ފުޓުބޯޅަ ސީޒަން ފަސްކުރަން ނިންމުމުން ގިނަ ކްލަބުތަކުގެ ފަރިތަކުރުންތައް ހުއްޓާލައިފި

މިއަންނަ އެޕްރީލް މަހު ރާއްޖޭގެ ފުޓުބޯޅަ ސީޒަން ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ތައްޔާރުވަމުން ދަނިކޮށް، އެކަން މަޑުޖައްސާލުމަށް ފީފާގެ ފަރާތުން އެންގުމާ ގުޅިގެން، ފުރަތަމަ ޑިވިޝަނުގެ ގިނަ ޓީމުތަކުން ފަރިތަކުރުންތައް ހުއްޓާލައިފިއެވެ.

ފުޓުބޯޅަ ސީޒަން މަޑުޖައްސާލުމަށް ފީފާގެ މެންބަރު އެސޯސިއޭޝަންގެ ސީނިއާ މެނޭޖަރު، މިސްރުގެ އަހްމަދު ހައްރާޒު  އެންގިއިރު، ޔުނައިޓެޑް ވިކްޓްރީ ފިޔަވާ ފުރަތަމަ ޑިވިޝަނުގައި ވާދަކުރާ އެހެން ހުރިހާ ޓީމެއް އޮތީ ފަރިތަކުރުންތައް ފަށާފައެވެ. 

މީގެ އިތުރުން، ކްލަބުތަކުން ކުޅުންތެރިންގެ ސޮއި ހޯދައި، ބިދޭސީ ކުޅުންތެރިންނާއި ކޯޗުން ވެސް ގެނަސްފައިވެއެވެ.

ފީފާގެ ނިންމުން ކްލަބުތަކަށް ޙިއްސާކުރުމަށް އެފްއޭއެމްގެ ނޯމަލައިޒޭޝަން ކޮމެޓީގެ ޗެއާމަން، އަޙްމަދު މުޢިއްޒު ފޮނުއްވި ސިޓީގައި އޮތީ، އޮގަސްޓު މަހަށް ފުޓުބޯޅަ ސީޒަން ފެށުން ފަސްކޮށްފައިވާ ކަމަށާއި، އެކަން އެގޮތަށް ނިންމީ ކޮންމެ އަހަރެއްގެވެސް އޮގަސްޓް މަހު ސީޒަން ފަށައި، އަނެއް އަހަރުގެ މެއި މަހަށް ސީޒަން ނިންމާ ގޮތަށް ހެދުމަށް ފީފާއިން އެންގުމާއި ގުޅިގެން ކަމަށެވެ. އެހެންކަމުން އެ އެސޯސިއޭޝަނުން ކުލަބުތަކާ ހިއްސާކުރި ކަލަންޑަރަށް ބަދަލުގެނެސް، 2025/2026 ގެ ސީޒަނުގެ ގޮތުގައި އަލުން ކަލަންޑަރު އެކުލަވާލުމަށް ފީފާއިން އަންގާފައިވާ ކަމަށްވެސް އެފްއޭއެމްގެ ސިޓީގައި ވަނީ ބުނެފައެވެ.

ފީފާގެ މި ނިންމުމާ ގުޅިގެން ވާދަވެރި މުބާރާތަކާ ނުލައި ދިވެހި ކްލަބްތަކަށް އަނެއްކާ ވެސް ގިނަ ދުވަސްތަކެއް ހޭދަވާނެތީ، އެފްއޭއެމްއިން ވަރަށް އަވަހަށް މުބާރާތެއް ބާއްވަން އުޅޭ ކަމުގެ މަޢުލޫމާތު ވަނީ ލިބިފައެވެ. 

ފުރަތަމަ ޑިވިޝަނުގައި 10 ކްލަބަކުން ވާދަކުރާއިރު، މިހާރު 5 ކްލަބެއްގެ ފަރިތަކުރުންތައް ހުއްޓާލާފައިވާކަމަށް ވަނީ މަޢުލޫމާތު ލިބިފައެވެ. އެއީ ޓީސީ ސްޕޯޓްސް ކުލަބާއި، ވިކްޓަރީ ސްޕޯޓްސް ކުލަބާއި، ކުލަބު ވެލެންސިއާ އާއި، ކުލަބު އީގަލްސް އަދި ކުލަބު ގްރީން ސްޓްރީޓްސް ހިމެނެއެވެ. 

ނަމަވެސް، ޢީދު ބަންދަށް މެދުކަނޑާލުމަށްފަހު  އޮޑި ސްޕޯޓްސް ކުލަބާއި، ބުރު ސްޕޯޓްސް ކުލަބު އަދި ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ވަނީ ފަރިތަކުރުންތައް ކުރިޔަށްގެންދާނެކަމަށް ހާމަކޮށްފައެވެ.

ރާއްޖޭގައި އާންމުކޮށް ސީޒަން ކުޅެ އުޅެނީ އަހަރުގެ ކުރީކޮޅުން ފެށިގެން ގޮސް ނޮވެމްބަރު ނުވަތަ ޑިސެމްބަރަށް ސީޒަން ނިންމާ ގޮތަށެވެ. ނަމަވެސް 2021 ވަނަ އަހަރު ފެށިގެން އެއް ސީޒަނެއްގައި ޔޫރަޕުގެ ގައުމުތަކުގައި އޮންނަ ގޮތަށް ސީޒަން ބަދަލުކުރިއެވެ.