ދީނީ ގޮތުން ފާހަގަކުރެވޭ ޢީދުތައް ކުލަގަދަގޮތެއްގައި ފާހަގަ ކުރުމަށް ރައީސް ޑރ މުޙައްމަދު މުޢިއްޒުގެ ވެރިކަން ފެށުމާއި އެކު ފެށިގެން ދިޔަ ކަމެކެވެ. މިދިޔަ އަހަރުގައިވެސް ޢީދު ތަކުގައި މާލެ އާއި އަޅޮތުތަކުގެ ވެރިކަން ކުރާ ރަށްރަށް ކުލަ ބޮކިތަކުން ދިއްލާލައިފައިވެއެވެ.

މިއަހަރުގެ ފިޠުރު ޢީދާއި ދިމާކޮށް ކޮންމެ އަތޮޅަކުން ދެ ރަށެއް ދިއްލާ ގޮތައް ވަނީ ނިންމާފައެވެ. އެގޮތައް ނިންމާފައިވަނީ މިދިޔަ އަހަރު “ޢީދު އަލި” ޕްރޮގްރާމަށް ލިބުނު ތަރުހީބާއި ގުޅިގެނެވެ.

 ޢީދަށް މުޅި ރާއްޖެ ދިއްލާލުމުގެ އިތުރުން ސަރުކާރުގެ ބައެއް ވުޒާރާތަކާއި އެކި މުއައްސަސާތަކުގެ އިތުރުން ސަރުކާރުން ހިއްސާވާ ކުންފުނިތައް ގުޅިގެން ޢީދު ދުވަހުގެ ހަވީރު ފޯރިގަދަ ހަރަކާތްތަކެއް ކުރިއަށްގެންދިއުމަށް އަންނަނީ ތައްޔާރުވަމުންނެވެ.

 އެގޮތުން ރާއްޖޭގެ އިހުގެ ކުޅިވަރުތަކާއި ޘަޤާފަތް ދައްކާލުމަށް ހަމަޖެހިފައިވާއިރު ފިއުޝަން ޝޯވއެއްވެސް ކުރިއަށްދާނެކަން ވަނީ ހާމަކޮށްފައެވެ. މީގެއިތުރުން އެމްއެންޑީއެފްގެ އެކި ވިންގްތަކުގެ ހަރަކާތްތަކާއި ފުލުހުންގެ ޚިދުމަތުން ކުރިއަށްގެންދާ އެކި ހަރަކާތްތައްވެސް ބޭއްވުމަށް ވަނީ ހަމަޖެހިފައެވެ. މި ހަރަކާތްތައް ބޭއްވުމަށް ހަމަޖެހިފައިވަނީ ސަލްޓަން ޕާކު ސަރަޙައްދާއި، ޝަހީދުންގެ ބިނާ ކުރިމަތީގައާއި ޖުމްހޫރީ މައިދާނުގައެވެ.

ޢީދަށާއި ރަމަޟާން މަހާއި ގުޅުވައި މަގުތައް ބޮކިތަކުން ދިއްލައި އެކަން ފާހަގަކުރުމަކީ ޢަރަބި އިސްލާމީ ޤައުމުތަކުގައި ވަރަށް ކުރިއްސުރެވެސް ކޮށްއުޅޭ ކަމެއް ކަން ފާހަގަކޮށްލަންޖެހެއެވެ.