ޣައްޒާގެ ޢީދުގެ އުފާވެރިކަން އިޒްރޭލުން ގެއްލުވާލާ 20 މީހުން ޝަހީދުކޮށްލައިފި

ޣައްޒާގެ އުފާވެރި ޢީދު ދުވަސް އަނެއްކާވެސް ހަނގުރާމައިގެ ހިޔަނިގަނޑުގެ ދަށުގައި ފާހަގަކުރަން ޖެހުނީ އިސްރާއީލުގެ ވައިގެ ޙަމަލާތަކުގައި މަދުވެގެން 20 ފަލަސްޠީނުން ޝަހީދުވުމާ އެކުގައެވެ.

ޚަބަރުތަކުގައިވާ ގޮތުން، 28 އަހަރުގެ މަންމައެއް ކަމަށްވާ ނަހްލާ އަބޫ މަޠަރު  ހިތާމައާއެކު ކިޔައިދިނެވެ. އޭނާ ބުނީ ކުރިން ޢާއިލާތައް އެއްވެ އުފާ ފާޅުކުރި ޢީދު މިހާރު ވަނީ ވަކިވުމާއި ޤަބުރުސްތާނަށް ޒިޔާރަތްކުރާ ދުވަހަކަށް ބަދަލުވެފައި ކަމަށެވެ. އުތުރު ޣައްޒާގެ އެހެން މިލިއަނުން ގުނޭ މީހުންނެކޭ އެއްފަދައިން، އޭނާވެސް މިހާރު ދިރިއުޅެމުން ދަނީ ދެކުނުގެ ޚާން ޔޫނިސް ސިޓީގައެވެ.

އޭނާ ހިތާމަކުރީ ކުރިން މީހުން ނަމާދުކުރި މިސްކިތްތައް މިހާރު ވަނީ ވީރާނާވެ ބިންމައްޗަށް ވެއްޓި، ކުރިން މީހުން އެއްވެ އުޅުނު ތަންތަން މިހާރު ވަނީ ހަށިގަނޑުތަކުން ފުރިފައިވާ ބިންތަކަކަށް ބަދަލުވެފައި ކަމަށެވެ.

8 މީހުން ޝަހީދުވި، އޭގެ ތެރޭގައި 5 ކުޑަކުދިން

ޣައްޒާގެ ކުއްލި ނުރައްކަލުގެ ޙާލަތުގައި މަސައްކަތްކުރާ ޓީމުތަކުން ބުނާ ގޮތުގައި އާދީއްތަ ދުވަހުގެ ފަތިހު ޚާން ޔޫނިސްގައި އިސްރާއީލުން ދިން ވައިގެ ޙަމަލާއެއްގައި 8 މީހުން ޝަހީދުވެފައިވެއެވެ. އޭގެ ތެރޭގައި 5 ކުޑަކުދިން ހިމެނެއެވެ.

އަބޫ މަޠަރު ހަނދާންކޮށްދިނީ ޢީދު ނަމާދުގެ އަޑުން ހޭލެވުމުގެ ބަދަލުގައި މީހުން ހޭލެވުނީ ވައިގެ ޙަމަލާތަކާއި ގޮވުންތަކުގެ އަޑުން ކަމަށެވެ.

މި ޙާލަތުގައިވެސް ޣައްޒާގެ ގިނަ ބަޔަކު ވަނީ ޢީދު ނަމާދުގެ އާދަކާދަ ދެމެހެއްޓުމަށް މަސައްކަތް ކޮށްފައެވެ. ބައެއް މީހުން ހުސް ބިންތަކުގައި އެއްވެ، ވީރާނާވެފައިވާ މަގުތަކުގައި މުސައްލަ އަޅައިގެން ނަމާދުކުރިއެވެ. އަނެއްބައި މީހުން ނަމާދުކުރީ ހަލާކުވެފައިވާ މިސްކިތްތަކުގައެވެ. އޭގެ ތެރޭގައި ހިމެނެނީ ތާރީޚީ ޢުމަރީ މިސްކިތެވެ. މި މިސްކިތުގެ ފާރުތައް ވަނީ ދެމުންދާ ބޮމުގެ ހަމަލާތަކުގެ ސަބަބުން ވެއްޓިފައެވެ.

އެތައްހާހުން ގުނާ ނިކަމެތިން ވަގުތީ ކޭމްޕުތަކުގައި ތޮއްޖެހިފައި ތިބި ތަންތަނުގައި ނަމާދު ކުރެވުނީ ވަރަށް ދަތި އިންސާނީ ޙާލަތެއްގައެވެ.

މެދު ޣައްޒާގެ ނުސައިރާތު ރެފިއުޖީ ކޭމްޕުގައި ގިނަ ބަޔަކު ވަނީ ހަނގުރާމައިގައި ޝަހީދުވެފައިވާ އާއިލާގެ ލޮބުވެތި މީހުންގެ ޤަބުރުތަކަށް ޒިޔާރަތްކޮށްފައެވެ. އެމީހުން ދުޢާކުރަމުން ދިޔައިރު، އުޑުމަތީގައި ހަތިޔާރުތަކުގެ އަޑާއި ޑްރޯންތަކުގެ އަޑު ގުގުމަމުން ދިޔައެވެ.

