ޣައްޒާގައި އީދު ފާހަގަކުރަނީ ހިތާމައާއި ބަނޑުހައިހޫނުކަމުގެ ތެރޭގައި

ޣައްޒާގެ ފަލަސްޠީނު ރައްޔިތުން އާދީއްތަ ދުވަހު އީދުލް ފިޠުރު ފާހަގަކުރީ ކާބޯތަކެތި މަދުވަމުންދާ ދަނޑިވަޅެއްގައެވެ. އަދި އިޒްރާއީލުގެ އެންމެ ފަހުގެ ޖައްވީ ހަމަލާގައި މަރުވި ކުޑަކުދިންނާއި މެދު ހިތާމަކުރަމުންނެވެ.

ރަފާ ސިޓީގައި އިޒްރާއީލުން ދިން ހަމަލާއެއްގައި މަރުވި 14 އިމަޖެންސީ އެހީތެރިންގެ ހަށިގަނޑުތައް ހޯދުމާ ގުޅިގެން ރައްޔިތުންގެ ކަންބޮޑުވުން އިތުރުވެފައިވެއެވެ. އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސްއިން ބުނެފައިވަނީ މިއީ 2017 އިން ފެށިގެން ރެޑް ކްރޮސް ރެޑް ކްރެސެންޓްގެ މަސައްކަތްތެރިންނަށް އަމާޒުކޮށް ދެވުނު އެންމެ ވަރުގަދަ މަރުގެ ހަމަލާ ކަމަށެވެ.

ފަލަސްޠީނުގެ ގިނަ ރައްޔިތުން ރަމަޟާން މަހުގެ ނިމުން ފާހަގަކުރުމަށް ނަމާދުކުރީ ވީރާނާވެފައިވާ މިސްކިތްތަކުގެ ބޭރުގައެވެ. އީދަކީ އާންމުކޮށް އުފާވެރި މުނާސަބަތެއް ނަމަވެސް، ޣައްޒާގެ ގިނަ ރައްޔިތުން މިވަގުތު މަސައްކަތް ކުރަމުންދަނީ ދިރިހުރުމަށެވެ.

"މިއީ ހިތާމައިގެ އީދެއް،" ޑެއިރް އަލް-ބަލާހުގައި ވީރާނާވެފައިވާ ސަރަހައްދެއްގައި ނަމާދުކުރުމަށްފަހު އަދެލް އަލް-ޝާއިރު ބުންޏެވެ. "އަހަރެމެންގެ ލޮބުވެތި، ދަރިންގެ، ދިރިއުޅުން އަދި މުސްތަޤުބަލު ގެއްލިއްޖެ."

އިޒްރާއީލުން ހަމާސްއާއެކު ހަދާފައިވާ އެއްބަސްވުން  ނިމުމަކަށް ގެނެސް، 17 މަސްދުވަހުގެ ހަނގުރާމަ އަލުން ފެށީ މި މަހުގެ ކުރީކޮޅުގައެވެ. އޭގެ ފަހުން އިޒްރާއީލުން ޣައްޒާއަށް ކާބޯތަކެތި، ތެޔޮ އަދި އިންސާނީ އެހީ ވަނުމަށް ހުއްދަ ދީފައެއް ނުވެއެވެ.

"މަރުވުމާއި، ގެދޮރު ދޫކޮށްދިއުމާއި، ބަނޑުހައިހޫނުކަމާއި، ހުރަސްތައް އެބައޮތް،" ނަމާދުކުރި ސައީދް އަލް-ކޫރުދު ބުންޏެވެ. "އަޅުގަނޑުމެން ނުކުންނަނީ ކުޑަކުދިން އުފާކޮށްދިނުމަށް އަޅުކަން އަދާކުރުމަށް. އެކަމަކު އީދުގެ އުފާވެރިކަން؟ އީދެއް ނެތް."