ހުކުރު ދުވަހާއި އަޅާބަލާއިރު ހޮނިހިރު ދުވަހު ޕީކް ގަޑިތަކުގައި ކަރަންޓު ބޭނުންކުރި މިންވަރު އިތުރު: ސްޓެލްކޯ

މިދިޔަ ހުކުރު ދުވަހާއި އަޅާބަލާއިރު ހޮނިހިރު ދުވަހު ޕީކް ގަޑިތަކުގައި ކަރަންޓު ބޭނުންކުރި މިންވަރު އިތުރުވެފައިވާކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯގެ ތަފާސް ހިސާބުތަކުން ދައްކައިފިއެވެ.

ސްޓެލްކޯގެ ތަފާސްހިސާބުތަކުން ދައްކާގޮތުގައި، ހޮނިހިރު ދުވަހުގެ އެންމެ ޕީކް ގަޑީގައި 104 މެގަވޮޓާއި ގާތްކުރާ އަދަދަކަށް ކަރަންޓު ވަނީ ބޭނުންކުރެވިފައެވެ. ހަމަ އެހެންމެ، އެދުވަހު އެންމެ ގިނައިން ކަރަންޓު ބޭނުންކޮށްފައިވަނީ ހަވީރު 16:00 ގައި ކަމަށް ސްޓެލްކޯގެ ތަފާސްހިސާބުތަކުން ދައްކައެވެ. އެގޮތުން، އެ ގަޑީގައި ކަރަންޓު ބޭނުންކޮށްފައިވާ މިންވަރު ވަނީ 103.8 މެގަވޮޓަށް އަރައިފައެވެ.

ރަމަޟާން މަހު ކަރަންޓުން %10ގެ ޑިސްކައުންޓު ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވުމާ ގުޅިގެން، މި ޑިސްކައުންޓު އެއް ބިލެއްގައި ހިމަނައި، ކަރަންޓު ބިލަށް އަންނަ ބަދަލު ރައްޔިތުންނަށް ކަށަވަރުކޮށްދެއްވުމަށް ސްޓެލްކޯއިން ވަނީ މުޅި ރަމަޟާން މަހަށް ވަކިން ބިލް އަންނަގޮތަށް ރީޑިން ނަގާ ތާރީޚް ހަމަޖައްސާފައެވެ. އެގޮތުން ދެން ލިބޭ ބިލެއްގައި ހިމެނޭނީ މި މަހުގެ 1 އިން 31 އަށް ކަރަންޓު ބޭނުންކޮށްފައިވާ މިންވަރަށް ބަލައި ތައްޔާރުކޮށްފައިވާ ބިލެވެ.

ސްޓެލްކޯއިން ވަނީ، ކަރަންޓު ބޭނުންކުރާ މިންވަރު އިތުރުކަމަށް ފާހަގަ ކުރެވިފައިވާ ގަޑިތަކުގައި ކަރަންޓު އިގްތިޞާދު ކުރުމަށް ޚާއްޞަ ސަމާލުކަމެއް ދިނުމަށް އިލްތިމާސްކުރައްވާފައެވެ.

މާލެއާއި، ހުޅުމާލޭގައި ހޮނިހިރުދުވަހު ދުވަހު ޕީކް ގަޑިތަކުގައި ކަރަންޓު ބޭނުންކުރެވުނު މިންވަރުވަނީ ހުކުރު ދުވަހާ އަޅާބަލާއިރު އިތުރުވެފައި. އެގޮތުން ހޮނިހިރު ދުވަހު އެންމެ ޕީކް ގަޑީގައި 104 މެގަވޮޓާއި ގާތްކުރާ އަދަދަކަށް ވަނީ ކަރަންޓު ބޭނުންކުރެވިފައި. pic.twitter.com/wVJfyUtrVv

— STELCO (@STELCOMALDIVES) March 30, 2025