ޚަބަރު
މަސްތުވާތަކެތީގެ މައްސަލަތައް ކޯޓުގައި ސާބިތުވާ މިންވަރު 95 އިންސައްތައަށް އަރައިފި

ފުލުހުންގެ ބެލުމުގެ ދަށަށް ގެންދެވުނު 5ކިލޯގެ މަސްތުވާތަކެތި ފޮޓޯ:އެޓޯލް ޓައިމްސް
ދިވެހި ފުލުހުންގެ ޚިދުމަތުން ކުރަމުންދާ މަސައްކަތްތަކަށް ގެނެވުނު ބަދަލުތަކާއެކު، ކޯޓުގައި ސާބިތުވާ މަސްތުވާތަކެތީގެ މައްސަލަތަކުގެ އަދަދު އިތުރުވެފައިވާކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.
ޗީފް އިންސްޕެކްޓަރ އޮފް ޕޮލިސް އަޙްމަދު ނާޢިފް ވިދާޅުވީ، 2023 ވަނަ އަހަރާ އަޅާބަލާއިރު 2024 ވަނަ އަހަރު ޑްރަގް އެންފޯސްމަންޓުން ކާމިޔާބު ގިނަ މަސައްކަތްތަކެއް ކޮށްފައިވާ ކަމަށެވެ. އޭގެ ތެރޭގައި ބަލައި ފާސްކުރެވުނު މީހުންގެ އަދަދު 9,300 އިން 12,000 އަށް އިތުރުވެފައިވާކަމަށާއި، އަތުލައިގަނެވުނު މަސްތުވާތަކެތީގެ މިންވަރު 123 ކިލޯއިން 654 ކިލޯއަށް އިތުރުވެފައިވާކަމަށް ވިދާޅުވިއެވެ.
ނާޢިފް އިތުރަށް ފާހަގަކުރެއްވި ގޮތުގައި، 2024 ވަނަ އަހަރު ކްރިމިނަލް ކޯޓުގައި ކުރިއަށްދިޔަ މަސްތުވާތަކެއްޗާ ގުޅުންހުރި މައްސަލަތަކުގެ ތެރެއިން %95 މައްސަލަ ސާބިތުވެފައިވެއެވެ. މިއީ 2023 ވަނަ އަހަރާ އަޅާބަލާއިރު %20 ގެ ކުރިއެރުމެކެވެ. މި ކުރިއެރުން ހާސިލުވެފައިވަނީ ފުލުހުންގެ މަސައްކަތްތައް ބައްޓަންކުރެވިފައިވާ ގޮތަށް ގެނެވުނު ބަދަލުތަކާ ގުޅިގެންކަމަށްވެސް އޭނާ ވިދާޅުވިއެވެ.
ކްރިމިނަލް ކޯޓުގެ ތަފާސްހިސާބުތަކުން ދައްކާގޮތުގައި، 2024 ވަނަ އަހަރު އެ ކޯޓުން ވަނީ މަސްތުވާތަކެއްޗާ ގުޅުންހުރި 137 މައްސަލައެއްގައި ގޮތް ނިންމާފައެވެ. މީގެ ތެރެއިން %95 އަށްވުރެ ގިނަ މައްސަލަތަކުގައި ހުކުމްކޮށްފައިވަނީ ކުށް ސާބިތުވެގެންނެވެ. އަދި 20 ފަރާތެއް އުމުރަށް ޖަލަށްލުމަށާއި 10.2 މިލިއަން ރުފިޔާއިން ޖޫރިމަނާ ކުރުމަށްވެސް ކޯޓުން ވަނީ ހުކުމްކޮށްފައެވެ.
ދިވެހި ފުލުހުންގެ ޚިދުމަތުގެ އަމާޒަކީ މަސްތުވާތަކެއްޗާ ދެކޮޅަށް ކުރެވޭ މަސައްކަތް ރައްޔިތުން ހިތްހަމަޖެހޭ ފެންވަރަށް ގެންދިއުން ކަމަށް ޗީފް އިންސްޕެކްޓަރ އޮފް ޕޮލިސް އަޙްމަދު ނާޢިފް ވިދާޅުވިއެވެ.