ޢީދު ދުވަހު ތައްޔާރު ކޮށްލަން ހަނާކުރި ކުކުޅު ވަރެއް ނެތް

ކުކުޅަކީ ދިވެހިންގެ ތެރޭގައި މަޝްހޫރު ކެއުމެކެވެ. އެގޮތުން ޚާއްޞަ ދުވަސް ތަކުގައި ކުކުޅު ތަފާތު ގޮތްގޮތަށް ހަދަމުން ދެއެވެ. މިއަދު މި ބަލާލަނީ ހަނާކުރި ކުކުޅު ހަދާލެވޭނެ ތަފާތު ގޮތަކަށެވެ.

 ހަނާކުރި ކުކުޅު

ހަވާދުގަނޑު ހެދުމަށް ބޭނުންވާ ތަކެތި:

1 ފިޔާ

1/2 ލޮނުމެދު (ގާނާފަ)

1/2 އިނގުރު (ގާނާފަ)

1 ގިތެޔޮ މިރުސް

ހިކަނދިފަތް

ރާނބާފަތް

1 ސަމުސާ ހަނާކުރި ހަވާދު

ލޮނު

އަސޭމިރުސް

ކުކުޅު

2 ސަމުސާ އޮލިވް އޮއިލް

1ޖޯޑު ފެން

ކުކުޅު ތައްޔާރުކުރުމަށް:

1 ޖޯޑު ކަށިނެތް ކުކުޅު

1/2 ސަމުސާ އިނގުރު

1/2 ސަމުސާ ލޮނުމެދު

1 ސަމުސާ ހަނާކުރި ހަވާދު

1 ސަމުސާ ޒުވާރިފުށް 

ތައްޔާރުކުރާނެ ގޮތް:

އެންމެ ފުރަތަމަ ކުކުޅު ކޮޅު ގާނާފައިހުރި ކުޑަ އިގުރުކޮޅަކާއި ލޮނު އަދި ބޭނުންނަމަ ޒުވާރިފުށް ލައިގެން މޮޑެލާށެވެ. ރަނގަޅަށް އެއްވުމުން ކުކުޅުކޮޅު ތެލުލާލާށެވެ. 

އެއަށްފަހު ހަވާދުގަނޑު ތައްޔާރުކޮށްލުމަށް އޮލިވް އޮއިލްގެ ތެރޭގައި ކޮށާފައި ހުރި ފިޔާ، ލޮނުމެދު، އިނގުރު، މިރުސް، ރާނބާފަތް އަދި ހިކަނދިފަތްކޮޅު އަޅާލުމަށްފަހު ރަތްކޮށްލާށެވެ.  އަދި ރަނގަޅަށް ރަތްވުމުން ހަވާދުކޮޅު އަޅާ އެއްކޮށްލާށެވެ.  އެއަށްފަހު ރަހާލާވަރަށް ލޮނުކޮޅަކާއި އަސޭމިރުސް އެއްކޮށްލާށެވެ. ހިކުނަ ނުދިނުމަށް ފެންފޮދެއް އަޅާލާށެވެ. ބޭނުންނަމަ ފެނުގެ ބަދަލުގައި ކާށި ކިރު ނުވަތަ ފުލްކްރީމްވެސް އަޅާލެވިދާނެއެވެ.

ތައްޔާރުކޮށްލި ހަވާދުގަނޑުގެ ތެރެއަށް ތެލުލާފައިހުރި ކުކުޅުކޮޅު އަޅާ އެއްކޮށްލާށެވެ. އޭރުން އެހުރީ ހަނާކުރި ކުކުޅު ތައްޔާރު ކުރެވިފައެވެ. މިއީ ބަތާއެކު އަދި ފަރާޓާ ނުވަތަ ރޮއްޓާ އެކުވެސް ކާލެވިދާނެ މީރު ކެއުމެކެވެ.