ޚަބަރު
ހޭނުލެވުނު އިމާމުންނަށް ފިޔަވަޅު އަޅަން ނިންމައިފި

ހުޅުމާލޭ އަޒީޒާ މޫސާ މިސްކިތް ---
ހޭނުލެވިގެން މިއަދުގެ ފިޠުރު ޢީދު ނަމާދު ގަޑިއަށް ހާޒިރުނުވެވުނު ދެ އިމާމުންނަށް ފިޔަވަޅު އެޅުމަށް އިސްލާމިކް މިނިސްޓްރީން ނިންމައިފިއެވެ.
މި ދެ އިމާމުންނަކީ ހުޅުމާލޭ އަޒީޒާ މޫސާ މިސްކިތުގައި މިއަދު ޢީދު ނަމާދު ކުރުމަށް ހަމަޖެއްސި އިމާމާއި އެ އިމާމުގެ ބަދަލުގައި ހަމަޖެއްސި އިމާމެވެ.
އެ މިސްކިތަށް މިއަދުގެ ޢީދު ނަމާދަށް ހާޒިރުވި ފަރާތަކުން ހާމަކޮށްފައިވާ ގޮތުގައި، މިސްކިތުގައި މިއަދު ޢީދު ނަމާދު ކުރަން ފަށާފައިވަނީ 7 ޖަހާ 7 މިނެޓު ހިނގިފަހުންނެވެ. ނަމަވެސް ރާއްޖޭގެ ހުރިހާ މިސްކިތެއްގައި ޢީދު ނަމާދުކުރަން ފެށުމަށް ސަރުކާރުން ކަނޑައަޅާފައިވާ ގަޑިއަކީ 7:00 އެވެ.
އިމާމުން ހާޒިރު ނުވުމުން، އެ މިސްކިތުގައި އިމާމުގެ ޢީދު ނަމާދުކުރީ، ނަމާދަށް ހާޒިރުވެއިން އާންމުންގެ ތެރެއިން މީހެކެވެ. އެއީ ބިދޭސީއެއް ކަމަށް ވެއެވެ.
މި މައްސަލައާ ގުޅިގެން އިސްލާމިކް މިނިސްޓަރ، ޑޮކްޓަރ މުޙައްމަދު ޝަޙީމް ޢަލީ ސަޢީދު ވިދާޅުވީ، އަޒީޒާ މިސްކިތުގައި ޢީދު ނަމާދުކުރުމަށް އިމާމުކަން ހަވާލުކޮށްފައިވާ ފަރާތާއި އޭނާގެ ބަދަލުގައި ހަމަޖައްސާފައިވާ ފަރާތް ވެސް މިއަދު މިސްކިތަށް ހާޒިރުނުވާތީވެ، އުސޫލުގެ ތެރެއިން މައްސަލަ ބަލައި، ފަސް އަހަރުދުވަހަށް މި ދެ އިމާމުން ސަސްޕެންޑުކޮށްފައިވާ ކަމަށެވެ.
މި ސަސްޕެންޝަނާ ގުޅިގެން، މި ދެ އިމާމުންނަށް ރާއްޖޭގެ އެއްވެސް ރަށެއްގައި ދެން ޚުޠުބާ ކިޔޭނީ ފަސް އަހަރު ފަހުންނެވެ.
މިނިސްޓަރު ވިދާޅުވީ، އެ އިމާމުންނަށް އެއްވެސް ކަމެއް ދިމާވި ވާހަކަ މިނިސްޓްރީއާ ޙިއްސާކޮށްފައިނުވާކަމަށެވެ. އެހެންކަމުން މިނިސްޓްރީއަށް ނާންގައި ޖަމާޢަތަށް ހާޒިރުނުވާތީވެ، އެ މައްސަލަ ވެސް ވަކިން ބަލައި އުސޫލުގެ ތެރެއިން އިމާމުކަމުގެ ވަޒީފާއިން ސަސްޕެންޑްކުރަން ވެސް ކަމާ ބެހޭ ޔުނިޓަށް އަންގާފައިވާނެ ކަމަށް މިނިސްޓަރ ޝަހީމް ވިދާޅުވިއެވެ.