މަޞްލަޙަތު ނުގެއްލޭގޮތައް ތަރިރުހަނދާއި ގުޅިގެން ފަލަކީ ޢިލްމުގެ ދާއިރާގައި ޢިލްމީ ބަހުސްކުރުމަކީ މައްސަލައެއްނޫން

މަޞްލަޙަތު ނުގެއްލޭގޮތައް ތަރިރުހަނދާއި ގުޅިގެން ފަލަކީ ޢިލްމުގެ ދާއިރާގައި ޢިލްމީ ބަހުސްކުރުމަކީ މައްސަލައެއްނޫން ކަމަށް އިސްލާމީ ކަންތައްތަކާއި ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

ވަޒީރު މިހެން ވިދާޅުވީ ފަލަކީ ހިސާބުޖަހައިގެން ހަނދު ސާބިތުކުރުމުގެ މައްސަލާގައި ސޯޝަލްމީޑީއާގައި ބަޔަކު ވާހަކަތަކެއް ދައްކަމުންދާ ދަނޑިވަޅެއްގައެވެ. 

ވަޒީރު ޝަހީމް ވިދާޅުވީ ތަރިރުހަނދާއި ގުޅިގެން ފަލަކީ ޢިލްމީ ދާއިރާގައި ޢިލްމީ ބަހުސްކުރުމަކީ މައްސަލައެއްނޫންކަމަށެވެ. ނަމަވެސް މިކަން ކުރަންވާނީ ޢާއްމު މަޞްލަޙަތަށް އަސަރުނުކުރާގޮތައް ކަމަށް އެމަނިކުފާނު ވިދާޅުވެފައިވެއެވެ.

ޚާއްޞަކޮށް ރަމަޟާންމަހާއި ޝައްވާލުމަހުގެ ހަނދުގެ ކަންކަމަކީ އޭގެ މައްޗަށް ޝަރުޢީ އަޙްކާމްތަކެއް ތަރުތީބުވާކަންތައްތަކެއްކަމުން މިކަމުގައި ރައްޔިތުންނަށް އޮޅުން އަރައި ޝައްކުއުފެދޭގޮތައް ކަމާ ނުގުޅޭ ފަރާތްތަކުން ވާހަކަ ދެއްކުމަކީ މަޞްލަޙަތު ގެއްލިދާނެކަމެއް ކަމަށް ވަޒީރު ވިދާޅުވިއެވެ.

 ރަމަޟާން މަހުގެ ހަނދު ސާބިތުކުރުމާއި ޝައްވާލުމަހުގެ ހަނދު ސާބިތުކުރުމުގެ ކަންކަން، ޝަރުޢީހަމަތަކާއި، ރާއްޖޭގައި ޢަމަލުކުރުމަށް ކަނޑައެޅިފައިވާ ހަރުދަނާ އުޞޫލުތަކުގެ މަތިން އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާނެ ކަމަށާއި، އެއްވެސް ފަރާތަކުން އަމިއްލަ އަމިއްލައަށް ރޯދަ އިޢުލާންކުރުމާއި ޢީދު އީދު އިއުލާންކުރުމަކީ މަސްލަޙަތު ގެއްލިދާނެކަމެއް ކަމުން މިކަމަށް ސަމާލުވުމަށް އިލްތިމާސްކުރައްވާކަމަށް ވަޒީރު ޝަހީމް ވިދާޅުވިއެވެ.