ދުނިޔެ
ޣައްޒާއިން ނުކުތުމުގެ ފުރުސަތު ހަމާސްއަށް ނަތަންޔާހޫ ހުށަހަޅައިފި

އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ ފޮޓޯ:އިންޓަނެޓް
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ފަލަސްތީނުގެ ދިފާއީ ޖަމާއަތް ހަމާސްގެ ލީޑަރުންނަށް ޣައްޒާއިން ނުކުތުމުގެ ފުރުސަތު ހުށަހަޅާފައެވެ. ނަމަވެސް މިއީ ޝަރުތަކާއެކު ދެވޭ ފުރުސަތެކެވެ.
ބައިނަލްއަޤްވާމީ ނޫސް އެޖެންސީއެއްގެ ރިޕޯޓެއްގައި ބުނެފައިވާ ގޮތުގައި އާދީއްތަ ދުވަހު ނެތަނިޔާހޫ ހުށަހެޅި ގޮތުގައި ހަމާސްގެ ލީޑަރުންނަށް ޣައްޒާއިން ނުކުތުމުގެ ފުރުސަތު ލިބޭނީ އެ ޖަމާއަތުން އެމީހުންގެ ހަތިޔާރުތައް ދޫކޮށްލުމުންނެވެ.
ކެބިނެޓް ބައްދަލުވުމެއްގައި އިސްރާއީލުގެ ބޮޑުވަޒީރު ބުނެފައިވަނީ "އަހަރުމެން މަސައްކަތް ކުރަމުން މިދަނީ ހަނގުރާމައިގެ ތެރޭގައި ވެސް މަޝްވަރާކުރުމަށާއި ހަމާސްގެ ސްޓޭންސްގައި ފާހަގަކުރެވޭ ބަދަލުތަކަށް ސަމާލުކަން ދިނުމަށެވެ."
ނަތަނަޔާހޫ އިތުރަށް ބުނެފައިވަނީ ހަމާސްއިން ހަތިޔާރު ދޫކޮށްލައިފިނަމަ އެ ޖަމާއަތުގެ ލީޑަރުންނަށް ޣައްޒާއިން ނުކުތުމުގެ ފުރުސަތު ދެވޭނެ ކަމަށެވެ.
މި ދަނޑިވަޅުގައި އިސްރާއީލުން ވަނީ ޣައްޒާއަށް ދެމުންގެންދާ ހަމަލާތައް ހުއްޓާނުލައި ކުރިއަށް ގެންގޮސްފައެވެ. ރިޕޯޓުތަކުގައި ބުނެފައިވާ ގޮތުގައި އީދު ދުވަހުގައި ވެސް އިސްރާއީލުގެ ބާރުތަކުން ވަނީ އީދު ފާހަގަކުރަމުންދިޔަ ފަލަސްތީނުގެ ރައްޔިތުންނަށް އަމާޒުކޮށް ވައިގެ ހަމަލާތައް ދީފައެވެ. މި ހަމަލާތަކުގައި 30 އަށްވުރެ ގިނަ ފަލަސްތީނުގެ ރައްޔިތުން، އޭގެ ތެރޭގައި ކުޑަކުދިން ހިމެނޭ ގޮތަށް، ޝަހީދުވެފައިވެއެވެ.
ޣައްޒާގެ ސިވިލް ޑިފެންސް އެޖެންސީން ބުނެފައިވާ ގޮތުގައި އިސްރާއީލުގެ ވައިގެ ހަމަލާއެއް އަމާޒުވެފައިވަނީ ގެއަކަށާއި ގެދޮރު ގެއްލިފައިވާ ފަލަސްތީނުގެ ރައްޔިތުންގެ ހިމާޔަތް ކަމުގައިވެފައިވާ ޓެންޓަކަށެވެ.