އައްޑޫގެ ކަރަންޓު މައްސަލަ ހައްލުކުރަން އަލަށް ގެނައި ޖަނަރޭޓަރު މިއަދު އޮޕަރޭޝަނަށް ގެންނަނީ

އައްޑޫ ސިޓީއަށް އަލަށް ގެންދިޔަ 1.8 މެގަވޮޓުގެ ޖަނަރޭޓަރު މިއަދު އޮޕަރޭޝަނަށް ގެނެވޭނެކަމަށް ފެނަކަ ކޯޕަރޭޝަނުން  ބުނެފިއެވެ. މި ޖަނަރޭޓަރަކީ އިންޑިއާއިން ގެނެސް، މިދިޔަ ބުރާސްފަތި ދުވަހުގެ ރޭ އައްޑޫ ސިޓީއަށް ގެންދެވުނު ޖަނަރޭޓަރެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ނަޖާހު ވިދާޅުވި ގޮތުގައި، މި އަލަށް ގެނެވުނު ޖަނަރޭޓަރު މިހާރު ވަނީ އިންސްޓޯލްކޮށް ނިމިފައެވެ. އަދި މިއަދު މި ޖަނަރޭޓަރު އޮޕަރޭޝަނަށް ގެނެވޭނެ ކަމަށް އޭނާ ވިދާޅުވިއެވެ. މީގެ އިތުރުން، އައްޑޫގައި ހަލާކުވެފައި ހުރި 3 ޖަނަރޭޓަރުގެ ތެރެއިން 1 ޖަނަރޭޓަރު މަރާމާތުކޮށް، އެ ޖަނަރޭޓަރުވެސް މިއަދު އޮޕަރޭޝަނަށް ގެނެވޭނެކަމަށް ނަޖާހު ހާމަކުރެއްވިއެވެ.

އައްޑޫ ސިޓީގައި ކަރަންޓުގެ މައްސަލަ ދިމާވަން ފެށީ، އެ ސިޓީގައި ބޭނުންކުރަމުންދިޔަ 19 ޖަނަރޭޓަރުގެ ތެރެއިން ގިނަ ޖަނަރޭޓަރުތައް އޯވަހޯލް ނުކޮށް ދިގުލައިގެން ދިއުމުގެ ސަބަބުން ހަލާކުވުމާ ގުޅިގެންނެވެ. މި މައްސަލައާ ގުޅިގެން ފާއިތުވި 3 މަސްދުވަހުގެ ތެރޭގައި ފެނަކައިން ވަނީ އައްޑޫ ސިޓީއަށް 3 ޖަނަރޭޓަރު ފޮނުވާފައެވެ.

އައްޑޫ ސިޓީގައި ޕީކް ވަގުތުގައި ކަރަންޓުގެ ލޯޑު 11.6 މެގަވޮޓަށް އަރާއިރު، މިހާރު ބޭނުންކުރާ އެންމެ ބޮޑު ޖަނަރޭޓަރުގެ ސައިޒަކީ 2 މެގަވޮޓެވެ. އެ ސިޓީގައި ގިނައިން ހުރީ 1.8 މެގަވޮޓް ނުވަތަ އެއަށްވުރެ ކުދި ސައިޒުގެ ޖަނަރޭޓަރުތަކެވެ.

ފެނަކައިގެ މެނޭޖިން ޑިރެކްޓަރު ވިދާޅުވި ގޮތުގައި، އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލެއް ހޯދުމަށް ފެނަކައާއި ރައީސުލްޖުމްހޫރިއްޔާގެ އޮފީހުގެ އިތުރުން ކަމާ ގުޅުންހުރި އިދާރާތަކާ ގުޅިގެން މަސައްކަތްތަކެއް ކުރަމުންދެއެވެ. އަދި މި މަސައްކަތުގެ މަޢުލޫމާތު ވަރަށް އަވަހަށް އާންމުކުރާނެ ކަމަށްވެސް އޭނާ ވިދާޅުވިއެވެ.