ކުޑަ 3 އަންހެން ކުދިން ޝަހީދުވިއިރު އަޅާފައި ހުރީ އައު ޢީދު ހެދުން

ޣައްޒާގައި ޢީދު ދުވަހު އިސްރާއީލުން ދިން ޙަމަލާތަކުގައި 20 މީހުން ޝަހީދުވެއްޖެއެވެ. މީގެ ތެރޭގައި 5 ކުޑަކުދިން ހިމެނެއެވެ. މީޑިއާތަކުން ޞިއްޙީ އިދާރާތަކާ ޙަވާލާދީ ބުނާ ގޮތުގައި މި ޙަމަލާތައް ފެށުނީ އާދީއްތަ ދުވަހުގެ ފަތިހުއެވެ.

ޞައްޙަކަން ކަށަވަރުކުރެވިފައިވާ ވީޑިއޯއެއްގައި ދައްކާ ގޮތުން، އަލް-މަވާސީގައި ދެވުނު ވައިގެ ޙަމަލާއެއްގައި ޝަހީދުވި 3 ކުޑަ އަންހެން ކުދިން ޝަހީދުވިއިރު އަޅާފައި ހުރީ އައު ޢީދު ހެދުމެވެ. 

އަލް ޖަޒީރާއިން ރިޕޯޓުކުރާ ގޮތުގައި ފަލަސްޠީނު ރެޑް ކްރެސެންޓް ސޮސައިޓީން ވަނީ އާދީއްތަ ދުވަހު ރަފަޙްގައި އިތުރު 11 ހަށިގަނޑު ފެނުނު ކަމަށް ކަށަވަރުކޮށްދީފައެވެ. މީގެ ތެރެއިން 6 މީހުންނަކީ ރެޑް ކްރެސެންޓުގެ މުވައްޒަފުންނެވެ. އަދި 4 މީހުންނަކީ ސިވިލް ޑިފެންސް އޭޖެންސީގެ މުވައްޒަފުންނެވެ.

މަންޒަރު ލޮލުން ދުށް މީހުންނާއި މެޑިކަލް މުވައްޒަފުން ބުނާ ގޮތުގައި އިސްރާއީލުގެ ވައިގެ ޙަމަލާތައް ވަނީ ޚާން ޔޫނިސްއާއި ޣައްޒާގެ އެހެން ސަރަޙައްދުތަކުގައި ކުރިއަށް ގޮސްފައެވެ. ރަފަޙްގައި ވަކިން ދެވުނު އެހެން ވައިގެ ޙަމަލާއެއްގައި ދެ ކުޑަކުދިން ވަނީ ޒަޚަމުވެފައެވެ.

މި ޙާލަތުގައިވެސް ޣައްޒާގެ ގިނަ ބަޔަކު ވަނީ ޢީދު ނަމާދުގެ އާދަކާދަ ދެމެހެއްޓުމަށް މަސައްކަތް ކޮށްފައެވެ. ބައެއް މީހުން ހުސް ބިންތަކުގައި އެއްވެ، ވީރާނާވެފައިވާ މަގުތަކުގައި މުސައްލަ އަޅައިގެން ނަމާދުކުރިއެވެ. އަނެއްބައި މީހުން ނަމާދުކުރީ ހަލާކުވެފައިވާ މިސްކިތްތަކުގައެވެ.

މި ޙަމަލާތަކުގެ ސަބަބުން ޢީދުގެ އުފާވެރިކަން ގެއްލި، ޣައްޒާގެ ރައްޔިތުން ވަނީ ބިރުވެރިކަމާއި ހިތާމައިގެ ތެރެއަށް ވެއްޓިފައެވެ. ޢީދު ނަމާދުގެ އަޑުން ހޭލެވުމުގެ ބަދަލުގައި މީހުން ހޭލެވުނީ ވައިގެ ޙަމަލާތަކާއި ގޮވުންތަކުގެ އަޑުންނެވެ.