ޚަބަރު
ތަރިކައިގެ ހަރަކާތްތައް އަލުން ދިރުވުމުން އަމިއްލަވަންތަކަމާއި ޝަޚްޞިއްޔަތު ދަމަހައްޓައިދޭ : ވަޒީރު އާދަމް ނަސީރު

ހިއްޗަށް ވަޑައިގަތުމުގެ ދަރުބާރު ތަމްސީލުގެ ތެރެއިން ފޮޓޯ:ވުޒާރާ
ތަރިކައިން ނެރެދޭ މާނައަކީ ބައެއްގެ ދިރިއުޅުމުގައި ހުންނަ ހަރުދަނާ ގޮތްތަކާއި ސިފަތައް ކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ފިޠުރު ޢީދުގައި މުނާސަބާ ފާހަގަކުރުމުގެ ގޮތުން "ހިއްޗަށް ވަޑައިގަތުން" އަދުގެ ޖީލަށް ދައްކާދިނުމަށް އެވުޒާރާއިން މާލޭގެ މަގުތަކުގައި ރޭ ބޭއްވި ތަމްސީލީ ހަރަކާތާ ގުޅޭގޮތުން ވާހަކަފުޅުދައްކަވަމުންނެވެ.
ހިއްޗަށް ވަޑައިގަތުމަކީ ރަސްރަސްކަލުން ކުރެއްވި އަދި މިހާރު ރާއްޖޭގައި އުވިގޮސްފައިވާ ރާއްޖޭގެ ތާރީޚާއި ތަރިކައިގެ ބައެކެވެ. މި ތަމްސީލީ ހަރަކާތް ބޭއްވުނީ ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއިން ރާވައިގެން ވިލާ އިންޓަރނޭޝަނަލް ހައި ސްކޫލްގެ ދަރިވަރުންނާއި، އެއަރޕޯޓްސްއާއި، ކަސްޓަމްސްއާއި އެމްއެންޔޫގެ އިތުރުން އެކި މުއައްސަސާތައް ގުޅިގެންނެވެ.
ވަޒީރު އާދަމް ނަސީރު އިބްރާހީމް ވިދާޅުވިގޮތުގައި މި ހަރަކާތް ބައްޓަން ކުރެވިފައިވަނީ ހިއްޗަށްވަޑައިގަތުން ދައްކާލެވޭ ތަމްސީލެއްގެ ގޮތުގައެވެ. އަދި މިކަން ތަމްސީލީގޮތެއްގައި ގެނެސްދެއްވީ ތާރީޚީ ތަޖުރިބާ ކާރެއްކަމަށްވާ ދިވެހި ތާރީޚުގެ އިސްވާރު ކަށިމާ އަހުމަދު ޝާކިރުކަމަށް އެމަނިކުފާނު ފާހަގަކުރެއްވިއެވެ.
ރަސްމީކޮށް މިހަރަކާތް ތާރީޚުގައި ހިނގާގޮތަކީ ރަދުން ބައިވެރިވެވަޑައިގަންނަވާ ރަދުންގެ ރަސްމީ ހަރަކާތެއްގެ ގޮތުގައި. މިކަން އޮންނަނީ ރަމަޟާންމަހުގެ ފަހު 10ގެ ވަކި ދުވަސްތަކެއްގައި ނުވަތަ ރޭތަކެއްގައި. ވަރަށް ކުލަގަދަކޮށް ވަރަށް ހައިބަތު ހުރިގޮތެއްގައި ކުރިއަށް ކުރިއަށްދާކަމެއް
ވަޒީރު
ވަޒީރު އާދަމް ނަސީރު އިތުރަށް ވިދާޅުވީ ތާރީޚީ ގޮތުން މިކަންކަން ގުޅިފައި ހުރިގޮތް ދިރާސާކޮށްބަލަން ޖެހޭކަމަށެވެ. އޭގެ ތެރޭގައި މިކަންކަން އުފެދިގެން އައިގޮތާއި، މިކަންކަމުން ނެގުނު މާނަތަކާއި، ދިވެހިންގެ ދިރިއުޅުމުގެ ހަޔާތުގައި މިކަންކަން އަދާކުރި ދައުރު ހިމެނެއެވެ.
ވަޒީރު ފާހަގަކުރެއްވި ގޮތުގައި ތާރީޚީ މިފަދަ ހަރަކާތްތަކުން ފެނިގެންދަނީ ދިވެހިންގެ އަމިއްލަވަންތަ ސިފައާއި، ދިވެހިންގެ ޝަޚުސިއްޔަތެވެ. އަދި ދިރިއުޅުމުގައި އެންމެން ގުޅިގެން ވެރިންނަށް ކިޔަމަންވެ އެކަކު އަނެކަކަށް ކަމޭހިތާ އެކަކު އަނެކެއްގެ މިނިވަންކަން ދިފާޢުކުރުމުގެ ދާއިރާ ކަނޑައެޅިގެން އެގޮތަށް ދިރިއުޅުން ބައްޓަންކުރުން އެއީ ތާރީޚާއި ތަރިކައިގެ މިފަދަކަންކަމުން ލިބޭ ފިލާވަޅުކަމަށް ވަޒީރު އާދަމް ނަސީރު އިބްރާހީމް ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި މާޒީއަށްބަލާއިރު ހިއްޗަށްވަޑައިގަތުން ތިން ދައުރަކުން ފާހަގަކުރެވެއެވެ. އެއީ އެންމެ ބޯދާ މުސްކުޅިގޮތުގައި ހިއްޗަށް ވަޑަށް ވަޑައިގަތުން އޮތްގޮތާއި، އޭގެފަހުން ޝަމްސުއްދީންގެ ދައުރުގައި މިކަން އޮތްގޮތާއި، މުހައްމަދު ފަރީދުގެ ދައުރުގައި މިކަން އޮތްގޮތެވެ. މީގެއިތުރުން މުހައްމަދު އަމީންވެސް ހިއްޗަށްވަޑައިގެންނެވިކަމަށް ވަޒީރަށް ވަޒީރު ހާމަކުރެއްވިއެވެ.
މި ތަމްސީލީ ހަރަކާތުގައި ހިތިގެއެއް ތައްޔާރުކުރުމާއި، ދަށްފިޔަފާޅި ކިޔާތަނެއް ތައްޔާރުކުރުން ފަދަ އާދަކާދަތައް ހިމެނުނެވެ. މިއީ ކުރީގެ ޒަމާނުގައި މި ރަސްމިއްޔާތުގެ ތެރޭގައި ހިމެނުނު ކަންކަމެވެ.
ވަޒީރު އާދަމް ނަސީރު އިބްރާހީމް ވިދާޅުވިގޮތުގައި މިފަދަ ތަރިކައިގެ ހަރަކާތްތައް އަލުން ދިރުވައި، އަދުގެ ޖީލަށް ދައްކައިދިނުމަކީ ވަރަށް މުހިންމު ކަމެކެވެ. މިކަމުން ދިވެހިންގެ މާޒީއާއި މިހާރު ގުޅުވައިދީ، ދިވެހި އަމިއްލަވަންތަކަމާއި ޝަޚްޞިއްޔަތު ދެމެހެއްޓުމަށް އެހީތެރިވެދެއެވެ.