އެމެރިކާގެ އިންޒާރަށް ، އިރާނުގެ ހަރުކަށި ރައްދެއް

އެމެރިކާގެ ރައީސް ޑޮނަލްޑް ޓްރަމްޕް އިރާނަށް ސިފައިން ފޮނުވައިގެން ހަމަލާ ދޭނެކަމަށް ބިރުދެއްކުމާ ގުޅިގެން، އިރާނުގެ އެންމެ މަތީ ވެރިޔާ އާޔަތުއްލާ ޚާމެނީ ވަރަށް ހަރުކަށި ބަހުރުވައަކުން ރައްދު ދެއްވައިފިއެވެ.

ނިއުކްލިއަރ އެއްބަސްވުމަކަށް އިރާނުން އެއްބަސް ނުވެއްޖެނަމަ، އެ ގައުމަށް ހަމަލާ ދީ، ހަރުކަށި އިގްތިސާދީ ފިޔަވަޅުތަކެއް އަޅާނެ ކަމަށް ޓްރަމްޕް ބުނެފައިވެއެވެ.

މިކަމަށް ރައްދު ދެއްވަމުން އާޔަތުއްލާ ޚާމެނީ ވިދާޅުވީ، އެމެރިކާ އާއި އިސްރާއީލާ ދެކޮޅަށް އިރާނުގެ ދެކޮޅުވެރިކަން ދެމިއޮންނާނެ ކަމަށާއި، އެމެރިކާއިން އެފަދަ ކަމެއް ކޮށްފިނަމަ، އިރާނުން ވަރަށް ހަރުކަށި ގޮތަކަށް ޖަވާބު ދޭނެ ކަމަށެވެ.

މީގެ އިތުރުން، އިރާނުގައި އިންގިލާބެއް ގެނައުމަށް މަސައްކަތް ކުރާނަމަ، އިރާނުގެ ރައްޔިތުން އަމިއްލައަށް އެކަން ބަލަހައްޓާނެ ކަމަށްވެސް ޚާމެނީ ވިދާޅުވިއެވެ.

ޝައުގުވެރިކަން އުފެދޭ ކަމަކީ، ޓްރަމްޕް އިރާނަށް ސިޓީއެއް ފޮނުވައި، ނިއުކްލިއަރ އެއްބަސްވުމަކަށް އެއްބަސްވުމަށް އެދިފައިވާ ކަމެވެ. ނަމަވެސް، މިކަމަށް ރައްދު ދެއްވަމުން ޚާމެނީ އާއި އިރާނުގެ ރައީސް މަސްއޫދު ޕެޒެޝްކިއަން ވިދާޅުވެފައިވަނީ، އެމެރިކާއާ ސީދާ މަޝްވަރާކުރުމަށް އިރާނުން ތައްޔާރު ނޫން ކަމަށެވެ. އެހެންނަމަވެސް، ނުސީދާކޮށް މަޝްވަރާކުރުމުގެ ފުރުސަތު އޮތް ކަމަށް އެ ބޭފުޅުން ވިދާޅުވެފައިވެއެވެ.