ޒަކާތަށް ލިބުނު ފައިސާއިން 5 ލައްކަ ރުފިޔާ ޣައްޒާގެ ކުޑަކުދިންނަށް ހަދިޔާކުރަން ނިންމައިފި

މިއަހަރުގެ ފިޠުރު ޒަކާތުގެ ގޮތުގައި ލިބުނު ފައިސާއިން 5 ލައްކަ ރުފިޔާ ޣައްޒާގެ ކުޑަކުދިންނަށް ހަދިޔާކުރުމަށް ދިވެހި ސަރުކާރުން ނިންމަވައިފިއެވެ.

މިކަން ހާމަކުރައްވާފައިވަނީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އެކްސްގައި ކުރެއްވި ޕޯސްޓެއްގައެވެ.

ވަޒީރު ވިދާޅުވީ، ފަޤީރުންގެ ދަފްތަރުގައި ތިބި ކޮންމެ ފަރުދަކަށްވެސް ފިޠުރު ޒަކާތުގެ ގޮތުގައި 4،500 ރުފިޔާ ޖަމާކޮށްދީފައިވާކަމަށެވެ. އަދި މިވަގުތު ފަޤީރުންގެ ދަފްތަރުގައި ތިބީ 2،765 މީހުންކަމަށް ވަޒީރު ވަނީ ވިދާޅުވެފައެވެ. މީގެ އިތުރުން ވަޒީރު ވިދާޅުވީ، މިއަހަރު ފިޠުރު ޒަކާތުގެ ގޮތުގައި ބަހާފައިވަނީ 12.4 މިލިއަން ރުފިޔާ ކަމަށެވެ. 

ވަޒީރު ޑރ. ޝަހީމް ވިދާޅުވީ، މިއަހަރު ފިޠުރު ޒަކާތުގެ ގޮތުގައި ލިބުނު ފައިސާއިން ފަލަސްޠީނުގެ ޣައްޒާގެ ކުޑަކުދިންގެ ކާބޯތަކެއްޗަށް 5 ލައްކަ ރުފިޔާ ހަދިޔާކުރުމަށް ނިންމަވާފައިވާ ކަމަށެވެ. ހަމަ އެހެންމެ، މިއަހަރަކީ ފިޠުރު ޒަކާތުގެ ގޮތުގައި އެންމެ ގިނަ ފައިސާ ލިބުނު އަހަރުކަން ފާހަގަކޮށް ވަޒީރު ވިދާޅުވީ، މިއަހަރު ގޮވާމުން ލިބުނު ޒަކާތުން މާލެ ސަރަޙައްދުގެ ފަޤީރުންގެ ދަފްތަރުގައި ހިމެނޭ ކޮންމެ މީހަކަށް 15 ކިލޯ ދީފައިވާ ކަމަށެވެ.

އިސްލާމީ ކަންތައްތަކާ ބެހޭ ވުޒާރާގެ ތަފާސްހިސާބުތަކުން ދައްކާގޮތުން މިއަހަރު ފިޠުރު ޒަކާތުގެ ގޮތުގައި 13.2 މިލިއަން ރުފިޔާ ވަނީ ލިބިފައެވެ. މީގެ އިތުރުން، މިދިޔަ އަހަރު ޒަކާތުގެ ގޮތުގައި 12.5 މިލިއަން ރުފިޔާ ލިބުނު އިރު، އޭގެ ކުރީ އަހަރު ލިބުނީ 12.6 މިލިއަން ރުފިޔާއެވެ. އަދި 2022 ވަނަ އަހަރު 11.6 މިލިއަން ރުފިޔާ ލިބުނުކަމަށް އިސްލާމިކް ކަންތައްތަކާ ބެހޭ ވުޒާރާއިން  ވަނީ ކުރިން ހާމަކޮށްފައެވެ.