ސްރީލަންކާގައި ދިރިއުޅޭ ދިވެހިން ބޮޑު ޖަމާޢަތުގައި ޢީދު ނަމާދު ކޮށްފި

ސްރީލަންކާގައި ދިރިއުޅޭ ދިވެހިން ބައިވެރިވެގެން ބޮޑު ޖަމާޢަތުގައި ފިޠުރު ޢީދު ނަމާދު ކޮށްފިއެވެ.

ބޮޑު ޖަމާޢަތުގައި ފިޠުރު ނަމާދު ކޮށްފައިވަނީ، މޯލްޑިވްސް ކަލްޗަރަލް ސެންޓަރ، ސޯސަން ވިލާގައެވެ. ޢީދު ނަމާދު ކުރުމަށްފަހު މޯލްޑިވްސް ކަލްޗަރަލް ސެންޓަރުގެ  ޚާއްޞަ އިންތިޒާމުގެ ދަށުން އެ ސަރަޙައްދުގައި ވަނީ ޢީދު ސައެއް ވެސް ބާއްވާފައެވެ. މިއަހަރުގެ ފިޠުރު ޢީދު ސައިގައިވެސް ލަންކާގައި ދިރިއުޅޭ ގިނަ އަދަދެއްގެ ދިވެހިން ވަނީ ބައިވެރިވެފައެވެ.

މިއަހަރުގެ ފިޠުރު ޢީދާއި ގުޅިގެން ސްރީލަންކާގައި ދިރިއުޅޭ ދިވެހި ޢާއިލާތަކުގެ ކުޑަކުދިންނަށް އަމާޒުކޮށްގެން ކުޑަކުދިންގެ ހަވީރެއް ބޭއްވުމަށް ވެސް ވަނީ ހަމަޖެހިފައެވެ. ކޮންމެ އަހަރެއްގެ ވެސް ފިޠުރު ޢީދާއި އަޟްހާ ޢީދުގެ މުނާސަބަތުގައި ސްރީލަންކާގައި ހުންނަ ރާއްޖޭގެ ހައިކޮމިޝަނާއި އެ ޤައުމުގައި ދިރިއުޅޭ ދިވެހިން ގުޅިގެން ތަފާތު އެކި ޙަރަކާތްތައް ކުރިއަށް ގެންދެއެވެ. 

ރާއްޖޭގެ އަވަށްޓެރި ޤައުމުތަކަށް ފިޠުރު ޢީދު ދުވަހަކީ މިއަދެވެ. ނަމަވެސް ރާއްޖެއަށް ފިޠުރު ޢީދު ދުވަހުގެ ފުރަތަމަ ދުވަހަކީ އިއްޔެކަމުގައި ވަނީ ކަނޑައަޅުއްވާފައެވެ.