ކުޅިވަރު
ލެގަނޭސް ކޮޅަށް ޖެހި ދެ ގޯލާއެކު ރޮނާލްޑޯގެ ފުރަތަމަ ސީޒަނާ އެމްބައްޕޭ އަރާހަމަކޮށްފި

ލެގަނޭސް ކޮޅަށް ގޯލު ކާމިޔާބުކުރުމަށްފަހު އެމްބައްޕޭ އުފާފާޅުކުރަނީ، ފޮޓޯ: ގެޓީ އިމޭޖަސް
ސްޕެނިޝް ލަ ލީގާގައި ރޭ ލެގަނޭސް 3-2 އިން ބަލިކުރި މެޗުގައި، ރެއާލް މެޑްރިޑްގެ ތަރި، ކީލިއަން އެމްބައްޕޭ ކާމިޔާބުކުރި ދެ ގޯލާއެކު، ރެއާލްއަށް ބަދަލުވުމަށްފަހު ކްރިސްޓިއާނޯ ރޮނާލްޑޯގެ ފުރަތަމަ ސީޒަނުގައި އޭނާ އެ ޓީމަށް ޖަހައިދިން ގޯލުގެ އަދަދާއި އެމްބައްޕޭ އަރާ ހަމަކޮށްފިއެވެ.
މެންޗެސްޓަރ ޔުނައިޓެޑުން ރެއާލްއަށް ބަދަލުވި ފުރަތަމަ ސީޒަނުގައި ރޮނާލްޑޯ ވަނީ 33 ގޯލު ކާމިޔާބުކޮށްފައެވެ. އަދި އެމްބައްޕޭ މި އަދަދަށް މިހާރު ގޯލު ހަމަކޮށްފައިވާއިރު، ސީޒަނުގައި ބާކީ ގިނަ މެޗުތަކެއް އެބައޮތެވެ. އެހެންކަމުން އައިޑަލް ރޮނާލްޑޯއަށް ވުރެ ގިނަ ގޯލު، މިދިޔަ ހޫނު މޫސުމުގައި ރެއާލްއަށް ބަދަލުވި އެމްބައްޕޭ މި ސީޒަނުގައި ކާމިޔާބު ކުރާނެކަމަށް ވަރަށް ބޮޑަށް ބެލެވެއެވެ.
ނަމަވެސް ރެއާލްގެ ތާރީހުގައި ފުރަތަމަ ސީޒަނުގައި އެންމެ ގިނަ ގޯލު ޖެހި ކުޅުންތެރިޔާ ފަހަތަށް ޖައްސާލުމަށް އަދި އެމްބައްޕޭއަށް 4 ގޯލު ބޭނުންވާނެއެވެ. 1992/93 ވަނަ ސީޒަނުގައި ރެއާލްއަށް ކުޅުނު އިވާން ޒަމޮރާނޯ ވަނީ 37 ގޯލު ކާމިޔާބުކޮށްފައެވެ.
ރޮނާލްޑޯގެ ފުރަތަމަ ސީޒަނުގެ ގޯލުގެ އަދަދަށް ހަމަކުރެވުނަސް، ރޮނާލްޑޯގެ ލެގަސީ ފަހާލުމަށް އެމްބައްޕޭއަށް ފަސޭހައެއް ނުވާނެއެވެ. ރޮނާލްޑޯ ވަނީ 2014/15 ވަނަ ސީޒަނުގައި އެ ކްލަބަށް 61 ގޯލު ކާމިޔާބުކޮށްފައެވެ. އެއީ އެއް ސީޒަނެއްގައި އެ ޓީމަށް އޭނާ އެންމެ ގިނަ ގޯލު ކާމިޔާބުކޮށްދިން ފަހަރެވެ.
އެމްބައްޕޭގެ އައިޑޮލްއާ އެއް އަދަދަކަށް ފުރަތަމަ ސީޒަނުގައި ގޯލު ކާމިޔާބުކުރެވުމުން އޭނާ ބުނީ، އެއީ ވަރަށް ޙާއްސަކަމެއް ކަމަށާއި، ނަމަވެސް އެންމެ މުހިންމީ ޓީމުގެ ކާމިޔާބަށް މަސައްކަތް ކުރުން ކަމަށެވެ. އަދި ރޮނާލްޑޯއަކީ އޭނާއަށް ވަރަށް މުހިންމު މީހެއް ކަމަށާއި، ރޮނާލްޑޯގެ ފުށުން ގިނަ ނަސޭހަތްތަކެއް ލިބޭކަމަށް އޭނާ ބުންޏެވެ.