މިދިޔަ ހަފްތާގައި މަސްވެރިންނަށް 11.9 މިލިޔަން ރުފިޔާ ދޫކޮށްފި

މިދިޔަ ހަފްތާގައި މަސްވެރިން ކިރުވި މަހަށް 11.9 މިލިޔަން ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް  ކޮމްޕެނީ (މިފްކޯ) އިން ހާމަކޮށްފިއެވެ. މިފްކޯއިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި މިދިޔަ ހަފްތާގައި 177 ދޯންޏަކުން މަސް ކިރުވާފައިވެއެވެ.

މިދިޔަ ހަފްތާއަކީ ރަމަޟާންމަހުގެ ފަހު 10 ދުވަސް ކަމަށްވުމާއެކު، މަހަށް ނުކުތް ދޯނިތަކުގެ އަދަދު އޭގެ ކުރީ ހަފްތާއާ އަޅާބަލާއިރު އިތުރުވެފައިވީނަމަވެސް، މަސްވެރިކަން ދަށްވެފައިވާކަމަށް މިފްކޯއިން ފާހަގަކޮށްފައިވެއެވެ. އޭގެ ކުރީ ހަފްތާގައި މަސްވެރިންނަށް ދޫކޮށްފައިވަނީ 23.5 މިލިޔަން ރުފިޔާއެވެ.

މިފްކޯގެ ތަފާސްހިސާބުތަކުން ދައްކާގޮތުގައި، ފަހުގެ ތާރީޚެއްގައި އެންމެ ގިނަ އަދަދަކަށް މަސް ކިރުވާފައިވަނީ މިއަހަރުގެ މާރިޗް މަހުގެ 8 ވަނަ ދުވަހުއެވެ. އެދުވަހު 40 މަސްދޯންޏަކަށް 7.5 މިލިޔަން ރުފިޔާ ދޫކޮށްފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާ އެއްގޮތަށް، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރަމުންދާކަމަށް މިފްކޯއިން ބުނެއެވެ. މި ވަޢުދު ތަންފީޒުކުރަން ފެށި ފާއިތުވި މަސްވެރިންގެ ދުވަހުން ފެށިގެން މިއަދާ ހަމައަށް 385 މިލިޔަނަށްވުރެ ގިނަ ރުފިޔާ މަސްވެރިންނަށް ދޫކޮށްފައިވާކަމަށްވެސް މިފްކޯއިން ހާމަކޮށްފައިވެއެވެ.

މަސްވެރިކަމުގެ ސިނާއަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާއަތަށް މަސްވެރިކަން ހެދުމަކީ ސަރުކާރުގެ އަމާޒެއްކަމަށް ބުނެއެވެ. މި އަމާޒު ހާސިލްކުރުމަށްޓަކައި ރާއްޖޭގައި މަސް ރައްކާކުރުމުގެ ގާބިލްކަން ދެގުނަ ކުރުމާއި ޕްރޮސެސިންގ ފެސިލިޓީތަކުގެ މަސައްކަތްތައް ކުރިއަށްދާކަމަށް ސަރުކާރުން މަޢުލޫމާތު ދެއެވެ.