މީޑިއާތަކުން ޞިއްޙީ އިދާރާތަކާ ޙަވާލާދީ ބުނާ ގޮތުގައި އާދީއްތަ ދުވަހުގެ ފަތިހުން ފެށިގެން އިސްރާއީލުގެ ސިފައިންގެ ޙަމަލާތަކުގައި 20 މީހުން ޝަހީދުވެފައިވެއެވެ. އޭގެ ތެރޭގައި 5 ކުޑަކުދިން ހިމެނެއެވެ. ޞައްޙަކަން ކަށަވަރުކުރެވިފައިވާ ވީޑިއޯއެއްގައި ދައްކާ ގޮތުން، އަލް-މަވާސީގައި ދެވުނު ވައިގެ ޙަމަލާއެއްގައި ޝަހީދުވި 3 ކުޑަ އަންހެން ކުދިން ޝަހީދުވިއިރު އަޅާފައި ހުރީ އައު ޢީދު ހެދުމެވެ.

މިކަން މިހެން ދެމިގެންދާނީ ކިހާ ދުވަހަކު ހެއްޔެވެ؟

ޣައްޒާ ސިޓީގެ ރައްޔިތެއް ކަމަށްވާ ޢިއްޒުއްދީން މޫސާ ބުނީ މީހުންގެ މެދުގައި ފެތުރިފައިވާ ބިރުވެރިކަމުގެ ވާހަކައެވެ. އޭނާ ބުނީ މީހުން ބިރުގަންނަނީ އެކަކު އަނެކަކާ ބައްދަލުވުމަށް ވެސް ކަމަށެވެ. އެއީ ކޮންމެ ވަގުތެއްގައިވެސް ރޮކެޓް ޙަމަލާއެއްގައި އެމީހުންގެ ފުރާނަ ގެއްލިދާނެތީއެވެ.

އޭނާ އިތުރަށް ބުނީ ކުޑަކުދިންގެ ލޮލުން ފެންނަނީ  ބިރުވެރިކަން ކަމަށެވެ. ނަމަވެސް ޢާއިލާތަކުން ވީހާވެސް ބޮޑަށް މަސައްކަތް ކުރަނީ މި ޙާލަތުގައިވެސް ކުދިން އުފާވެރިކޮށް ބޭތިއްބުމަށް ކަމަށެވެ. މާރޗް 18 ގައި އިސްރާއީލުން ވަނީ ހަފުތާތަކެއް ވަންދެން ދެމިގެން ދިޔަ ހަނގުރާމަ ހުއްޓުމަކަށް ގެނެސް، އަލުން ހަނގުރާމަ ފަށާފައެވެ.

ޙަމާސް ހިންގާ ޞިއްޙަތާއި ބެހޭ މިނިސްޓްރީން ބުނާ ގޮތުގައި އިސްރާއީލުގެ ސިފައިންގެ ޢަމަލުތައް އަލުން ފެށުނު ފަހުން 900 އަށްވުރެ ގިނަ މީހުން ވަނީ ޣައްޒާގައި ޝަހީދުވެފައެވެ. އޮކްޓޯބަރު 2023 އިން ފެށިގެން މަދުވެގެން 50،277 މީހުން ވަނީ އިސްރާއީލުގެ ސިފައިންގެ އަނިޔާވެރިކަމުން ޝަހީދުވެފައެވެ. އޭގެ ތެރެއިން ގިނައީ އަންހެނުންނާއި ކުޑަކުދިންނެވެ.

ރެޑް ކްރެސެންޓުގެ މެންބަރުންވެސް ޝަހީދުންގެ ތެރޭގައި

އަލް ޖަޒީރާއިން ރިޕޯޓުކުރާ ގޮތުގައި ފަލަސްޠީނު ރެޑް ކްރެސެންޓް ސޮސައިޓީން ވަނީ އާދީއްތަ ދުވަހު ރަފަޙްގައި އިތުރު 11 ހަށިގަނޑު ފެނުނު ކަމަށް ކަށަވަރުކޮށްދީފައެވެ. އޭގެ ތެރެއިން 6 މީހުންނަކީ ރެޑް ކްރެސެންޓުގެ މުވައްޒަފުންނެވެ. އަދި 4 މީހުންނަކީ ސިވިލް ޑިފެންސް އޭޖެންސީގެ މުވައްޒަފުންނެވެ. އެމްބިއުލާންސް ޚިދުމަތުން ބުނީ އެ ޚިދުމަތުގެ 3 މެޑިކަލް މުވައްޒަފުންނާއި ސިވިލް ޑިފެންސްގެ އެއް އޮފިސަރު ގެއްލިފައިވާ ކަމަށެވެ.

މަންޒަރު ލޮލުން ދުށް މީހުންނާއި މެޑިކަލް މުވައްޒަފުން ބުނާ ގޮތުގައި އިސްރާއީލުގެ ވައިގެ ޙަމަލާތައް ވަނީ  ޚާން ޔޫނިސްއާއި ޣައްޒާގެ އެހެން ސަރަޙައްދުތަކުގައި ކުރިއަށް ގޮސްފައެވެ. ރަފަޙްގައި ވަކިން ދެވުނު އެހެން ވައިގެ ޙަމަލާއެއްގައި ދެ ކުޑަކުދިން ވަނީ ޒަޚަމުވެފައެވެ.