އެންމެ ދަތި ޙާލަތުގައިވެސް ޣައްޒާގެ ގިނަ ބަޔަކު ޢީދު ނަމާދުގެ އާދަކާދަ ދެމެހެއްޓި

އިސްރާއީލުގެ ހަނގުރާމައިގެ ސަބަބުން ޣައްޒާގެ ރައްޔިތުން ދަތި ޙާލަތެއްގައި ތިބި ނަމަވެސް، ގިނަ ބަޔަކު ވަނީ ޢީދު ދުވަހު ޢީދު ނަމާދުގެ އާދަކާދަ ދެމެހެއްޓުމަށް މަސައްކަތް ކޮށްފައެވެ.

ޣައްޒާގެ ރައްޔިތެއްކަމަށްވާ އަބޫ މަޠަރު ހިތާމަޔާއެކު ފާހަގަކުރި ގޮތުގައި، ކުރިން މީހުން ނަމާދުކުރި މިސްކިތްތައް މިހާރު ވަނީ ވީރާނާވެ ބިންމައްޗަށް ވެއްޓިފައެވެ. އަދި ކުރިން މީހުން އެއްވެ އުޅުނު ތަންތަން މިހާރު ވަނީ ހަށިގަނޑުތަކުން ފުރިފައިވާ ބިންތަކަކަށް ބަދަލުވެފައި ކަމަށް އޭނާ ބުންޏެވެ. އަބޫ މަޠަރު އިތުރަށް ހަނދާންކޮށްދިނީ ޢީދު ނަމާދުގެ އަޑުން ހޭލެވުމުގެ ބަދަލުގައި މީހުން ހޭލެވުނީ ވައިގެ ޙަމަލާތަކާއި ގޮވުންތަކުގެ އަޑުން ކަމަށެވެ.

ޣައްޒާގެ ކުއްލި ނުރައްކަލުގެ ޙާލަތުގައި މަސައްކަތްކުރާ ޓީމުތަކުން ބުނާ ގޮތުގައި އާދީއްތަ ދުވަހުގެ ފަތިހު ޚާން ޔޫނިސްގައި އިސްރާއީލުން ދިން ވައިގެ ޙަމަލާއެއްގައި 8 މީހުން ޝަހީދުވެފައިވެއެވެ. އޭގެ ތެރޭގައި 5 ކުޑަކުދިން ހިމެނެއެވެ.

މި ދަތި ޙާލަތުގައިވެސް، ޣައްޒާގެ ގިނަ ރައްޔިތުން ވަނީ ޢީދު ނަމާދުގެ އާދަކާދަ ދެމެހެއްޓުމަށް މަސައްކަތް ކޮށްފައެވެ. ބައެއް މީހުން ހުސް ބިންތަކުގައި އެއްވެ، ވީރާނާވެފައިވާ މަގުތަކުގައި މުސައްލަ އަޅައިގެން ނަމާދުކުރިއެވެ. އަނެއްބައި މީހުން ނަމާދުކުރީ ހަލާކުވެފައިވާ މިސްކިތްތަކުގައެވެ. އޭގެ ތެރޭގައި ހިމެނެނީ ތާރީޚީ ޢުމަރީ މިސްކިތެވެ. މި މިސްކިތުގެ ފާރުތައް ވަނީ ދެމުންދާ ބޮމުގެ ހަމަލާތަކުގެ ސަބަބުން ވެއްޓިފައެވެ.

އެތައްހާހުން ގުނާ ނިކަމެތިން ވަގުތީ ކޭމްޕުތަކުގައި ތޮއްޖެހިފައި ތިބި ތަންތަނުގައި ނަމާދު ކުރެވުނީ ވަރަށް ދަތި އިންސާނީ ޙާލަތެއްގައެވެ. މެދު ޣައްޒާގެ ނުސައިރާތު ރެފިއުޖީ ކޭމްޕުގައި ގިނަ ބަޔަކު ވަނީ ހަނގުރާމައިގައި ޝަހީދުވެފައިވާ އާއިލާގެ ލޮބުވެތި މީހުންގެ ޤަބުރުތަކަށް ޒިޔާރަތްކޮށްފައެވެ. އެމީހުން ދުޢާކުރަމުން ދިޔައިރު، އުޑުމަތީގައި ހަތިޔާރުތަކުގެ އަޑާއި ޑްރޯންތަކުގެ އަޑު ގުގުމަމުން ދިޔައެވެ.